Արհեստական ինտելեկտ, որը մեկ հպումով անիմացիոն հոլովակի է վերածում տեքստային սցենարը

Հայաստանյան վիդեո և անիմացիա ստեղծող Renderforest ստարտափ ընկերությունը ստեղծել է նոր ծառայություն, որով հնարավոր է արհեստական ինտելեկտի միջոցով մի քանի հպումով ստեղծել անիմացիոն հոլովակ: Այդ նորարարությունը ընկերությունը ներկայացրել է ՏՏ ոլորտի համաշխարհային հայտնության Web Summit-ին:

Մոտ մեկ շաբաթ առաջ Պորտուգալիայի մայրաքաղաք Լիսաբոնում կայացել է ՏՏ ոլորտի սպասված իրադարձություններից մեկը՝ Web Summit-ը, որին մասնակցել են աշխարհում հայտնի ՏՏ կազմակերպություններ ու նորահայտ տասնյակ ստարտափ ընկերություններ: Web Summit-ը լայն հնարավորություններ է ստեղծում ընկերությունների համար նոր ներդրողներ գտնելու և զարգացնելու համար: Մասնակից երկրներն ու առանձին կազմակերպություններն ունեցել են տաղավարներ և ներկայացրել իրենց ստեղծած նորարարական ծրագրերը:

Նշենք, որ Հայաստանից նույնպես գագաթնաժողովին մասնակցել են մի շարք ՏՏ ընկերություններ:

SHANTNEWS.am-ի հետ զրույցում ՏՏ գագաթնաժողովին մասնակցած Renderforest ընկերության մարքեթինգային թիմի ղեկավար Ռոման Դանեղյանը պատմեց, որ գագաթնաժողովը տևել է 4 օր և դրան մասնակցել է մոտ 75 հազար մարդ: Հայաստանից Web Summit-ին մասնակցող ընկերությունները ներկայացրել են տարբեր հետաքրքիր ստարտափներ կրիպտոոլորտում և բլոկչեյնի ոլորտում, ինչպես նաև մարքեթինգային օնլայն հարթակներ:

Ռոմանը պատմեց, որ Web Summit 2018-ին իրենց ընկերությունը ներկայացրել է արհեստական ինտելեկտով և մեքենայական ուսուցման վրա հիմնված նոր ծառայություն:

«Այդ նոր ծառայության միջոցով մարդիկ կարող են ծրագրում գրել իրենց վիդեոյի սցենարը և անմիջապես ստանալ անիմացիոն հոլովակ: Իրականում այդ նորարարությունն աշխարհում միակն է ու դեռևս չկա մեկ այլ նման ընկերություն, որը նման հնարավորություն թողարկած լինի: Web Summit 2018-ին այն շատ լավ ընդունվեց և շատ ընկերությունների զարմացրեց ու հետաքրքրեց մեր նոր ծառայությունը: Ծրագրում արհեստական ինտելեկտով և մեքենայական ուսուցման վրա հիմնված նոր ծառայությունը ստեղծելիս առաջնորդվել ենք այն գաղափարով, որ հիմա մարդկանց ժամանակը գնալով ավելի է արժևորվում և մենք մտածեցինք, որ ծրագրում նմանատիպ գործառույթ մտցնելն էլ ավելի կարագացնի վիդեոստեղծումը»,- պատմեց Ռոման Դանեղյանը:

Ներկայացնենք ՏՏ ոլորտի խոշորագույն իրադարձությանը Հայաստանի և տարածաշրջանի երկրների մասնակցության առումով հետևյալ վիճակագրությունը.

Հայաստան – բնակչ. 3 մլն, Web Summit-ին մասնակցել է 9 կազմակերպություն,
Ռուսաստան – բնակչ. 136 մլն, 40 կազմակերպություն,
Վրաստան – բնակչ. 5 մլն, 1 կազմակերպություն,
Ադրբեջան – բնակչ. 10 մլն, 0 կազմակերպություն,
Թուրքիա – բնակչ. 80 մլն, 5 կազմակերպություն,
Իրան – բնակչ. 81 մլն, 1 կազմակերպություն,
Բելառուս – բնակչ. 9 մլն, 4 կազմակերպություն,
Ուկրաինա – բնակչ. 45 մլն, 40 կազմակերպություն:

Մանրամասները՝ տեսանյութում: