Մի´ ակնկալեք արագ առաջընթաց. Կարասինը` Վերին Լարսի այլընտրանքային ճանապարհի մասին

Ռուսական կողմը պատրաստ է լուրջ տեխնիկական և նյութատեխնիկական աշխատանքներ իրականացնել «Մաքսային վարչարարության մեխանիզմների և ապրանքների մոնիթորինգի հիմնական սկզբունքների մասին» վրաց-ռուսական համաձայնագրի իրականացման շուրջ: Այդ մասին հայտարարել է Ռուսաստանի փոխարտգործնախարար Գրիգորի Կարասինը ռուսական «Կոմերսանտ» պարբերականին տված հարցազրույցում:

Խոսքը վերաբերում է միջանցքներին, որոնք ըստ 2011 թ. վրաց-ռուսական պայմանագրի` պետք է անցնեն Վրաստանի կենտրոնական իշխանությունների վերահսկողությունից դուրս գտնվող տարածքներով` Աբխազիայով և Հարավային Օսիայով (Ցխինվալի տարածաշրջան): Մասնավորապես, նախագծի շրջանակներում, մի շարք խնդրահարույց հարցերի լուծումից հետո  առավել հավանական ուղին անցնելու է Հարավային Օսիայով:

Կարասինը կոչ է արել «չքաղաքականացնել գործընթացը»և  սպասել Ժնևում փորձագետների հանդիպմանը:

«Նախ` պետք է կարգավորել մոնիթորինգի մեխանիզմը: Ժնևում կայացած հանդիպումից հետո Զուրաբ Աբաշիձեն և ես պայմանավորվեցինք փորձագետների հանդիպումից հետո` փետրվարի վերջին, կրկին հանդիպել` ևս մեկ անգամ քննարկելու հնարավոր գործընթացները: Կանդրադառնանք նաև դժվարություններին: Մի´ ակնկալեք արագ առաջընթաց: Առաջիկայում մեզ սպասում են լուրջ տեխնիկական և նյութատեխնիկական աշխատանքներ: Այն կպահանջի ժամանակ ու հաստատակամություն: Ռուսական կողմը նման աշխատանքի պատրաստ է»,- ասել է Կարասինը «Կոմերսանտ»-ին տված հարցազրույցում:

Նրա խոսքերով` փետրվարի 6-ին Ժնևում տեղի կունենա Ռուսաստանի և Վրաստանի միջգերատեսչական պատվիրակությունների հանդիպումը՝ բեռների մաքսային մոնիթորինգի թեմայով, որին կմասնակցեն նաև շվեյցարական ընկերության ներկայացուցիչները:

ՌԴ ԱԳ փոխնախարարի խոսքերով` Շվեյցարիայում կայացած հանդիպմանը համապատասխան կողմերի միջև «կձևավորվի հետագա ռազմավարություն»:

Շվեյցարական SGS ընկերությունը (Socit Gnrale de Surveillance, SA) պետք է ապահովի «մաքսային վարչարարությունն ու ապրանքների առևտրի մոնիթորինգի մեխանիզմի հիմնական սկզբունքները», որոնք նախատեսված են  2011թ. Վրաստանի և Ռուսաստանի կառավարությունների միջև կնքված համաձայանգրով:

Ներկայումս Ռուսաստանից Հայաստան բեռնափոխադրումների ավելի քան 80% -ը իրականացվում է Վերին Լարսի անցակետով: Բարդ եղանակային պայմանների պատճառով վրացական ռազմավիրական ճանապարհը հաճախ փակ է, ինչի հետևանքով հայկական բեռնատարների վարորդները օրեր շարունակ վրաց-ռուսական սահմանին սպասում են եղանակի պարզեցմանը:

Այսօրվա դրությամբ փորձագետները քննարկում են Լարսից բացի, վեց այլընտրանքային տարբերակներ` օդային, ծովային (Փոթի նավահանգիստի միջոցով) և ցամաքային (Հարավային Օսիայով, Ավարո-Կախեթիայի ճանապարհը` Դաղստանի տարանցմամբ և Վերին Լարսը) ինչպես նաև երկաթուղային հաղորդակցություն`Աբխազիայի տարանցմամբ Զուգդիդի-Սոչի երթուղով:

Փորձագետների կարծիքով, տնտեսական տեսանկյունից, Հայաստանի համար առավել ընդունելի մայրուղին Հյուսիսային և Հարավային Օսիաներով անցնող Նար-Գորի երթուղին է: Այն թեև 80 կիլոմետր երկար է Լարսից, սակայն առավել նախընտրելի է` հարմարավետ է կլիմայական պայմանների և ռելիեֆի պատճառով:

Ավելի վաղ հայտնել էինք, որ ՌԴ-ն և Վրաստանը համաձայնության են եկել Աբխազիայով և Հարավային Օսիայով անցնող ճանապարհները բացելու հարցում: