Սրտի կաթվածի մասին տեղեկություններից հետո Էրդողանի վարկանիշի կտրուկ անկում է արձանագրվել

Այսօր մեկնարկել է Թուրքիայի նախագահական ու խորհրդարանական ընտրությունների քվեարկությունը՝ երկրի սահմաններից դուրս: Ընտրություններն անցկացվում են նախագահ Էրդողանի սրտի կաթվածի մասին տարածվող տեղեկությունների ֆոնին: Մինչև ընտրությունները դեռ 18 օր կա: Ինչո՞ւ է արտերկրում քվեարկությունն այսքան վաղ սկսվել:

Թեմային՝  «Հորիզոնի» տաղավարում անդրադարձել է Արտյոմ Երկանյանը։

«Ինչպես մի շարք երկրներում, Թուրքիայում ևս, երկրի սահմաններից դուրս քվեարկությունը տեղի է ունենում ընդհանուր ընտրություններից ավելի շուտ, բայց Թուրքիայի տարբերությունն այլ երկրներից նրանում է, որ Թուրքիան այն բացառիկ երկրներից է, ուր չափազանց մեծ են ընտրելու իրավունք ունեցող համերկրացիները, որոնք ապրում են երկրից դուրս:

Եթե Թուրքիայի սահմաններից դուրս մոտ 10 մլն թուրք է ապրում, ապա նրանցից մոտ 4 միլիոնը քվեարկելու իրավունք ունի և սովորաբար շատ ակտիվ մասնակցում է քվեարկությանը: Նրանց համար աշխարհի 75 երկրներում բացվել են 150 ընտրատեղամասեր: Այսինքն՝ Թուրքիայում ընտրելու իրավունք ունեցող քաղաքացիներից մոտ 6-7 %-ն ապրում է  արտերկրում և փորձը ցույց է տալիս, որ սովորաբար նրանք քվեարկում են հօգուտ Էրդողանի: Այս անգամ հնարավոր է բոլորովին այլ պատկեր լինի՝ հաշվի առնելով տարածվող լուրերն այն մասին, որ Էրդողանը ծանր հիվանդ է:

Եթե երկրի ներսում ապրող քվեարկության իրավունք ունեցող քաղաքացիների համար դեռ ժամանակ կա, դեռ կարող են կենդանի Էրդողանին ցույց տալ ընտրություններից 2-3 օր առաջ, ապա երկրի սահմաններից դուրս՝ այսօր և վաղը քվեարկող թուրքերի համար պատկերն այլ է. նրանց մոտ կա տպավորություն, որ Էրդողանը չի կարողանա ղեկավարել երկիրը: Դա է պատճառը, որ Թուրքիայի սահմաններից դուրս տեղի ունեցող այս քվեարկությունն այդքան կարևորվում է և կարող է վճռորոշ դեր խաղալ:

Երեկ Էրդողանը կարծես թե երևացել է, իսկ այսօր որևէ տեղ չի երևացել: Իսկ երեկ տարածած այդ տեսանյութն ու լուսանկարը միայն ամրապնդել է հիմքը տարբեր վարկածների այն մասին, որ իրականում դա ոչ թե հենց այդ օրն արված նյութեր էին, այլ նախապես արված և, ըստ էության՝ կեղծ նյութեր: Մասնավորապես՝ «Դոյչե Վելե» պարբերականի մեր գործընկերները հայտնաբերել են, որ այն տեսանյութը, որն այժմ տարածվում է, մոնտաժված է: Այնտեղ երևում է, որ այդ կադրերի համակցումն արհեստական է։ Առաջին պլանում երևում է, թե ինչպես է Վլադիմիր Պուտինը ձեռքով ողջունում իր զրուցակցին՝ տեսակապի միջոցով, հաջորդ խոշոր պլանում Էրդողանն է ձեռքով ողջունում Պուտինին և երրորդ՝ ավելի խոշոր պլանում, երևում է, թե ինչպես է Պուտինը նայում մոնիտորի վրա, որտեղ արդեն Էրդողանը չկա: Այսինքն՝ դա կասկածների համար նոր հիմք է տվել:

Բացի դրանից, ընդամենը մի քանի րոպե տարբերությամբ, երևում է Էրդողանն իր աշխատասենյակում, որի լուսանկարը տարածվում է, րոպեներ անց նա արդեն բոլորովին այլ սրահում տեսակապի միջոցով ողջունում է Վլադիմիր Պուտինին: Այժմ Թուրքիայում ավելի ակտիվ են խոսում այն մասին, որ իրականում Էրդողանի մոտ ոչ թե ստամոքսի սովորական, պարզ խնդիր է, այլ՝ իսկապես ավելի բարդ խնդիր »,-ասել է Արտյոմ Երկանյանը:

Մանրամասները՝ ամբողջական հարցազրույցում: