Փաշինյանն անդրադարձել է կառավարության կառուցվածքի փոփոխություններին

ՀՀ վարչապետ Նիկոլ Փաշինյանը ֆեյսբուքյան ուղիղ եթերում անդրադարձել է կառավարության կառուցվածքի փոփոխությունների և պետական կառավարման արդյունավետ համակարգ ունենալուն:

Միջազգային չափանիշներով ընդունված է, որ պետական կառավարման համակարգում պետք է լինի մեկ ղեկավար յուրաքանչյուր 9-ից 11 աշխատակցի համար, մինչդեռ Հայաստանում այդ թիվը կազմում է 3.5-ից 3.6։

«Մեր պետական կառավարման համակարգում 3.5-3.6 աշխատողին մեկ ղեկավար է հասնում: Սրա արդյունքում մենք ունենք այնպիսի իրավիճակներ, երբ, օրինակ, կան բաժիններ, օղակներ, որտեղ կան ղեկավարներ, բայց չկան ենթականեր:

Սա արված է տարբեր պատճառներով․ բաժնի պետի աշխատավարձը ավելի բարձր է, տեղակալի աշխատավարձը ավելի բարձր է։ Սակայն սրանից բխում են նաև հավելյալ ծախսեր և, իհարկե, անարդյունավետություն, որովհետև պարզվում է, որ ղեկավարները ավելի շատ են, քան աշխատողները»,- ընդգծեց Փաշինյանը:

Անդրադարձավ պետական կառավարման համակարգում աշխատանքի և կադրերի որակին՝ Փաշինյանն ասաց․

«Այս իրավիճակը բերում է աշխատավարձերի անկման։ Երբ աշխատակիցների թիվը մեծ է, բերում է նաև աշխատավարձերի անկման, դրա հետևանքով` աշխատողների մոտ մոտիվացիայի նվազում: Օպտիմալացման գործընթացի կարևորագույն նպատակներից մեկը պատշաճ աշխատավարձեր ապահովելն է պետական կառավարման համակարգի աշխատողների համար: Նաև այս տեսակետից՝ խնդիրը գումար խնայելը և աշխատողներին կրճատելը չէ, որովհետև, եթե մենք 18 հազար աշխատող ունենք և ուզում ենք բոլոր աշխատողների աշխատավարձերը բարձրացնել, դրա համար պետք է օգտագործենք հսկայական դրամագլուխ՝ նախապես իմանալով, որ մեր պետական կառավարման համակարգը չունի այդքան աշխատողի կարիք, բայց մենք միևնույն էն աշխատողների աշխատավարձերը բարձրացնելու համար, որոնց կարիքը մենք ունենք, այս իրավիճակում պետք է բարձրացնենք այն աշխատողների աշխատավարձերը, որոնց կարիքը մենք չունենք»,- ասաց Փաշինյանը:

Վարչապետը սխալ է համարում պետական կառավարման համակարգին որպես աշխատատեղ նայելը:

«Ենթադրենք, պետական կառավարման համակարգում ունենք 18 հազար աշխատող և մենք ավելացնում ենք ևս 18 հազար հաստիք՝ ասելով, որ կրկնապատկել ենք աշխատատեղերը։  Դրա արդյունքում երկիրը տնտեսական և բոլոր առումներով կհայտնվի ճգնաժամի մեջ, որովհետև կառավարման համակարգը կարևորագույն կոմպոնենտ է երկրում բոլոր ոլորտներում փոփոխություն իրականացնելու համար»,- նշեց Փաշինյանը:

Վարչապետը հավելեց, որ պետական կառավարման համակարգում խնդիր է նաև պրոֆեսիոնալ կադրերի ներգրավումը, քանի որ վերջիններս հրաժարվում են աշխատել ցածր աշխատավարձով՝ ասելով, որ մասնավոր ոլորտում շատ ավելի բարձր աշխատավարձ են ստանում։