Ակնկալվում է բարձրացնել հանրային ֆինանսների և սեփականության ոլորտում օրինականության ու արդյունավետության սկզբունքների վերաբերյալ հանրությանն ու ԱԺ-ին ներկայացվող տեղեկատվության որակը. Գևորգ Պապոյան

Օրենսդրական փաթեթի մշակման նպատակն է բարձրացնել հանրային ֆինանսների եւ սեփականության ոլորտում օրինականության եւ արդյունավետության սկզբունքների վերաբերյալ հանրությանն ու Ազգային ժողովին ներկայացվող տեղեկատվության որակը` մասնագիտացված, անկախության երաշխիքներով օժտված եւ անկողմնակալ արտաքին պետական հաշվեքննության մարմնի գործունեության արդյունավետության բարձրացման ճանապարհով: Այս մասին ասել է Ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանը` ՀՀ ԱԺ փետրվարի 27- ի նիստում ներկայացնելով ««Հաշվեքննիչ պալատի մասին» օրենքում փոփոխություններ եւ լրացումներ կատարելու մասին» եւ կից ներկայացված օրենքների նախագծերի փաթեթը:

Նախագիծը մշակելիս հաշվի են առնվել Եվրոպական միության եւ Տնտեսական համագործակցության եւ զարգացման կազմակերպության (ԵՄ/ՏՀԶԿ) համատեղ ՍԻԳՄԱ ծրագրի աջակցությամբ մշակված` «Հաշվեքննիչ պալատի մասին» ՀՀ օրենքի բարելավումների վերաբերյալ առաջարկությունների փաթեթը, ինչպես նաեւ ԱՄՆ Կառավարության հաշվետվողականության գրասենյակի (US GAO) կողմից օրենքի վերաբերյալ ներկայացված առաջարկությունները:

Հիմնական զեկուցող Գեւորգ Պապոյանը, մանրամասն ներկայացնելով փոփոխություններն ու լրացումները, նշել է, որ Հաշվեքննիչ պալատն ունեցել է տեղեկատվության հասանելիության սահմանափակումներ, եւ ներկայացված օրենսդրական նախաձեռնությամբ դրանք էականորեն վերացվել են: Մարդկային ռեսուրսների կառավարման տեսանկյունից առկա խնդիրներին եւս օրենսդրական փաթեթով տրվել են լուծումներ: Որպես օրինակ` Գեւորգ Պապոյանը մատնանշել է Հաշվեքննիչ պալատի չհավասարակշռված կառավարման մոդելը` շեշտելով, որ առաջարկված օրենսդրական փաթեթով հստակեցվել են նաեւ այս կանոնակարգումները. առաջարկվել է ներդնել ներինստիտուցիոնալ հակակշիռների ու զսպումների մեխանիզմներ:

Հարակից զեկուցող, Ֆինանսավարկային եւ բյուջետային հարցերի մշտական հանձնաժողովի անդամ Արուսյակ Մանավազյանը, կարեւորելով առաջարկվող նախաձեռնությունը, ընդգծել է, որ իրավունք կտրվի ընդլայնելու Հաշվեքննիչ պալատի մանդատը: Հանձնաժողովը քննարկված օրենսդրական փաթեթին տվել է դրական եզրակացություն:

ՀՀ ֆինանսների նախարար Վահե Հովհաննիսյանը շնորհակալություն է հայտնել օրենսդրական փաթեթի հեղինակներին` ոլորտի նկատմամբ դրսեւորած հետաքրքրության, շահագրգիռ քննարկումների եւ կատարված մեծ աշխատանքի համար: Նա տեղեկացրել է, որ Կառավարությունն օրենսդրական փաթեթի որոշ դրույթների վերաբերյալ ներկայացրել է թե’ բովանդակային, թե’ տեխնիկական բնույթի նկատառումներ, որոնց մեծ մասն ընդունվել է հեղինակների կողմից:

ՀՀ ԱԺ նախագահի տեղակալ Հակոբ Արշակյանը հետաքրքրվել է` արդյո՞ք կանոնակարգված է ստուգող մարմինների աշխատանքը հատկապես այն դեպքերում, երբ ստուգող երկու մարմինները նույն գերատեսչությունում զուգահեռ ստուգումներ են իրականացնում: «Ձեր բարձրացրած հարցը տեղին է, որովհետեւ նման դեպքեր լինում են: Մենք ունենք մի գործընթաց, որն ուղղված է ստուգող մարմինների կրկնվող աշխատանքի վերացմանը: Մասնավորապես, Ֆինանսների նախարարության վերահսկողության վարչությունը լուծարվելու է եւ միացվելու է Պետական վերահսկողական ծառայությանը»,- նշել է Վահե Հովհաննիսյանը:

Ելույթներում պատգամավորներն անդրադարձել են օրենսդրական փաթեթի կարգավորումներին, Հաշվեքննիչ պալատի գործունեության ընդլայնմանը:

Եզրափակիչ ելույթում Գեւորգ Պապոյանն անդրադարձել է պատգամավորների ելույթներին` պատասխանելով նրանց հուզող եւ հետաքրքրող հարցադրումներին: