Ամենօրյա կապի մեջ ենք իշխանության ներկայացուցիչների և ուժային կառույցների հետ. Ղազախստանում ՀՀ արտակարգ և լիազոր դեսպանը պարզաբանումներ է տվել SHANTNEWS.am-ին

Ղազախստանում Հայաստանի Հանրապետության արտակարգ և լիազոր դեսպան Գագիկ Ղալաչյանը SHANTNEWS.am-ի հետ զրույցում, անդրադառնալով Կարագանդայում տեղի ունեցած միջադեպին ու դրա հետևանքով ստեղծված իրավիճակին, նշեց, որ կատարվածն ազգամիջյան երանգ ստացավ տարբեր սոցկայքերի ու ԶԼՄ-ների պատճառով:

«Ինքը` վիճաբանությունը, եղել է կենցաղային, որի հետևանքով, ցավոք, մարդիկ են տուժել: Վիճաբանությանը մասնակցել են տարբեր ազգերի ներկայացուցիչներ, դա չի եղել հայ-ղազախական բախում, նման բան չկա, դա եղել է կենցաղային հողի վրա, ռեստորանում գիշերվա կեսին տեղի ունեցած վիճաբանություն, մարդիկ, գլուխները տաքացած, վիճաբանության են բռնվել, և տեղի է ունեցել այն, ինչ տեղի է ունեցել:

Ցավոք, մեկ մարդ կյանքից է զրկվել: Այս դեպքով հարուցված երկու քրեական գործ կա, մեկը կապված է կոնկրետ այդ վիճաբանության, ծեծկռտուքի ու սպանության հետ, մյուսն ավելի ուշ է հարուցվել` ազգամիջյան թշնամանքի հրահրման և այլնի համար. երկրորդ քրեական գործն արդեն հետագա իրադարձությունների առթիվ է հարուցվել ղազախական իշխանությունների կողմից»,- ասաց նա:

Ղալաչյանը հայտնեց, որ քրեական հետապնդման են ենթարկվում նաև այն անձինք, որոնք հրահրում են ազգամիջյան ատելություն կամ նման դրսևորումներ: Դեսպանը նշեց, որ հիմնականում ԶԼՄ-ները հղում են անում չստուգված աղբյուրների, ժամկետները խառնում են, մի բան, որ արդեն եղել, պրծել է, ներկայացնում են որպես նոր դեպք կամ հին, այս իրավիճակի հետ կապ չունեցող տեսանյութեր են դնում, ցույց են տալիս, թե իբր` տեսեք, հայերին ծեծել են, ինչ են արել, մինչդեռ իրականում այդ տեսանյութում անգամ հայեր չեն, դա այլ ժամանակ է տեղի ունեցել, այլ պայմաններում, այլ ազգի ներկայացուցիչների հետ:

Սրանք, ըստ Ղալաչյանի, կա’մ հատուկ ինչ-որ հատուկ նպատակ է հետապնդում, կա’մ պարզապես լսարանն ընդլայնելու համար գործողություններ են, որոնք հանգեցնում են այսպիսի անցանկալի հետևանքների:

«Ղազախստանի իշխանության ներկայացուցիչների, նաև ուժային կառույցների հետ սերտ, ամենօրյա կապի մեջ ենք և՛ դեսպանությունը, և՛ համայնքի կառույցների ղեկավարությունը, և՛ մեր համապատասխան ծառայություններն իրենց գործընկերների հետ այստեղ` Ղազախստանում: Մենք ղազախական կողմից ունենք վստահեցում, որ իրավիճակը վերահսկվում է, ունենք վստահեցում, որ հայկական բնակչությանը որևէ լուրջ վտանգ չի կարող սպառնալ, ցանկացած նման դրսևորում շատ արագ արձագանք է ստանում ուժային կառույցների կողմից և հայերին պատկանող օբյեկտներն ու ունեցվածքը ուժեղացված պահպանության տակ են տեղի կառույցների կողմից: Այլ հարց է, որ կան հրահրողներ, որոնք փորձում են օգտվել իրավիճակից, իրենց շահերը հետապնդում: Նախ՝ դրանք փոքրաթիվ են, երկրորդը, քանի որ հարուցվել է քրգործ, բոլոր նման դրսևորումները ևս հետապնդվելու են օրենքի ուժով: Սա այն վստահեցումն է, որ մենք ստացել ենք ղազախական իշխանությունների կողմից»,- նշեց Ղալաչյանը:

Դեսպանի խոսքերով` հայ համայնքը հասկանալիորեն որոշ չափով անհանգստացած է, սակայն դեսպանությունն էլ իր հերթին է փորձում ամեն ինչ անել, որ բոլոր խնդիրները բարենպաստ լուծում ստանան: Նա տեղեկացրեց` մարդիկ կան, որոնք ցանկանում են մեկնել երկրից, իրենք նրանց կօգնեն, կան նաև մարդիկ, ովքեր չեն ցանկանում մեկնել, ուզում են մնալ, շարունակել իրենց աշխատանքն ու ապրուստը այնտեղ, նրանց ևս դեսպանությունը կօգնի, որովհետև մի մասը ՀՀ քաղաքացիներ են, իսկ մեծ մասը Ղազախստանի քաղաքացիներ են:

«Ղազախական կողմը շփումների մեջ անընդհատ մեզ ասում է այն մասին, որ վերաբերվում է այդ մարդկանց, որպես իրենց քաղաքացիների, որ նրանք Ղազախստանի մի մասը: Սա բազմազգ պետություն է, 130-ից ավելի ազգություն է բնակվում Ղազախստանում: Այստեղ նման դրսևորումներն անընդունելի են, ու հրահրողներն անպայման պատիժ կկրեն»,- նշեց նա:

Մանրամասները՝ հեռախոսազրույցում: