Ադամանդագործությունից մինչև ՏՏ. Բելգիան հետաքրքրված է հայաստանյան ներդրումներով

Պաշտոնական վիճակագրությամբ` այսօր Բելգիայում ապրում է մոտ 25 հազար հայ, ոչ պաշտոնական տվյալներով՝ 35 հազար։ Բելգիահայ համայնքը կազմավորվել է 20-րդ դարի  20-ականներին: 1970-ականներին հայերի մեծ հոսք է սկսվել Սիրիայից, Լիբանանից, Թուրքիայից, Իրանից, 1990 թվականից այս կողմ էլ` Հայաստանից:

Բելգիան ՀՀ անկախությունը ճանաչել է 1991 թվականի դեկտեմբերի 31-ին: Երկու երկրների միջև դիվանագիտական հարաբերությունները հաստատվել են 1992թ. մարտի 10-ին: 1998 թվականին էլ Բելգիայի Սենատն ընդունել է Հայոց ցեղասպանության ճանաչման բանաձևը:

Քաղաքական ոլորտից զատ, Հայաստանն ու Բելգիան նաև առևտրատնտեսական զարգացող կապեր ունեն: Դրանց, ըստ կանխատեսումների, նոր թափ կհաղորդվի Ֆրանկոֆոնիայի տնտեսական համաժողովից հետո: Սա մի հարթակ էր, որտեղ հայերն ու բելգիացիները կարող էին ավելի լավ ծանոթանալ միմյանց շուկայական պահանջներին ու գործակցության նոր եզրեր գտնել:

Shantnews.am-ի հետ զրույցում Հայ-բելգիական առևտրի պալատի նախագահ Վալերի Սաֆարյանը պատմեց՝ Բելգիայում հետաքրքրված են հայաստանյան ներդրումներով:

«Հայաստանի տնտեսության առաջմղիչ ուժը տեղեկատվական տեխնոլոգիաներն են: Սա այն ոլորտն է, որտեղ Բելգիան մեծ ներդրումներ է կատարում և համագործակցում: Առաջին ոլորտը, որտեղ համագործակցում են Բելգիան և Հայաստանը, մնում է ադամանդագործությունը: Բելգիայում կա մի քաղաք, կոչվում է Անվերս, այդ գործակցության առումով այս քաղաքը մեծ դերակատարում ունի: Բայց Հայաստանը հետաքրքրում է նաև որպես գյուղատնտեսական երկիր: Հայաստանից Բելգիա են արտահանում գինի և կոնյակ»,- ասաց նա:

Վալերի Սաֆարյանը ծնվել ու մեծացել է Բելգիայում: Մայրը բելգիացի է, հայրը՝ հայ: Մեզ հետ զրույցում խոստովանեց՝ հայ-բելգիական առևտրային կապերը խթանելուց զատ, մի այլ առաքելություն էլ ունի՝ վարժ խոսել հայերեն:

Հայ-բելգիական առևտրատնտեսական կապերից մեծ ակնկալիքներ ունի նաև «Վալոնի-Բրյուսել Ինտերնասիոնալ» կազմակերպության գլխավոր քարտուղար Պասկալ Դելկոմինետը: Shantnews.am-ի հետ զրույցում նախ պատմեց՝ առաջին անգամ Հայաստան է եկել 3 տարի առաջ: Զարմացել է՝ Երևանը դինամիկ զարգացող քաղաք է:

«Երբ ժամանում ես Հայաստան, առաջին բանը, որ հայտնաբերում ես, ծայրահեղ սիրալիրությունն է, քաղաքավարությունը: Ինձ զարմացրեց նաև Երևանի արագ զարգացումը, սա հիանալի քաղաք է: Այստեղ երիտասարդները շատ ակտիվ են, բացի դրանից՝ ժողովրդավարական այս փոփոխություններն օրինակ են աշխարհի շատ երկրների համար»,- ասաց նա:

Պասկալ Դելկոմինետի խոսքերով՝ իրենք հետաքրքրված են ամրացնել և ուժեղացնել Բելգիայի և Հայաստանի միջև առևտրատնտեսական կապերը:

«Պետք է գոհունակությամբ նշեմ, որ վերջին շրջանում Բելգիայից  Հայաստան արտահանումը զգալիորեն ավելացել է, խոսքն առավելապես վերաբերում է քիմիա-դեղագործական ոլորտին: Իհարկե, շատ անելիքներ կան, որովհետև հայ գործարարները լավ չեն ճանաչում Վալոնի-Բրյուսելի շուկան, և հակառակը, բելգիացիները լավ չեն ճանաչում հայկական շուկան»,-ասաց Պասկալ Դելկոմինետը:

Ավելի վաղ՝ 2018 թվականի հուլիսին, երբ ՀՀ վարչապետ Նիկոլ Փաշինյանը մեկնել էր Բելգիա, հանդիպել էր հայազգի գործարարների հետ, որոնք գործունեություն են ծավալում ադամանդագործության և այլ ոլորտներում: Հանդիպմանը ներկա էր եղել նաև Հայ-բելգիական առևտրի պալատի նախագահ Վալերի Սաֆարյանը: Վարչապետը ներկայացրել էր տնտեսության ոլորտում կառավարության առաջնահերթությունները, անդրադարձել բիզնես միջավայրի բարելավմանը միտված քայլերին, որոնք գործադիրը նախատեսում է կյանքի կոչել առաջիկայում: Նիկոլ Փաշինյանը կարևորել էր հայ-բելգիական բիզնես կապերի շարունակական զարգացումը և ընդգծել, որ ՀՀ կառավարությունը շահագրգռված է երկու երկրների միջև առեւտրաշրջանառության ծավալների աճով, համատեղ ներդրումային ծրագրերի իրականացմամբ: