Զինծառայողներին բնակարան գնելու հիփոթեք կտրամադրվի փաստացի 0-3 տոկոսով․ նախագիծ

Հայաստանի Հանրապետության պաշտպանության նախարարությունը հրապարակել է կառավարության որոշման նախագիծ, որով սահմանվում են «Մատչելի բնակարան զինծառա­յողին» ծրագրով զինծառայողներին տրվող հիփոթեքային պայմանները։ Ըստ դրանց՝ հիփոթեքով բնակարան գնելու դեպքում 10 տոկոս կանխավճարը վճարում է պետությունը։ Նախագիծը հրապարակվել է e-draft.am կայքում։

Առավելագույն տոկոսը, որով կարող է տրամադրվել հիփոթեքային վարկը, 7 տոկոսն է։ Ընդ որում՝ պետությունը վճարելու է դրա մի մասը, ու զինծառայողին մնալու է վճարել 4 տոկոսը։ Ավելին, եթե բնակարանը գնվի կառուցապատողից, կգործի նաև աշխատավարձից գանձվող եկամտահարկի վերադարձի մեխանիզմը, ու զինծառայողը փաստացի չի վճարի նաև այդ 4 տոկոսը։

Այս բոլոր պայմանների ապահովման դեպքում զինծառայողները կկարողանան բնակարան գնել դրա գնի 90 տոկոսով, և այդ գումարն էլ մարել 20 տարում։ Սահմանվում են նաև մեխանիզմներ, որ զինծառայողի զոհվելու դեպքում կախված հանգամանքներից՝ պետությունը կարող է իր վրա վերցնել վարկի վարման մի մասը կամ ամբողջը։

Բայց կան նաև սահմանափակումներ։ Այս ծրագրին չեն կարող մասնակցել այն զինծառայողները, որոնք երբևէ տուն են ստացել պետության կողմից, իսկ մյուսները կարող են մասնակցել միայն մեկ անգամ։ Գնվող բնակարանը պետք է լինի 28,5 միլիոն դրամ արժեքի սահմաններում (փոքր բնակմակերեսով բնակարանների համար սահմանված է ավելի ցածր գնային սահման)։ Իսկ ամեն տարի այս ծրագրին կարողանալու է մասնակցել սահմանափակ թվով զինծառայող ու այլ ուժային կառույցի ծառայող․

• Պաշտպանության նախարարության 400 զինծառայող,
• Ոստիկանության 40 զինծառայող,
• Ազգային անվտան­գության ծառայության 40 զինծառայող,
• Քրեակատա­րո­ղա­կան ծառայության 20 զինծառայող:

Դիմումները, ըստ այս նախագծի, ընդունվելու են ամեն տարվա հունվար-մարտ ամիսներին, և եթե դիմողների թիվն ավելի շատ լինի, քան տեղերի քանակը, ապա անցկացվելու է վիճակահանություն։ Փաստաթղթի հիմնավորման մեջ ասվում է․

«Օրենքը նախատեսում էր բնակարանային պայմանների բարելավման կարիք ունեցող զինծառայողներին սեփականության իրավունքով անհատույց բնակարանների կամ անհատույց պետական ֆինանսական աջակցության կամ տնամերձ հողամասի տրամադրում, օրենքի պահանջների համաձայն հաշվառման մեջ են գտնվում շուրջ 4.000 գործող և նախկին զինծառայողներ, պետության տնտեսական հնարավորությունները թույլ էին տալիս լավագույն դեպքում տարվա ընթացքում իրականացնել մինչև 100 բնակարանների կառուցման և տրամադրման գործընթաց, որի արդյունքում շահառուների թիվը տարեցտարի աճում է: Նշված համակարգն իրեն սպառել է, որի արդյունքում գործընթացը դարձել է տնտեսապես ոչ շահավետ»։

Ըստ այդմ՝ որոշվել է ներդնել այս նոր տարբերակը։

Փաստաթղթում, որ դեռ պետք է հավանության արժանանա կառավարության կողմից, ներկայացված են նաև մյուս պայմանները՝ անհրաժեշտ փաստաթղթերը, դիմելու կարգը և այլն։