Հակառուսական ու հակահայկական տրամադրվածությունը հայկական և ռուսական ԶԼՄ-ներում նվազել է. փորձագետ

«Ժողովրդի ձայնը» հասարակական ակումբը «Հայ-ռուսական հարաբերությունները երկու երկրների ԶԼՄ-ների տեսանկյունից՝ Հայաստանում տեղի ունեցած Թավշյա հեղափոխությունից հետո» թեմայով մոնիտորին է անցկացրել, որի արդյունքները այսօր հրավիրած մամուլի ասուլիսում կազմակերպության փորձագետ Արման Ղուկասյանը ներկայացրել է լրատվամիջոցներին:

Փորձագետի տեղեկացմամբ՝ հիմնականում ուսումնասիրվել ու դիտարկման են ենթարկվել երկու երկրների առաջատար էլեկտրոնային լրատվամիջոցները, որոնք 2018 թվականի հունիս-օգոստոս ամիսներին տարբեր առիթներով անդրադարձել են հայ ռուսական հարաբերություններին:

Ի դեպ, նման դիտարկում կազմակերպությունն անցկացրել է նաև 2017 թվականի հունիս-օգոստոս ամիսներին, քանի որ այն ժամանակ այդ նույն ամիսներին Հայաստանում ակտիվորեն շրջանառվում էր ԵԱՏՄ-ից դուրս գալու վերաբերյալ հարցը:

Հիշեցնենք, որ նույնիսկ խնդիրը ԱԺ «Ելք» խմբակցության նախաձեռնությամբ քննարկման առարկա դարձավ նաև խորհրդարանում:

Փորձագիտական խումբը համեմատական վերլուծության է ենթարկելով երկու տարիների ցուցանիշները և եկել այն եզրահանգման, որ ի տարբերություն նախորդ տարվա, այս տարի թե՛ ռուսական, թե՛ հայկական լրատվամիջոցներում երկու երկրների փոխհարաբերությունների վերաբերյալ արձագանքները եղել են առավել օբյեկտիվ:

Փորձագիտական խմբի դիտարկմամբ՝ նախորդ տարվա համեմատ այս տարի հայկական էլեկտրոնային լրատվամիջոցների նյութերում մոտ 70 տոկոսով նվազել է հակառուսական բնույթի արձագանքները, իսկ ռուսական լրատվամիջոցներն էլ առավել օբյեկտիվ են արձագանքում Հայաստանում տեղի ունեցող իրադարձություններին:

«Թե՛ հայկական, թե՛ ռուսական ԶԼՄ-ներում չի նկատվում ծայրահեղական տեղեկատվություն: Եթե անցած տարի այդ ծայրահեղականությունը կար թե՛ հայկական, թե՛ որոշ ռուսական ԶԼՄ-ներում»,- նշել է Արման Ղուկասյանը:

Նրա պնդմամբ՝ թեև այս օրերին խոսվում է, որ հայ-ռուսական հարաբերություններում կա լարվածություն, իսկ նախկին իշխանությունների ժամանակ նմանօրինակ լարվածություն չկար, սակայն դիտարկման արդյունքները տրամագծորեն հակառակն են ապացուցում:

«Մեր երկու երկրների ԶԼՄ-ներում կա ավելի օբեկտիվ տեղեկատվություն երկու երկրների հարաբերությունների վերաբերյալ, ավելի շատ հարցեր են բարձրացվում, որոնք բխում են մեր երկու  երկրների իրական շահերից»,- նշել է փորձագետը՝  ավելացնելով, որ դա արդյունք է նրա, որ Հայաստանի իշխանությունները ի սկզբանե բարձրացրեցին կոնկրետ հստակ խնդիրներ, և եթե օրինակ՝ նույն Խաչատուրովի դեպքի ժամանակ ռուսական մամուլում փորձագիտական սուր գնահատականներ հնչեցին, ապա Փաշինյան-Պուտին հանդիպումից հետո այդ լարվածությունը ԶԼՄ տիրույթում կտրուկ նվազեց: