Գյումրիում վերաբաշխված բնակարանները՝ դատական վեճի առարկա նախկին ու ներկայիս տերերի միջև

Գյումրիում 1988թ. առաջ բաշխված ու 2008-2012 թվականներին վերաբաշխված բնակարանների հին ու նոր տերերը դատական քաշքշուկի մեջ են հայտնվել: Խոսքը Գյումրիի Վարդբաղ թաղամասի բազմահարկերի այն բնակարանների մասին է, որոնց տերերը դրանք լքել են, իսկ քաղաքապետարանը հատկացրել է անօթևան այլ ընտանիքների:

Քաղաքապետարանի վերաբաշխման որոշումը հետո պարզվել է, որ առ ոչինչ է հին տերերի սեփականության վկայականների դեմ: Հիմա բազմաթիվ բնակարանների նախկին տերերը հայտնվել են ու իրենց տները պահանջում վերադարձնել:

Վառ օրինակներից մեկը Գոհար Սարիբեկյանն է, որը տասը տարի Գյումրիում չի բնակվել: Այդ ընթացքում նրա բնակարանը համարվել է «փակ դուռ» ու վերաբաշխման արդյունքում հատկացվել այլ ընտանիքի: 2 տարի է՝ տիկին Գոհարը փորձում է վերադարձնել իր բնակարանը՝ դիմել է դատախազություն ու ոստիկանություն: Իրավապահներն ու քաղաքապետարանը համապատասխան գրություններ են տվել, որ բնակարանը պատկանում է նախկին տիրոջը: Այն ընտանիքն էլ, ում հետո է հատկացվել բնակարանը, դարձյալ այստեղ չի ապրում, բայց բնակարանի բանալիները հանձնել հրաժարվում է:

«Այն ընտանիքը, ում հատկացվել է իմ բնակարանը, պայմանագիր ունի, որտեղ գրված է, որ 15 օրվա ընթացքում պետք է ազատի տունը, վերադարձնի ինձ: Իսկ տունը զբաղեցրած անձը քաղաքապետարանի բնակբաշխման բաժնի պետի ներկայությամբ նրա սենյակում հայտարարեց, որ չի պատրաստվում բանալիները հանձնել: Բայց չէ՞ որ նրանց առաջ բնակարանը զբաղեցնելիս պայման է դրվել, որ պետք է ապրեն այնքան, մինչև կհայտնվի նախկին տերը, այսինքն՝ իմ ի հայտ գալու պարագայում պետք է բնակարանը վերադարձնեն»,- SHANTNEWS.am-ի հետ զրույցում ասել է Գոհար Սարիբեկյանը:

Լքված տները զբաղեցրած ընտանիքները ժամանակին քաղաքապետարանի հետ կնքել են վարձակալության պայմանագրեր, իսկ հետո պարզվել է, որ դրանք նոտարական վավերացում չունեն, հետևաբար օրինական ուժ չունեն: Վերաբաշխումներն ընդամենը ավագանու որոշմամբ են եղել, իսկ այդ որոշումներում կա մի կետ, որը ոչ թե ներկայի, այլ նախկին տերերի շահերից է բխում:

«Եթե նախկին տերը հայտնվում է, բնակարանը զբաղեցնողները պարտավոր են 15-օրյա ժամկետում ազատել այն: Շատերը հատկացման ժամանակ չեն կարդացել որոշումը և այս կետի մասին ոչինչ չգիտեն. ստացել են բնակարանը, վերանորոգել այն, իսկ հիմա անչափահաս երեխաների հետ միասին դրսում են հայտնվում: Բնականաբար, օրենքը նախկին տերերի կողմն է, քանի որ ժամանակին բնակարանը նրանց հատկացնելու որոշում է եղել»,- SHANTNEWS.am-ին տեղեկացրել է Գյումրիի քաղաքապետարանի բնակբաշխման բաժնի առաջատար մասնագետ Նարինե Մելքոնյանը:

Նույն հիմքով էլ Պողոսյանների ընտանիքն է զրկվել հատկացրած բնակարանից: Ամուսինները 2 երեխաների հետ 3 տարի է՝ վարձով են բնակվում: Քաղաքապետարանը նույն Բուլվարային թաղամասում 2008թ. է բնակարան հատկացրել: Տունը վերանորոգել էին, մի քանի տարի անց նախկին տերը հայտնվել է ու պահանջել իր բնակարանը: Քաղաքապետարանում ընտանիքին բացատրել են, որ հատկացումը եղել է նախկին ՏԻՄ իշխանությունների որոշմամբ և հիմա նախկին տիրոջը բնակարանը չվերադարձնելը օրենքի խախտում է:

«Մենք 8 տարի բնակվել ենք այդ բնակարանում: Մեզ օրդեր էր հատկացվել: Վերանորոգում ենք կատարել, նախկին տերը հայտնվեց ու դատարանի որոշմամբ բնակարանը նրան վերադարձվեց: Ներկայիս քաղաքապետն ասում է, որ ինքն օրենքի կողմն է: Բայց ո՞րն է այդ օրենքը, երբ մեզ երկու երեխաների հետ վտարում են բնակարանից և հատկացնում նախկին տիրոջը, որը 25 տարի լքել է բնակարանը, 80 տարեկան միայնակ տարեց է ու այլ  վայրում բնակարան ունի»,- հայտնել են Պողոսյան ամուսինները:

Բնակարանային նման պատմությունները Գյումրիում բազմաթիվ են: Թե՛ նախկին, թե՛ ներկա տերերին քաղաքապետարանի պատասխանը մեկն է՝ վիճահարույց բնակարանի տնօրինման հարցը պարզել դատարանում: