ԱՄՆ կրոնական ազատության հանձնաժողովը Պետդեպին կոչ է անում ճնշում գործադրել Ադրբեջանի վրա՝ հայկական հուշարձանները փրկելու համար

ԱՄՆ Պետդեպարտամենտը հրապարակել է կրանական ազատության միջազգային հանձնաժողովի զեկույցը: Այն առնչվում է  2022 թվականին աշխարհի տարբեր երկրներում խղճի ազատությանը վերաբերող խնդիրներին: Ադրբեջանը ներառվել է լրջագույն խնդիրներ ունեցող երկրների շարքում: Զեկույցում հիշատակվում են մասնավորապես հայկական հոգևոր ժառանգության նկատմամբ բարբարոսական հարձակումները:

Անցած տարիների համեմատ դիմամիկան ինչպիսի՞ն է Ադրբեջանում: Հայկական հոգևոր ժառանգության թեման ի՞նչ համատեսքտում է հիշատակվում զեկույցում և ի՞նչ եզրակացություններ են արվում:

Թեմային՝ «Հորիզոնի» տաղավարում անդրադարձել է Արտյոմ Երկանյանը։

«Այդ զեկույցն արձանագրում է այն փաստը, որ անցած տարի նախորդ տարիների համեմատ Ադրբեջանում իրավիճակն էլ ավելի է վատթարացել խղճի ազատության բնագավառում: Կոնկրետ փաստեր են հիշատակվում. Ադրբեջանը 2-րդ տեղում է այն պետությունների ցանկում, որոնց հանդեպ անհրաժեշտություն է նկատվում սահմանել հատուկ վերահսկողություն և ուշադրություն, քանի որ այնտեղ սահմանափակվում են կրոնական փոքրամասնությունների և հավատացյալների իրավունքները:

Այդ նույն ցուցակում են նաև Թուրքիան և Ադրբեջանը հարևանությամբ է այնպիսի երկրների հետ, ինչպիսիք են՝ Իրաքը, Ալժիրը և Կենտրոնական Աֆրիկյան Հանրապետությունը:

Այդ զեկույցում ընդգծվում է, որ Ադրբեջանի կառավարությունը վերահսկողություն է սահմանել կառավարությանը ոչ հավատարիմ հեղինակավոր կրոնական գործիչների նկատմամբ, ովքեր հալածվում են ու հետապնդվում, անգամ՝ ձերբակալվում:

Որպես խիստ բացասական երևույթ՝ հիշատակվում է այն, որ Ադրբեջանի կառավարության նախաձեռնությամբ փոփոխություններ են մտցվել կրոնի մասին օրենքում, ինչի արդյունքում կառավարությունն իրավունք է ստացել մզկիթների իմամներ նշանակելու և իրենց այդ գործից հանելու, մի բան, ինչն ընդունված չէ իսլամական աշխարհում: Այսինքն՝ կառավարությունն է որոշում, թե ով է լինելու կոնկրետ մզկիթում հոգևոր ծառայողը:

Բացի այդ, նաև հիշատակվում են կոնկրետ փաստեր, որոնք վկայում են այն մասին, որ կառավարությունն արգելում է  կրոնական այս կամ այն համայնքի գրանցումը:

Զեկույցում մի քանի անգամ հիշատակվում է այն մասին, որ 2022թ.-ի ընթացում, մի քանի դեպք է արձանագրվել, երբ հայկական պատմական և կրոնական ժառանգությունը ոչնչացվել է կամ հայտնվել է ոչնչացման սպառնալիքի առջև:

Ընդգծվում է, որ միջազգային կազմակերպությունները, իրավապաշտպանները լուրջ կասկածներ ունեն, առ այն՝ արդյո՞ք Ադրբեջանի կառավարությունը ցանկանում է պահպանել ԼՂ-ում և շրջապատող շրջաններում հայկական պատմական և կրոնական ժառանգությունը:

Հիշատակվում է անցած տարվա փետրվարին տեղի ունեցած այն խայտառակ դեպքը, երբ մշակույթի նախարարը հատուկ աշխատանքային խումբ էր ստեղծել, որի նպատակը պետք է լիներ հայկական եկեղեցիների պատերից հայերեն գրառումների ջնջումը և նշվում է, որ այս խայտառակ վանդալիզմը հաջողվեց կանխել միայն այն բանից հետո, երբ մարտին Եվրախորհրդարանն ընդունեց հատուկ զեկույց, որում դատապարտեց Ադրբեջանում հայերի ժառանգությունը ոչնչացնելու փորձերը»,-ասել է Արտյոմ Երկանյանը:

Մանրամասները՝ ամբողջական հարցազրույցում: