ԵՊՀ-ի և Նոթինգհեմի «Թրենթ» համալսարանի իրավագիտության ֆակուլտետները փոխըմբռնման հուշագիր ստորագրեցին

ԵՊՀ գիտխորհրդի նիստերի դահլիճում Երևանի պետական համալսարանը և Նոթինգհեմի «Թրենթ» համալսարանը ստորագրելու են փոխըմբռնման հուշագիր՝ երկու համալսարանների իրավագիտության ֆակուլտետների միջև համագործակցություն հաստատելու նպատակով:

Հուշագրի շրջանակում երկու համալսարանները համագործակցելու են համատեղ ուսումնական ծրագրերի մշակման և ուսումնական մեթոդների ներդրման, ուսանողների և դասավանդող անձնակազմի փոխանակման ծրագրերի իրականացման ուղղությամբ, կազմակերպելու են գիտահետազոտական ծրագրեր, սեմինարներ և համաժողովներ: Համագործակցության ընթացքում երկու համալսարանների իրավագիտության ֆակուլտետները մշակելու են համատեղ վկայականներ տրամադրելուն ուղղված ակադեմիական կուրսեր:

«Հայտնի է, որ համալսարանը, այդ թվում՝ մեր ֆակուլտետը, ունի շատ լուրջ գործընկերներ Եվրոպայում, ԱՄՆ-ում: Ինչո՞վ է առանձնանում այս գործակցությունը: Հայտնի է, որ մենք ռոմանո-գերմանական իրավական համակարգի ներկայացուցիչ ենք, նկատի ունեմ հայկական իրավունքը: Իսկ անգլիականն այլ համակարգ է, գլոբալիզացիայի պայմաններում իրավական համակարգերի միջև անջրպետն է փոքրացել: Շատ դեպքերում դժվար է տարբերակել: Մեզ խիստ անհրաժեշտ էր, որ այդ ուղղությամբ քայլեր ձեռնարկեինք: Սա լավ նախադրյալ է, որ կարողանանք անգլո-ամերիկյան իրավական համակարգին ծանոթանալ ավելի մոտիկից, նաև այդ իրավունքին տիրապետող պատրաստել կադրեր, նրանք կկարողանան իրենց գիտելիքներն օգտագործել մեր իրականության մեջ»,- ասաց ԵՊՀ իրավագիտության ֆակուլտետի դեկան Գագիկ Ղազինյանը:

Ղազինյանը շեշտեց՝ նախատեսվում է, որ նշված քայլերի իրականացումը ԵՊՀ իրավագիտության ֆակուլտետը կդարձնի ոչ միայն Հայաստանի, այլև տարածաշրջանի գիտակրթական միակ կենտրոնը:

«Պատրաստվում ենք 2020-2021 թվականներից ներդնել համատեղ վկայականներ տրամադրելուն ուղղված ակադեմիական կուրսերը»,- ասաց նա:

Նոթինգհեմի «Թրենթ» համալսարանը Մեծ Բրիտանիայի ամենամեծ համալսարաններից մեկն է, հիմնադրվել է 1843 թվականին: Այն ունի շուրջ 26,000 ուսանող: Համալսարանը համարվում է Մեծ Բրիտանիայի 15 լավագույն համալսարաններից մեկը:

Տեղեկացնենք, որ Նոթինգհեմի Թրենթ համալսարանը, ըստ «The Times»-ի վարկանիշի և «Sunday Times Good University Guide»-ի, 2018 թվականին ճանաչվել է Մեծ Բրիտանիայի լավագույն բուհ: Կրթական համակարգի հեղինակավոր մրցանակաբաշխության՝ «Times Higher Education awards»-ի շրջանակում, Նոթինգհեմի «Թրենթ» համալսարանը ճանաչվել է որպես «Տարվա լավագույն համալսարան»: