Ամենատարեց երգչուհին 90 տարեկան է, ամենակրտսերը՝ 66․ Գյումրիի «Մարջան» երգչախմբի համերաշխ անդամները

Ամենատարեց երգչուհին 90 տարեկան է, իսկ ամենակրտսերը՝ 66․․․ Նրանք մոտ երկու տարի առաջ Գյումրիում ստեղծված «Մարջան» երգչախմբի անդամներն են։ 10 տարեց կանանցով շաբաթը երկու անգամ գալիս են փոքր ու համերաշխ երգչախմբում երգելու։ Իրենց ջահել տարիների հին ու մոռացված երգերն են կատարում, նաև այնպիսի լիրիկական ստեղծագործություններ, որոնք սիրում են լսել բոլոր սերունդները։

«Մարջան» երգչախմբի ամենատարեց երգչուհին 90-ամյա Բեթղեհեմ Պողոսյանն է։ Երգ ու երաժշտություն միշտ է լսում, սիրում է մեր ժողովրդական ու աշուղական երգերը, և հաճախակի ինքն իր համար մրմնջացել է սիրելի երգերը։ Երկու տարի առաջ եկավ ու սիրեց ստեղծագործ միջավայրը։

«Գալիս ենք, երգում ենք, ուրախանում ենք ընչի գոհ չեմ էղնի, շատ գոհ եմ, շատ էլ լավ է»,-պատմում է Բեթղեհեմ Պողոսյանը։

90-ամյա Բեթղեհեմ տատն ասում է, որ ինչ սկսել է երգել, իրեն ավելի ջահել ու առույգ է զգում։ Պատկառելի տարիքում է, թեև մի քիչ դժվարանում է քայլել, բայց երբեք բաց չի թողնում երգչախմբի փորձերը։ Շաբաթը երկու անգամ գալիս է Շիրազի տուն-թանգարան՝ փորձերի։ «Մարջան» երգչախմբում տատիկների օրն անցնում է աշխույժ ու ուրախ մթնոլորտում։ Մտերմացել են, դարձել մեկ ընտանիքի պես։

«Ըսիկ մեզի համար շատ գեղեցիկ խումբ է, ուրախ ենք, երջանիկ ենք, որ օրմ իրար չենք տեսնի ինչղ օր խելագար էղնինք։ Ես փոքր չեմ՝ 78 տարեկան եմ, լավ է շատ ուրախ եմ, ես ընձի ըմբես երիտասարդ կզգամ․․․»,- ասում է երգչախմբի անդամ Քնարիկ Հովհաննիսյանը։

72-ամյա Մանիկ Բաբելյանը երգչախմբի դաշնակահարն է, երաժշտական կրթություն ստացել է թավջութակի բաժնում, երկար տարիներ նվագել է։ Հիմա տիկին Մանիկը և՛ դաշնամուր է նվագում, և՛ երգում՝ երաժշտական կրթությունն է այս հարցում օգնում է։

«Գուզենք շատցնենք մեր ռեպերտուարը, համերգներով ծերանոց ենք գնացել, ուրախացրել ենք ծերերին։ Մարդիկ կան չեն հասկանում, ասում են էդ տարիքին գնում, երգում եք։ Ես անհարմար չեմ զգա, ավելի հպարտ կզգամ, որ մեր քաղաքի անունը կպահեմ»,- ասում է Մանիկ Բաբելյանը։

«Մարջան» երգչախումբը ստեղծվել է Գյումրիի  Հովհաննես Շիրազի հուշատուն-թանգարանի ցուցանմուշների պատասխանատու Մարինա Մանուչարովայի նախաձեռնությամբ, նա էլ ղեկավարում է երգչախումբը:

«Կոմիտասի թանգարան-ինստիտուտը և Շիրազի թանգարանը միասին ծրագիր ունեին, ծրագիրը կոչվում էր  երաժշտական թերապիա, էդ ժամանակ ահագին երիտասարդներ, տարեցներ եկան էստեղ սկսեցին երգեր սովորել, երգեցինք։ Ծրագիրն ավարտվեց, դրանից հետո միտք ծագեց, որ կարելի է տարեցների երգչախումբ ստեղծել և ես իրագործեցի իմ երազանքը»,-պատմում է «Մարջան» երգչախմբի ղեկավար Մարինա Մանուչարովան։

Երգչախումբ ձևավորելը հեշտ չէր, տարեցները սոցիալական կենտրոնի շահառուներն են եղել, նրանք ոգևորությամբ են ընդունել երգչախմբի ղեկավարի առաջարկը և միասին՝ համատեղ ուժերով, ձևավորել են ստեղծագործական խումբ։

«Իրենց համար բավականին բարդ է, քանի որ ոչ մեկը չի երգել, չեն ներկայացել հանրությանը։ Բավականին դժվար աշխատանք է տարվել  թե՛ խոսքերը սովորելու ժամանակ, թե՛ երաժշտությունը ընկալելու  ժամանակ, բայց կարողացել ենք, ստացվել է»,- ասում  է «Մարջան» երգչախմբի ղեկավար Մարինա Մանուչարովան։

Առայժմ երգչախումբը տասը անդամ ունի, երգացանկը փոքր է, բայց աշխատում են նոր երգեր ընդգրկել՝ ժողովրդական և գուսանական։ Տատիկների խումբը նոր անդամներով համալրելու նպատակներ էլ ունեն, միայն թե երգող պապիկներ գտնել դեռ չի հաջողվել: «Մարջան»-ը մի քանի համերգներ արդեն ունեցել է Գյումրիում։