«Հյուրիեթ»-ը մեջբերումներ է հրապարակել սաուդցի լրագրողի սպանության պահը ֆիքսած ձայնագրություններից

Թուրքական «Հյուրիեթ» պարբերականը մեջբերումներ է հրապարակել լրագրողի սպանության պահը ֆիքսած ձայնագրություններից՝ առաջին անգամ հատվածներ հրապարակելով հենց Խաշըգջիի խոսքից:

Առաջին ձայնագրության համաձայն՝ Խաշըգջիին բռնել են այն պահին, երբ նա մտել է վիզաների բաժանմունք: Դա պայմանականորեն անվանել են Ա բաժին:

«Բա՛ց թողեք ձեռքս: Ի՞նչ եք դուք ձեզ թույլ տալիս»,- լսելի է լրագրողի ձայնը:

Ձայնագրությունում լսելի են միմյանց հետ վիճաբանող Խաշըգջիի և 4 այլ անձանց ձայներ:

Դրանից հետո այդ վայրից Խաշըգջին մեկ այլ՝ պայմանականորեն Բ բաժանմունք է տեղափոխվել: Իսկ այստեղ արված ձայնագրությունում արդեն լսելի են ոչ միայն վիճաբանության ձայները, այլև ֆիզիկական պայքարը, ծեծի ու կտտանքների մասին վկայող աղմուկ:

Այդ ձայնագրությունում թուրք իրավապահներն առանձնացրել են սաուդական հետախուզության գնդապետ Մահեր Աբդուլազիզ Մութրեբի ձայնը, որը պարբերաբար ուղեկցել էր Սաուդյան Արաբիայի գահաժառանգ արքայազն Մուհամեդ բին Սալմանին:

«Դավաճա՛ն: Դու պատասխանատվության կենթարկվես»,- ասում է Մաթրեբը:

Նրա ձայնը լսելի է նաև հյուպատոսարանի մեկ այլ բաժանմունքից արված հեռախոսային 19 զանգում: Դրանցից մեկը, որը տևել է 13 րոպե, արվել է այն ժամանակ, երբ Խաշըգջին մտել է հյուպատոսարան: Մաթրեբը խոսել է Մուհամեդ արքայազնի մերձավորներից մեկի հետ:

Ծեծի ու կտտանքների ձայները շարունակվում են 11 րոպե: Դրանից հետո 1 ժամ 15 րոպե լռություն է տիրում: Թուրք իրավապահները կարծում են, որ այդ ժամանակ սաուդցիները հաճախականությունների հետ ինչ-որ բան են արել: Այնուհետ լսելի են ներքև իջնող սաուդցի պաշտոնյաների ոտնաձայները, ապա ինչ-որ մեկը մինչև կոշտ սկավառակի հանելը ջնջում է տեսախցիկների նկարահանումները:

Ըստ թերթի՝ ձայնագրության մեջ ուշադրություն է գրավում մեկ այլ բան: Սպանությունից 20 րոպե հետո Թուրքիա ժամանած խմբի անդամներից մեկին հագցրել են Խաշըգջիի հագուստը, որով նա դուրս է եկել հյուպատոսության տարածքից:

«Սարսափելի է հագնել այն մարդու հագուստը, որին մենք սպանել ենք 20 րոպե առաջ»,- արտասանել է նա՝ բողոքելով, որ կոշիկներն իր համար փոքր են: Նրան թույլ է տրվել իր կոշիկներով դուրս գալ:

Այնուհետև տեսահսկման խցիկներում երևում է հենց նա: Ապա նաև, ըստ հետաքննության, նրան տեսել են Ստամբուլի զբոսաշրջային թաղամասերում:

Չկան տեսագրություններ այն մասից, որտեղ Խաշըգջիին մասնատել են, բայց նկատելի է, որ այդ սպանությունից հետո երեք սենյակների պատերը ներկվել են, բացի դրանից՝ նաև քիմիական նյութերի հետքեր ու սպանության մեջ կասկածվողի մատնահետքերն են հայտնաբերել:

Հիշեցնենք, որ սաուդցի ընդդիմադիր լրագրողը հյուպատոսություն էր ժամանել հոկտեմբերի 2-ին, իսկ օրեր անց Սաուդյան Արաբիայի իշխանությունները հաստատել են վերջինիս սպանության փաստը, սակայն հերքել են գահաժառանգ արքայազնի մեղավորությունը: