«Լուսավոր Հայաստան» կուսակցությունը մեկնարկել է նախընտրական դրամահավաքը

ԱԺ արտահերթ ընտրություններին մասնակցելու հայտ ներկայացրած «Լուսավոր Հայաստան» կուսակցությունն այսօր՝ նոյեմբերի 18-ի երեկոյան, տարածքային և համամասնական ցուցակներով առաջադրված թեկնածուների մասնակցությամբ միջոցառում է անցկացրել, որի ժամանակ տրվել է դրամահավաքի մեկնարկը՝ նախընտրական ծախսերն իրականացնելու համար:

Միջոցառման մեկնարկին ցուցադրվել է կուսակցության անցած ուղու վերաբերյալ ֆիլմ, որի ավարտից հետո կուսակցության ղեկավար Էդմոն Մարուքյանը տեղեկացրել է, որ այդ ֆիլմը պատրաստվել էր դեռևս ապրիլին՝ կուսակցության համագումարում ցուցադրելու համար: Ազգային ժողովի արտահերթ ընտրությունների համար կուսակցությունը նոր ֆիլմ է պատվիրել, որը նախատեսվում է ցուցադրել քարոզարշավի ընթացքում:

Էդմոն Մարուքյանի ներկայացմամբ՝ «Լուսավոր Հայաստան» կուսակցության կազմն անցած երկու տարիների ընթացքում առավել մեծացել է, ու կուսակցության շարքերը համալրվել են տարբեր ոլորտներ ներկայացնող ու իրենց բնագավառում հաջողություններ արձանագրած որակյալ մասնագետներ, ինչի արդյունքում իրենց թիմն էլ ավելի է հզորացել:

Պարզաբանելով այսօր կազմակերպած միջոցառման նպատակը՝ Էդմոն Մարուքյանը պատմել է, որ դեռ նոր էին սկսում կուսակցական գործունեությունը, շատերը իրենց հարց էին տալիս, թե ո՞վ է ֆինանսավորում կուսակցությունը, կամ գումարներ որտեղի՞ց են հայթայթում:

«Իրապես, երբ որ հիմնադրում էինք կուսակցությունը, իմ մոտ կար տպավորություն, որ միայն մեր փողն է կասկածի տակ, բոլորի փողը լեգիտիմ է, բայց որ մենք ստեղծել էինք, ասում էին բա ձեզ որտեղի՞ց: Ասում եմ՝ էն մյուսների փողերի տեղը գիտե՞ք, մերի տեղը կիմանաք, որովետև մենք կլինենք թափանցիկ: Ասում էին, բա էդ ո՞նց եք անելու, որ թափանցիկ եք լինելու, ասում էի մեթոդներ կան՝ ամբողջ աշխարհում հայտնի, փորձված, դրանք են այ այսպիսի դրամահավաք երեկոները, ճաշերը, ֆուրշետները կամ տարբեր առիթներով դրամահավաքները, որ մենք իրականացրել ենք»,- հավաքի մասնակիցներին պատմել է Մարուքյանը՝ միաժամանակ ավելացնելով, որ նման դրամահավաքներ արդեն մոտ 20 անգամ տարբեր առիթներով իրականացրել են ու բավականին լավ արդյունքներ են ունեցել:

Այսօր կազմակերպվող դրամահավաքի նպատակը, ըստ Մարուքյանի, սպասվող խորհրդարանական արտահերթ ընտրությունները ֆինանսավորելն է: Հավաքված միջոցները կուսակցությունը պատրաստվում է ծախսել ավելի բարձր մակարդակով արդյունավետ  քարոզարշավ իրականացնելու համար:

«Միշտ ասել եմ՝ մեր ծախսած մեկ միլիոն դրամը 10 միլիոն դրամի էֆեկտ է տալիս, այսինքն՝ միշտ մարդիկ զարմացել են, թե ինչ փոքր գումարներով ինչ ազդեցություն ենք ունեցել, թե՛ լիբերալ դպրոցում, թե՛ ՏԻՄ ընտրություններում, թե՛ համապետական ընտրություններում»,- նշել է Մարուքյանն ու միջոցառման մասնակիցներին կուսակցությանը աջակցելու ու ներդրում անելու կոչ արել՝ համոզմունք հայտնելով, որ այսօր «Լուսավոր Հայաստան» կուսակցության քարոզարշավը ֆինանսավորելու համար կատարված ներդրումը, ըստ էության, ներդրում է Հայաստանի ապագայի մեջ:

Մարուքյանը վստահ է, որ խորհրդարանական ընտրությունների արդյունքներից է կախված, թե ինչպիսի Հայաստան կունենանք մենք վաղը: Ըստ նրա՝ եթե խորհրդարանում լինեն մեկը մյուսի գաղափարներին հակադրվող ուժեր, ապա հնարավոր կլինի Հայաստանի քաղաքական դաշտը տանել առողջացման, քանի որ այն խնդիրները, որոնք գոյություն ունեն այսօր Հայաստանում, Մարուքյանի համոզմամբ՝ հիվանդ քաղաքական համակարգի պտուղներն են:

Էդմոն Մարուքյանը համոզված հայտարարել է, որ իրենց ուժը հզոր քաղաքական աջակցություն կստանա ընտրողների կողմից ու շատ լուրջ արդյունքներ կարձանագրի:

Դրամահավաքին ելույթներ են ունեցել նաև «Լուսավոր Հայաստան» կուսակցության համամասնական ու տարածքային ընտրացուցակներով առաջադրված թեկնածուները: Միջոցառման պաշտոնական մասի ավարտից հետո պատգամավորության թեկնածուներն ու հյուրերը դրամ են նվիրաբերել կուսակցությանը՝ յուրաքանչյուրն ըստ իր ցանկության ու հնարավորությունների: