Եղբորորդիները պայքարում են Հառիճի գյուղապետի պաշտոնի համար

Փետրվարի 17-ին Շիրակի մարզի 2՝ Աշոցք և Հառիճ համայնքներում կայանալու են համայնքի ղեկավարի ընտրություններ: Համայքներում մրցակցություն կա, ինչը նախորդ ընտրությունների ժամանակ չի եղել: Օրինակը Հառիճն է: Գործող գյուղապետը 2001 թվականից մրցակիցներ չի ունեցել՝ 5 անգամ ընտրվել ու վերընտրվել է:

Այս ընտրություններում գյուղապետի պաշտոնին հավակնող ևս մեկ թեկնածու կա: Մրցապայքարը թեկնածուների միջև դուրս է եկել գյուղերում ընդունված ավանդական ձևաչափից, երբ ընտրվում էր մեծ ազգություն ունեցող թեկնածուն: Հառիճի գյուղապետարանին և գյուղի մյուս մարդաշատ վայրերում հայտարարություն է փակցված, իսկ բովանդակությունն այսպիսին է՝ ընտրողները գյուղապետի թեկնածուներին հրավիրում են գյուղապետարանի դահլիճ՝ հանդիպելու ընտրողների հետ ու իրենց ծրագրերը ներկայացնելու համար:

2 թեկնածուների նախընտրական համատեղ հանդիպման նախաձեռնողը Հառիճի բնակիչ Տիգրան Մանվելյանն է: Այս տարբերակով որոշել է օգնել գյուղացիներին ընտրություն կատարել 18 տարի պաշտոնավարող գյուղապետի և երիտասարդ թեկնածուի միջև: 2 թեկնածուներն էլ համաձայնել են ներկա լինել հանդիպմանը:

Գործող գյուղապետի խոսքվ՝ իր համար հաշվետվություն են անցած 18 տարիները: Առաջին անգամ ընտրվելիս է լուրջ մրցակցություն է եղել: Հետո արդեն Հառիճը ուրիշ գյուղապետ չի ունեցել:

«Առաջին անգամ ընտրվելիս  լուրջ մրցակից եմ ունեցել: Հետո այդ մրցակցիս հետ դարձել ենք խնամիներ: Հիմա նախկին մրցակիցս աղջկաս սկեսրայրն է: Այս ընտրութւյուննհերին էլ մրցակցում եմ ազգականիս հետ: Մյուս թեկնածուի հետ հեռու հորեղբոր  տղաներ ենք: Ես ոխակալ մարդ չեմ: Նորմալ հարաբերությունների մեջ ենք իրար հետ»,- SHANTNEWS.am-ի հետ զրույցում ասել է Հառիճի գյուղապետի թեկնածու Ռոլանդ Նազարեթյանը:

«Մեր կյանքը ընտրություններով ո’չ սկսվել է, ո’չ էլ կավարտվի:  Հառիճի հասարակությունն է որոշելու, թե ով կլինի գյուղապետը: Սա հանրապետությունում կատարվող գործընթացների տրամաբանական շարունակությունն է»,- SHANTNEWS.am-ի հետ զրույցում նշել է գյուղապետի մյուս թեկնածուն՝ Բակուր Հովհաննիսյանը:

Բակուր Հովհաննիսյանը Հառիճավանքի ընծայարանի ֆիզիկայի ուսուցիչն է: Գյուղապետի պաշտոնի համար պայքարում է գյուղում փոփոխությունների ակնկալիքով, թեև նշում է՝ լուրջ խնդիրներ,  որպես այդպիսին, Հառիճը չունի: Երկու թեկնածուները գուցե տարբեր ծրագրեր ունեն, բայց նաև մեկ ընդհանրություն ունեն: Դա քաղաքական հենարանի բացակայությունն է՝ երկուսն էլ կուսակցական չեն:

Հին գյուղապետի ու նոր թեկնածուի միջև ընտրությունը, գյուղացիներն են խոստովանում, որ հեշտ չէ: Հառիճի 870 ընտրողները կողմնորոշվելու համար 15 օր ժամանակ ունեն: