Գյումրիի Անտառավան 26 վթարային շենքի բնակիչների համար բնակապահովման նոր առաջարկ և տարբերակ է շրջանառվում

Գյումրիի վթարային ու խիստ վթարային շենքերի շարքում Անտառավան 26-ը համարվում է ամենավտանգավորը, այսինքն՝ բնակվելն այստեղ անթույլատրելի է, բայց ապրողներին որևէ մեկը չի արգելում քայքայվող շենքում մնալ։ 60 բնակարանանոց շենքում 9 ընտանիք է մնացել, նրանք, որոնք ավեի քան 30 տարի շենքը փորձել են պահել, սպասել ամրացման ծրագրերի, Փոխարենը հիմա ունեն փլուզված 5-րդ հարկով ու պաշտգամբներով շենք, որը չեն սպասարկում համատիրությունը, ջրամատակարար ընկերությունը։ Ջուրը դրսից է, տներն առանց կոյուղատար ցանցի։

Վտանգավոր շենքում փլուզումների ակտիվացումը բնակիչները չափում են տեղումներով, վերևի հարկերում արդեն ծածկասալերը պահող գրեթե ոչինչ չի մնացել: Բայց վթարայնությունը տարիներ առաջ չի խանգարել, որ 10- 15 տարի առաջ բնակարանների գնման վկայագրերով տներ վաճառեն այս շենքում, անգամ սեփականաշնորհեն։ Վատի ու ավելի վատի միջև ընտրությունը բնակիչների մի մասի համար դարձել է գլխացավանք։

«Ամեն տարի մենք միշտ էլ բողոքել ենք, կառավարություն ենք դիմել, մարզպետարան, քաղաքապետարան, բայց սայլը տեղից  չի շարժվում, գալիս խոստումներ են տալիս՝ մի բան կանենք, մի բան կանենք, բայց ոչ մի  բան չեն անում»,- նշում է վթարային շենքի բնակիչներից մեկը։

«Ամեն անգամ խոստումով մարզպետները գուկան՝ ձեզի լավ լուր ենք բերել, էս դեկտեմբերին կեղնի, մյուս դեկտեմբերին կեղնի, բայց կոնկրետ չեն նշում, թե որ տարվա դեկտեմբերին, մենք էլ հույսով կսպասենք, որ գոնե էս տարվա դեկտեմբերը կեղնի»,- ասում է մեկ այլ բնակիչ։

Գրանցված հերթական փլուզումից հետո, 2019 թվականին, տրվեց սեյսմիկ եզրակացություն, որ Անտառավան 26 շենքը ենթակա է ամրացման, բայց միայն վթարային հատվածների ապամոնտաժման պայմանով։ Եզրակացությունն ու քննարկումները ընթացք չունեցան։ Հետո քաղաքի 92 վթարայիններից առանձնացվեցին Անտառավան 26, Տիգրան Մեծ 5, Ղուկասյան 29 և Իսահակյան 9 շենքերը, որոնց բնակիչներին բնակապահովման առաջարկ ներկայացվեց։ Անտառավան 26-ի համար բնակարանների գնման վկայագրերի տրամադրման առաջարկն էր, որին համաձայնել էին շենքում մնացած ընտանիքները։

4 տարի առաջ եղած նախագիծը փաստորեն դեռ օրակարգում է նաև բնակիչների ցանկությամբ։ Նախագիծ և խոստումներ տարբերակների արանքում Անտառավան 26 բնակիչները լսել են բնակապահովման ևս մեկ առաջարկի մասին, որը հնչել է օրեր առաջ՝ Աժ-ի հարցուպատասխանի ժամանակ։

«Գյումրիում ունենք մի շենք ԲԷՑ-ի բալանսում է և կարծես այդքան խիստ կարիք չկա օգտագործելու, և Գյումրու համայնքապետարանի ու բարեգործական ընկերության հետ ծրագիր ենք անում, այդ շենքը կհատկացնենք համայնքապետարանին՝ պայմանով, որ բարեգործական ընկերությունը կվերանորոգի, կդարձնի բնակելի տարածք-շինություն և այնտեղ մի  շարք ընտանիքներ կբնակվեն»,- այս մասին հայտարարեց ՀՀ ՏԿԵ նախարար Գնել Սանոսյանը։

«Կա Փարոս հիմնադրամ, որը պատրաստակամություն է հայտնել էդ շենքը հանձնել իրենց  և վերակառուցելուց  հետո  4-5 բնակարաններ հանձնել քաղաքապետարանին, իսկ քաղաքապետարանն էլ պարտավորվել է , որ  եթե լինի էդ գործընթացը 4-5 բնակարանները  կհատկացնի Անտառավան 26 շենքում էս պահին բնակվող բնակիչներին»,- ShantNews.am-ին հատնել է Շիրակի մարզպետարանի քաղաքաշինության վարչության պետ Խաչատուր Խնձրցյանը։

Բարձավոլտ էլեկտրացանցերի ենթակայության կիսակառույց շենքը գտնվում է Մսի կոմբինատ թաղամասում։ Բարեգործությամբ վերանորոգելու դեպքում կունենա 4-5 բնակարան, այսինքն՝ շենքում ապրող 9 ընտանիքներից 4 կամ 5-ի բնակապահովման հարցը կարող է լուծվել, իսկ թե երբ, ժամկետները քաղաքաշինության վարչության պետը պայմանավորում է ֆինանսական միջոցներ լինելու հետ։ Իսկ մյուս ընտանիքների համար լուծման ուղղությունը մնում է ԲԳՎ-ն։  Ուսումնասիրությունների արդյունքում պարզվել է, որ  Անտառավան 26 շենքում 38 բնակարան էլ համայնքային սեփականություն է։

«Այնտեղ կան ընտանիքներ, ովքեր ունեն սեփականության իրավունքով բնակարաններ, իսկ 38 բնակարան էլ համայնքի սեփականությունն է։ Եթե համայնքապետարանը ունի հատկացված օրդեր այն բնակիչներին, որոնք էդ  պահին օրդերավորված բնակվել են էդ բնակարանում, բնական է, որ համայնքը կտրամադրի իրենց»,- նշել է  Շիրակի մարզպետարանի քաղաքաշինության վարչության պետը։

Շիրակի մարզի 114 վթարային շենքերից 92-ը Գյումրիում են։ Շիրակի մարզում վերջին անգամ վթարային շենք ամրացվել է 19 տարի առաջ՝ 2004 թվականին, Լինսի հիմնադրամի միջոցներով: Գյումրիի 92 վթարայիններում ավելի քան 5000 մարդ է ապրում։