Վթարված երթուղայինը տեղափոխվել է պահպանվող հատուկ տարածք, գործը հետաքննության փուլում է

Ավելի վաղ SHANTNEWS-ը տեղեկացրել է, որ այսօր՝ մարտի 27-ին, խոշոր ավտովթար է տեղի ունեցել Երևանում։ Երևանյան լճի կամրջի վրա բախվել են 33-ամյա Մուշեղ Մերկիբոսյանի վարած «Գազել» մակնիշի և 39-ամյա Արման Սիմոնյանի վարած Mercedes մակնիշի 35 QC 671 համարանիշի ավտոմեքենաները։ Նախնական տեղեկություններով՝ վթարի հետևանքով 8 մարդ է տուժել, 2 հոգի ոչ ծանր վնասվածքներով տեղափոխվել է «Էրեբունի» բժշկական կենտրոն։

 Դեպքին վերաբերող հաղորդագրություն է տարածել նաև ՀՀ ոստիկանությունը.

«Մարտի 27-ին՝ ժամը 9.40-ի սահմաններում, Երևանյան լճի կամրջի վրա իրար են բախվել թիվ 57 երթուղին սպասարկող «Գազել» մակնիշի միկրոավտոբուս և «Մերսեդես» մակնիշի ավտոմեքենա: Տարբեր աստիճանի մարմնական վնասվածքներով հիվանդանոց են տեղափոխվել «Գազելի» չորս ուղևոր, նաև «Մերսեդեսի» վարորդը։ Ճանապարհատրանսպորտային պատահարի հանգամանքները պարզվում են ճանապարհային ոստիկանության առաջին սպայական գումարտակի հետաքննության բաժանմունքում։ Մեքենաները տեղափոխվել են պահպանվող հատուկ տարածք»,- ասված է ոստիկանության հաղորդագրության մեջ:

Ավելի վաղ SHANTNEWS-ը զրուցել է նաև Երևանի քաղաքապետարանի տրանսպորտի վարչության պետ Հենրիկ Նավասարդյանի հետ: Բանն այն է, որ տեղեկություններ էին շրջանառվում, թե 57 համարի երթուղին սպասարկող միկրոավտոբուսի վարորդը հաշմանդամության կարգ ունի, նրա վարորդական իրավունքը ժամկետանց է եղել, իսկ հասարակական տրանսպորտ վարելու համար անհրաժեշտ կարգ առհասարակ չի ունեցել:

«Վթարի մասին ահազանգն ստանալուց հետո հանձնարարական է տրվել սպասարկող կազմակերպությանը, որպեսզի հետամուտ լինի, թե վթարի պատճառները որոնք են եղել և լինել այն քաղաքացիների կողքին, որոնք տուժել են վթարի պատճառով: Մնացած հարցերով զբաղվում է ոստիկանությունը: Համապատասխան փաստաթղթերի ճշգրտման ժամանակ, եթե իրականում պարզվի, որ վարորդական իրավունք չունի կամ հաշմանդամ է տվյալ անձնավորությունը, համապատասխան արձանագրություն կկազմվի և, ըստ օրենքի, կպատժվի սպասարկող ընկերության ղեկավարությունը»,- ասել է Հենրիկ Նավասարդյանը:

Հավելենք, որ 57 համարի երթուղին սպասարկում է ՎԻ-ԱՌ ՍՊԸ-ն:

Ինչ վերաբերում է հիվանդանոց տեղափոխված քաղաքացիներին, ապա «Էրեբունի» ԲԿ մամուլի քարտուղար Շուշան Հունանյանի փոխանցմամբ՝ բժշկական կենտրոն տեղափոխված երկու քաղաքացին էլ լավ վիճակում են: Մեկը առավոտյան է դուրս գրվել:

«Նրանցից մեկի գլուխը համակարգչային տոմոգրաֆիա է արվել, որևէ անհանգստացնող բան չկար, դուրս է գրվել, մյուսը ենթարկվել է վերջույթների ռենտգեն հետազոտության»,- ասել է Շուշան Հունանյանը:

SHANTNEWS-ը փորձել է կապ հաստատել երթուղին սպասարկող ընկերության տնօրեն Ալիկ Նալբանդյանի հետ, սակայն նրա բջջայինն անհասանելի է:

Երևանի տրանսպորտային ուղեցույցում նշված է, որ թիվ 57 երթուղայինը սպասարկում է հետևյալ ուղղությունը՝ Դավթաշենի 1-ին թաղ. (սկ. կ.) – Աղաբաբյան – Տ. Պետրոսյան – Սասնա Ծռերի փող-ներ – Եղվարդի խճ. – Հալաբյան – Մարգարյան – Բաշինջաղյան – Ջանիբեկյան – Գ. Հասրաթյան – Սեբաստիայի փող-ներ – Բագրատունյաց պող. – Թամանցիների փող. – Արտաշատի խճ. – Նորագավիթ – գ. Այնթափ – Պոլիվինիլացետատի այգեգործական տարածքներ – Զոնալ կայան (վերջ. կ.):
Հետադարձը` նույն ուղեգծով: