«Բազե՝ առանց թևերի» կամ «նախագահ-վետո»․ Ինչպե՞ս կհիշի Վրաստանը չորրորդ նախագահ Գեորգի Մարգվելաշվիլին

Վրաստանի չորրորդ նախագահ Գեորգի Մարգվելաշվիլիի պաշտոնավարման ժամկետի ավարտին մնացել են հաշված օրեր: Արդեն դեկտեմբերի 16-ին Վրաստանը կունենա առաջին կին նախագահը։Սալոմե Զուրաբիշվիլին իր բնավորությամբ ու խարիզմայով Մարգվելաշվիլիի ճիշտ հակապատկերն է:

«Sputnik Грузия»-ի առաջարկով վրացի փորձագետները գնահատել են  Գեորգի Մարգվելաշվիլիի նախագահության 5 տարիների գործունեությունը՝ որպես քաղաքական գործիչ, գլխավոր հրամանատար և վերջապես՝ որպես սովորական մարդ:

Խոսելով  Մարգվելաշվիլի նախագահ-քաղաքական գործչի մասին՝ փորձագետ Ռամազ Սակվարելիձեն ասել է. «Ամենայն հավանականությամբ, Մարգվելաշվիլին կհիշվի խորհրդարանական նախաձեռնություններին դրած իր  բազմաթիվ վետոներով և իշխող կոսակցության հետ առճակատմամբ: Դա այնքան հաճախ էր տեղի ունենում, որ նրան սկսեցին կոչել նախագահ-վետո: Թեև նրա բոլոր վետոները քաղաքականապես հիմնավորված էին, և դա զուտ քմահաճույք չէր նրա կողմից»:

Փորձագետը համոզված է, որ «Մարգվելաշվիլին հասկանում էր, որ բոլոր վետոներն անպայման կհաղթահարվեն: Հիշում եմ, երբ հերթական վետոյից հետո հայտարարեց, թե համոզված է, որ այն կհաղթահարեն, սակայն ինքը դա անում է իր քաղաքական դիրքորոշումն արտահայտելու համար»:

Իսկ առճակատումն իշխող կուսակցության հետ, ըստ փորձագետի, կապված էր Մարգվելաշվիլիի՝ Հավլաբարի նախագահական նստավայր տեղափոխվելու հետ, թեև նախապես պայմանավորվածություն կար, որ Սաակաշվիլիի կառուցած շենքը որպես այդպիսին չի օգտագործվելու: Սակայն Մարգվելաշվիլին այլ կերպ վարվեց՝ դրանով իսկ հարուցելով իր հետ մտերիմ հարաբերություն ունեցող Իվանիշվիլիի և մյուս թիմակիցների սուր քննադատությունը:

«Որպես բարձրագույն հրամանատար՝ Մարգվելաշվիլին իրեն ոչ մի կերպ չի դրսևորել: Ընդհանրապես Վրաստանի ԶՈւ-ն ունե՞ր արդյոք գլխավոր հրամանատար: Սա մինչև հիմա մնում է հռետորական հարց: Բայց, գիտե՞ք, ոչ մի կերպն էլ առաջընթաց է: Լավ բան չի արել, բայց վատն էլ չի արել»,- ասել է փորձագետ Վախթանգ Մայիսայան:

Հեռացող նախագահին բացառիկ բարձր գնահատական է տվել վերլուծաբան Սոսո Ցինցաձեն: Փորձագետը համոզված է, որ եթե Մարգվելաշվիլին լիակատար լիազորություն ունենար, ինչպես իր նախորդը՝ Միխեիլ Սաակաշվիլին, նրա ձեռքբերումները շատ ավելի տպավորիչ կլինեին:

«Ի՞նչ կարող էր անել Մարգվելաշվիլին: Չէ՞ որ նա բազե էր առանց թևերի: Եթե նա նախագահի կարգավիճակով ունենար բոլոր իրավունքները, ինչպես, օրինակ, Սաակաշվիլին, այդ դեպքում ես նրա մասին կկարողանայի խոսել շատ  երկար: Նա նախագահ էր, որին պարբերաբար նվաստացնում էին նրա նախկին համախոհները, կուսակիցներն ու ընդդիմությունը: Եթե նա ունենար լայն իրավունքներ, ապա ավելի լավ կհիշվեր»,- հայտարարել է Ցինցաձեն:

Իսկ ինքը՝ Մարգվելաշվիլին, էությամբ հանգիստ մարդ է, ով նախագահության 5 տարիների ընթացքում գերադասեց բնակվել Թբիլիսիից հեռու՝ Դուշեթիի սեփական տանը, զբաղվել հողագործությամբ: Իր հողամասում նույնիսկ բերք էր ստացել Բելառուսի նախագահ Ալեքսանդր Լուկաշենկոյից նվեր ստացած կարտոֆիլի սերմից: Սիրում է կենդանիներ: Վերջին տարիներին էլ ամուսնացել է աղջկա ընկերուհու մոր հետ և դարձել 2 զավակների հայր: