Արշալույսի գյուղապետը չի պատրաստվում հրաժարական տալ, գյուղացիներն էլ չեն պատրաստվում դադարեցնել բողոքի ցույցերը

Այսօր շարունակվել են բողոքի ակցիաները Արմավիրի մարզի Արշալույս համայնքում: Մի քանի օր է՝ գյուղացիներն այստեղ ցույցեր են անցկացնում՝ ընդդեմ համայնքի ղեկավար Զարզանդ Գրիգորյանի՝ պահանջելով վերջինիս հրաժարականը: Վերջինս Մանվել Գրիգորյանի եղբորորդին է:

Գյուղացիներն իրենց պահանջներում պնդում են, որ գյուղապետը ընտրողական վերաբերմունք է դրսևորում իրենց նկատմամբ: Նրանք, որոնք մասնակցել են գյուղապետի հրաժարականը պահանջող ստորագրահավաքին, ենթարկվում են ճնշումների, գյուղապետը հարկահավաքության խիստ միջոցներ է կիրառում նրանց նկատմամբ: Այս մասին SHANTNEWS.am-ին մանրամասներ փոխանցեց «Իմ քայլը» խմբակցության պատգամավոր Թագուհի Ղազարյանը, որն առավոտից ներկա է գտնվել գյուղի զարգացումներին:

«Ոստիկաններ էին եկել, որպեսզի վերականգնեին գյուղապետարանի բնականոն աշխատանքը, որովհետև «Հավաքների ազատության մասին» օրենքով պիտի պետական շինություններից ողջամիտ հեռավորության վրա անցկացնեն հավաքները, ոստիկանների գալուց լարվել էին գյուղացիները: Խոսեցի ոստիկանների հետ, իրենք բավական դրական էին տրամադրված և չեզոք, ասացին, որ եկել են անվտանգություն պահպանելու, խոսեցի ցուցարարների հետ, իրենք, բնականաբար, շարունակում են պահանջել գյուղապետի հրաժարականը»,- ասաց Թագուհի Ղազարյանը:

Բողոքի ցույցի պատճառով կաթվածահար է եղել գյուղապետարանի աշխատանքը, լարված իրավիճակը բավական երկար է տևել, սակայն, պատգամավորի վստահեցմամբ, բերման ենթարկվողներ չեն եղել:

«Բերման ենթարկվածներ չեն եղել, ուղղակի ոստիկանության պնդմամբ՝ համաչափ ուժի կիրառմամբ իրենց փոխադրել են մեկ այլ վայր, բայց բերման չեն ենթարկել, իհարկե, գյուղացիները պնդում են, որ իրենց ձեռքերից, ոտքերից բռնել-տարել են այսկողմ, այնկողմ, բայց քանի որ վիդեոները չեմ տեսել, չեմ կարող պնդել»,- ասաց պատգամավորը:

Նա որոշել է զրուցել գյուղապետի հետ, պատմում է.

«Առաջարկեցի գալ զրուցել, հրաժարվեց գալ գյուղացիների մոտ, ասաց, որ իրեն վիրավորում են, հայհոյում, երբ  տեսնում են, չի պատրաստվում գալ, դրա համար գյուղապետարանի շենքից մի քանի մետր ներքև «Հայփոստի» շենքը կա, առաջարկեցի գոնե ինչ-որ չեզոք տեղում հանդիպել: Այնտեղ զրուցեցինք մոտ մեկ ժամից ավելի, նաև գյուղացիների ներկայացրած  խնդիրները նշեցի, ու որպես միջանկյալ լուծում առաջարկեցի գոնե հավասար վերաբերվել մարդկանց, որպեսզի նրանք իրենց ստորադասված դաս չզգան ու լարվածություն, թշնամանք չստեղծվի, գյուղացիների, նույնիսկ բարեկամների միջև, խնդրեցի, որ որպես համայնքապետ՝ իր վրա պատասխանատվություն վերցնի հաշտության մթնոլորտը վերականգնել, մինչև կոնկրետ լուծումներ կլինեն, իսկ դրանք հավանաբար կլինեն արտահերթ ընտրությունների տեսքով, որովհետև չի պատրաստվում մինչև այդ հրաժարական տալ»:

Լարվածությունը կավարտվի, եթե գյուղապետը հրաժարական տա, սակայն Զարզանդ Գրիգորյանն ասել է, որ ինքը համայնքի կողմից ընտրված գյուղապետ է և չի պատրաստվում գնալ այդ քայլին:

«Ինքը պնդում է, որ ընտրվել է, և այս տարի նախատեսված են արտահերթ ընտրություններ, ու նաև խոստացավ մինչև մայիս ամիս հարկահավաքության ճնշումները չգործադրել՝ հասկանալով, որ գյուղացիները ձմռան ամիսներին եկամուտ չունեն: Հարցն այն է, որ ՏԻՄ օրենքով չենք կարող միջամտել որևէ կերպ համայնքապետի լիազորությունների դադարեցմանը, իրենք պետք է փորձեն հաշտության հասնել, բայց խոստացան, որ հեռավորությունը պահել, որ բնականոն աշխատանքի կարողանան գնալ մարդիկ, խնդրեցի, որ գոնե գյուղի բնականոն կյանքը վերականգնեն»,- ասաց արշալույսցի պատգամավորը:

Նա նշեց, որ լարվածությունը որոշ չափով թուլացել է, սակայն ցուցարարները չեն խոստացել դադարեցնել ցույցերը, միայն վստահեցրել են, որ դրանք կշարունակեն օրենքով սահմանված կարգով՝ գյուղապետարանից որոշ հեռավորություն պահպանելով:

SHANTNEWS.am-ը պարզաբանման համար դիմեց նաև Զարզանդ Գրիգորյանին, սակայն վերջինս հրաժարվեց որևէ տեղեկություն տալ: