Տիգրան Հակոբյանն ամփոփել է ՀՌՀ-ի 2023թ.-ի աշխատանքը

Հեռուստատեսության և ռադիոյի հանձնաժողովն» ամփոփել է նախորդ տարվա աշխատանքը: Հանձնաժողովը, որի կազմը վերջին տարիների ընթացքում գրեթե ամբողջությամբ փոխվել է, 2023-ին հարուցել է 64 վարչական վարույթ. 57-ը՝ սեփական նախաձեռնությամբ, իսկ 7-ը՝ բողոքների համաձայն:

Անցած տարվա դեկտեմբերի 31-ի դրությամբ Հեռուստատեսության և ռադիոյի հանձնաժողովի վերահսկողության ներքո եղել է մայրաքաղաքային ու մարզային 28 հեռուստաընկերություն, ինչպես նաև առանց լիցենզիայի հանրային հեռարձակողն ու ռուսական 3 հեռուստաալիք։ 2019-ին մարզերում գործել են ընդամնեը 6 տեղական հեռուստաընկերություններ: Հիմա 10 մարզերն էլ ունեն տեղական հեռարձակող:

Հաշվետու ժամանակահատվածում հանրապետության տարածքում գործել է 35 ռադիոընկերություն։ 2020 թ.-ին մարզային ռադիոընկերություններ գործել են միայն Գյումրիում և Վանաձորում: Տիգրան Հակոբյանի փոխանցմամբ՝ այժմ ռադիոընկերություններ գործում են գրեթե բոլոր մարզերում, բացառությամբ Կոտայքի և Արմավիրի մարզերի՝ հաճախականության բացակայության պատճառով։

Իսկ արդյո՞ք հնարավոր չէ օտարալեզու, հատկապես թուրքական ու ադրբեջանական ռադիոալիքների հաճախականությունների սահմանափակումը մարզերում. բնակիչներին մտահոգող հարցին ի պատասխան՝ ՀՌՀ նախագահը պատասխանեց, որ չնայած հաճախականությունները սահման չեն ճանաչում, սակայն խնդրով զբաղվում են:

Հեռուստատեսության և ռադիոյի հանձնաժողովի նախաձեռնությամբ «Տեսալսողական մեդիայի մասին» և «Վարչարարության հիմունքների և վարչական վարույթի մասին» օրենքներով սահմանված վարչարարության իրականացման արդյունքում նախորդ տարի հարուցվել է 64 վարչական վարույթ։ Հարուցված վարույթներից 57-ը հանձնաժողովի նախաձեռնությամբ է եղել,  7-ը՝ բողոքների համաձայն։ Հակոբյանի փոխանցմամբ՝ վերջին հինգ տարիներին հարուցվել են 18 անգամ ավելի շատ վարչական վարույթներ, որոնց թիվ 2019-2023 թթ.-ին կազմել է 232, իսկ 2013-2018-ին՝ 13։

Մի շարք հեռուստաընկերություններ վերջին տարիներին կուտակել էին պարտքեր. Տիգրան Հակոբյանի խոսքով՝ այս առումով շատ տխուր պատկեր է հանրային մուլտիպլեքսում գործող գրեթե բոլոր հեռուստաընկերությունների համար, և իրենց հանձնաժողովը չի պատրաստվում վերջիններիս մեղադրել: Հակոբյանը հեռուստաընկերությունների վնասով աշխատելու մի քանի գործոններ թվեց. գովազդատուները փնտրում են նաև այլ հարթակներ, ամեն տարի 3-5 տոկոսով հեռուստաընկերությունների դիտելիությունն ընկնում է, օրինակ նաև այն, որ Հանրային հեռուստաընկերությանը կրկին տրվեց գովազդ իրականացնելու իրավունք, որին հանձնաժողովն ի սկզբանե դեմ է եղել: Հաջորդ գործոնը, ըստ Հակոբյանի, շահումով խաղերի գովազդի արգելքն էր հեռուստառադիոընկերություններում:

Ո՞րն է այս դեպքում հեռուստատեսության և ռադիոյի հանձնաժողովի առաջարկը. միջազգային կազմակերպությունների ներգրավմամբ, միջազգային փորձը հաշվի առնելով՝ ստեղծել մասնավոր ու պետական ֆոնդեր և ֆինանսավորել հեռուստաընկերություններին մանկական, կրթական, մշակութային հաղորդումներ ստեղծելու համար: Հակոբյանը դարձյալ օրինակներ բերեց. հեռուստաընկերություններին պատվիրակել ուսուցողական մուլտֆիլմերի հայերենով որակյալ թարգամանություն և հեռարձակում կամ օրինակ քաջալերեն չինարեն սովորելու հեռուստածրագրերի հեռարձակումը:

Հիշեցնենք, Շանթ Հեռուստաընկերությունը տարիներ շարունակ բարձրորակ թարգմանությամբ ստեղծեց հայտնի մուլտֆիլմերի, ֆիլմերի հայերեն տարբերակները, հիմա էլ հեռուստաընկերությունը նկարահանում ու ցուցադրում է «Կախվածություն» հեռուստասերիալը՝ նպատակ ունենալով հասարակության շրջանում բարձրացնել իրազեկվածության մակարդակն ու հատկապես անչափահասներին տալ խորհելու առիթ՝ վնասակար ու վատ սովորությունների գայթակղության գերին չդառնալու համար

Մանրամասները՝ ռեպորտաժում: