Գեղարքունիքի մարզում 2023 թվականին կապիտալ ներդրումները կազմել են շուրջ 25 միլիարդ դրամ

Գեղարքունիքի մարզում 2023 թվականին կատարված կապիտալ ներդրումները կազմել են շուրջ 25 միլիարդ դրամ, ինչի արդյունքում շինարարական աշխատանքներ են ընթացել կենսագործունեության ամենատարբեր ոլորտներում։

Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից,

մարզպետ Կարեն Սարգսյանը նշել է, որ դրանից շուրջ 11 միլիարդ 500 միլիոն դրամը ծախսվել է ճանապարհաշինության ոլորտում, ինչի արդյունքում հիմնանորոգվել կամ միջին նորոգման են ենթարկվել միջպետական, հանրապետական, մարզային ու համայնքային նշանակության ճանապարհներ՝ շուրջ 76,5 կիլոմետր ընդհանուր երկարությամբ։ Սուբվենցիոն կամ պետական այլ ծրագրերով կառուցվել է 140 կիլոմետր երկարության խմելու, 33 կիլոմետր 662 մետր ոռոգման ջրատարների արտաքին ու ներքին ցանցեր ու ջրամատակարարման համակարգեր, 88 կիլոմետր 930 մետր երկարության արտաքին լուսավորության ցանց, 2400 գծամետր երկարության գազատար, սալարկվել 11 869 քմ փողոցներ եւ մայթեր, հիմնանորոգվել բազմաբնակարան 15 շենքերի տանիքներ։

Ավարտվել կամ ավարտական փուլում են գտնվում Վաղաշենի, Գավառի թիվ 7, Սարուխանի թիվ 1, Վարդենիկի, Զոլաքարի եւ Ճամբարակի թիվ 5 մանկապարտեզների շինարարական աշխատանքները։

Շարունակվել են Գեղհովիտի թիվ 2, Ներքին Գետաշենի թիվ 1, Ջիլի, Շատջրեքի միջնակարգ, Ճամբարակի թիվ 1, Լեռնակերտի հիմնական դպրոցների, Գագարինի, Վերին Գետաշենի եւ Ակունքի միջնակարգ դպրոցների մարզադահլիճների, Աստղաձորի եւ Վարդենիսի բանավան թաղամասի, Բերդկունք-Հայրավանք բնակավայրերի մանկապարտեզների, Լճափի բուժամբուլատորիայի շինարարական աշխատանքները, որոնք կընթանան նաեւ 2024 թվականի ընթացքում։

Շահագործման է հանձնվել Մարտունու բժշկական կենտրոնի նորակառույց ու տեխնիկապես հագեցած շենքը, որի շնորհիվ արդեն Մարտունի համայնքի ու հարեւան բնակավայրերի ավելի քան 100 հազար բնակիչներ արդի չափորոշիչներին համապատասխանող բուժսպասարկումից օգտվելու հնարավորություն ունեն։ Բժշկական կենտրոնի նոր շենքի կառուցումն արժեցել է շուրջ 2 միլիարդ 232 միլիոն դրամ։

«Իրականացված մեծածավալ ներդրումների եւ շինարարության շնորհիվ Գեղարքունիքի մարզում լուծում են ստացել տասնամյակներ ի վեր կուտակված բազմաթիվ հիմնախնդիրներ։ էապես բարելավվել են բնակչության կենսապայմանները, հզորացվել ու արդիականացվել ենթակառուցվածքները, ստեղծվել են նոր աշխատատեղեր, նվազել է գործազրկությունն ու աղքատությունը։

Մեզանում շատ կարեւոր ու հաճելի նորություն էին պարեկային, ինչպես նաեւ ջրային պարեկային ծառայությունների ստեղծման քայլերը, որոնց շնորհիվ ամրապնդվել ու բարձրացել է հասարակական կարգի պահպանության, պետական ու մասնավոր սեփականության պաշտպանության արդյունավետությունը։

Ի ուրախություն բոլորիս, ուզում եմ հավաստել, որ 2024 թվականին եւս մեզ սպասում են հայրենաշեն նոր ծրագրեր ենթակառուցվածքների զարգացման, հանրակրթության, առողջապահության, գյուղատնտեսության, կապիտալ շինարարության եւ այլ ոլորտներում։ Իսկ արձանագրված ձեռքբերումներն ու հաջողությունները մեզ համար կայուն հիմք են ստեղծում՝ կենսական նշանակության նոր ծրագրեր կյանքի կոչելու, մեր մարզի հետագա զարգացումն ու առաջընթացն ապահովելու համար»,- նշել է մարզպետը։