Արթուր Մարտիրոսյանը մասնակցել է «42 Երևան» ծրագրավորման միջազգային դպրոցի շրջանավարտների ավարտական միջոցառմանը

ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը «Թումո» ստեղծարար տեխնոլոգիաների կենտրոնում մասնակցել է «42 Երևան» ծրագրավորման միջազգային դպրոցի շրջանավարտների ավարտական միջոցառմանը:

Դասընթացը հաջողությամբ ավարտել է 71 շրջանավարտ, որոնց ավելի քան 85 տոկոսն արդեն աշխատում է ՏՏ ոլորտի տարբեր ընկերություններում: Շրջանավարտներն անցել են նախագծերի վրա հիմնված բարդ ուսումնական ծրագիր՝ կատարելագործելով ծրագրավորման հմտությունները և զարգացնելով նորարարական մտածելակերպ։

Ողջունելով շրջանավարտներին և շնորհավորելով կրթական ծրագիրը հաջողությամբ ավարտելու առթիվ՝ նախարարի տեղակալն ընդգծել է` ՏՏ ոլորտում մրցունակ մասնագետների գործունեությունը նպաստում է Հայաստանի տեխնոլոգիական առաջընթացին։

Արթուր Մարտիրոսյանն անդրադարձել է նաև «ԵՄ-ն հանուն նորարարության» դրամաշնորհային ծրագրին, որի կարևոր բաղադրիչներից է ԵՄ Թումո ինժեներական և կիրառական գիտությունների համալիրը. վերջինս նախագծված է համալսարանի ուսանողների և երիտասարդ մասնագետների համար: Որպես կրթության, հետազոտությունների և ստարտափների հանգույց` համալիրի նպատակն է կապ ստեղծել ոլորտի տեղական և միջազգային ներկայացուցիչների միջև, ամրապնդել Հայաստանի բարձրագույն կրթության և բիզնեսի կապը:

ԿԳՄՍ նախարարի տեղակալը հաջողություններ է մաղթել «42 Երևան» ծրագրավորման միջազգային դպրոցի շրջանավարտներին և նշել. «Սովորել սովորելու և կատարելագործվելու կարողությունն արդիական է կյանքի տարբեր փուլերում: Սա հնարավորություն է ընձեռում ակադեմիական կրթությունից զատ ձեռք բերել իրական, պահանջվող գիտելիքներ և շարունակաբար ինքնակատարելագործվել: Ընդ որում՝ այդ ինքնակատարելագործումը միայն աշխատաշուկայում ավելի պահանջված և մրցունակ լինելու համար չէ: Մարդիկ կատարելագործվում և իրենց կարողությունները զարգացնում են նաև սեփական նախասիրությունները բավարարելու, ընդհանուր զարգացվածության համար»:

Կարևորելով «42 Երևան» ծրագրավորման միջազգային դպրոցի և Թումո լաբերի գործունեությունը` Արթուր Մարտիրոսյանն ընդգծել է, որ այս նախաձեռնությունը խթանում է բարձր որակավորում ունեցող մասնագետների կատարելագործումը և նպաստում կրթություն-աշխատաշուկա կապի ամրապնդմանը:

Միջոցառմանը մասնակցել և շրջանավարտներին ավարտական վկայականներ են հանձնել նաև Հայաստանում ԵՄ պատվիրակության համագործակցության բաժնի ղեկավար Ֆրանկ Հեսը, Թումո լաբերի ղեկավար Բելլա Վասիլյանը և այլք:

Հայաստանում ԵՄ պատվիրակության համագործակցության բաժնի ղեկավար Ֆրանկ Հեսը ողջունել է շրջանավարտներին և հետագա հաջողություններ մաղթել նրանց: Ֆրանկ Հեսն ընդգծել է՝ ԵՄ-ն ուրախ է աջակցել Հայաստանի կրթության բարեփոխումներին: Նա կարևորել է նաև ոչ ֆորմալ կրթության զարգացումը, որի լավագույն օրինակներից է «Թումո» ստեղծարար տեխնոլոգիաների կենտրոնը:

«42 Երևանը» ծրագրավորման անվճար դպրոց է, որի նպատակն է կրթել ոլորտի ապագա մասնագետներին: Եվրոպական միության կողմից ֆինանսավորվող ԵՄ Թումո ինժեներական և կիրառական գիտությունների գլխավոր նախագծերից մեկի` Թումո լաբորատորիաների մաս կազմող կենտրոնն իր տեղն է գտել ֆրանսիական առաջատար 42 ծրագրավորման դպրոցների ցանցում, որում արդեն իսկ ընդգրկված են Սեուլի, Ռիո դե Ժանեյրոյի, Մոսկվայի, Ամստերդամի և աշխարհի 26 այլ քաղաքների ծրագրավորման կենտրոններ: Երևանը ծրագրին միացել է 2020 թվականին՝ աշխատաշուկայի համար ՏՏ ոլորտի բարձրակարգ մասնագետներ ապահովելու առաքելությամբ: Կենտրոնը բաց է օրը 24 ժամ՝ շաբաթը 7 օր, իսկ ուսուցման ծրագրի ժամանակացույցը կազմվում է սովորողի ընտրությամբ: