Գյումրիի փողոցաշինական ծրագրի ժամկետները երկարացվել են

Գյումրիի փողոցաշինական մեծ ծրագրի ժամկետները 6 ամսով երկարացվել են: Այս մասին քաղաքապետարանը համաձայնության է եկել Վերակառուցման և զարգացման բանկի հետ:  Հիշեցնենք, ՎԶԵԲ-ի և համաշխարհային բանկի ֆինանսավորմամբ Գյումրիում մինչև  փետրվարի 10-ը փողոց ու 2 հրապարակ էր հիմնանորոգվելու: Բայց մինչև տարեվերջ ՎԶԵԲ ծրագրով ավարտվեց 2 փողոցի,  իսկ Համաշխարհային բանկով՝ քաղաքի կենտրոնի 4 փոքր փողոցների շինարարությունը: Բոլոր փողոցներում աշխատանքները ձգձգվեցին նախագծային թերությունների պատճառով: Հիմա երկարաձգված ժամկետներում հասցնելու են նախագծերը փոխել, նաև ասֆալտապատումն ավարտել: Համենայնդեպս, այսպիսին է Վերակառուցման և զարգացման բանկի նոր պահանջը: Այս տարվա անելիքների շուրջ այսօր քննարկում է անցկացվել Գյումրիի քաղաքապետարանում:

Մինչ Գյումրիի փողոցաշինական մեծ ծրագրի դեռ առաջին փուլի ու այս տարվա անելիքներից խոսելը,  քննարկման մասնակիցները, իսկ դրանք շինարարներն էին, ծառայությունների ներկայացուցիչները, նախագծողներն ու քաղաքապետարանի պատասխանատուները, ներկայացրին, թե առաջին փուլ ասվածից ինչ ծավալի աշխատանքներ են կատարվել: Ընդհանուր ծավալը 10-ը փողոց ու 2 հրապարակ պետք է լիներ, իսկ կատարվածը կեսից էլ քիչ է: Այս տարի էլի նախագծային սխալներն են ուղղելու: Դրանք վերաբերում են բոլոր փողոցներին: Նախագծային փոփոխությունների համար դիմել են, բայց նոր նախագծեր դեռ չկան: Իսկ դրանցում մալուխները, կապի հաղորդալարերն ու ջրատարներն այնպես են նախագծելու, որ շինարարական աշխատանքներին չխանգարեն: Հիմնանորոգվող փողոցների մի մասում մալուխներն են շինարարին խանգարում, մյուսներում՝ շինարարներն են ջրատարներն ու հաղորդալարերը վնասում:

Փողոցաշինությանը ոչ միայն անկանոն անցկացված ենթակառուցվածքներն են խանգարում, այլ նաև վթարային շենքերը: Սա վերաբերում է հիմնականում Կումայրի պատմական միջուկի փողոցներին: Այս մասին արդեն Համաշխարհային բանկի ներկայացուցիչը խոսեց: Վթարային տները խանգարում են մայթերի շինարարությանը:

Իսկ այն շինկազմակերպությունը, որը մինչև անցած տարեվերջ հասցրել է գործ անել, հիմա արդեն ֆինանսավորում է պահանջում: Կատարվածի դիմաց ոչինչ չեն ստացել: Կատարողականները չէին ֆինանսավորվում մինչև շինարարական թերությունները  վերացնելը: Եզրաքարերը փոխելու, նոր նախագիծ ունենալու և հիմնանորոգումն ավարտելու համար 3 շինկազմակերպություններից 2-ն է դիմել ժամկետները երկարացնելու խնդրանքով: Մյուսը դեռ չի կողմնորոշվում, թե իրեն ինչքան ժամանակ է պետք:

«Անգամ 1 օր ավելի ժամանակ չենք կարող տրամադրել, որովհետև դրա իրավունքը չունենք: Բանկը համաձայնել է մինչև հունիսի 30-ը ժամանակ տալ: Սա վերջնական պայմանավորվածությունն է աշխատանքների վերջնաժամկետի շուրջ: Այնպես որ, բոլոր շինկազմակերպությունները փողոցները մինչև հունիսի 30-ը պետք է հիմնանորոգեն ու հանձնեն շահագործման»,- ասել է Գյումրիի քաղաքապետ Սամվել Բալասանյանը:

Հիշեցնենք, որ Գյումրիում փողոցաշինական մեծ ծրագիրը ֆինանսավորվում է ՎԶԵԲ-ի և Համաշխարհային բանկի կողմից: Առաջին փուլի ավարտի նոր ժամկետը մինչև հունիսի 30-ն է: Բայց աշխատանքների վերսկսման ժամկետներն են անորոշ: Բոլոր շինկազմակերպությունների ներկայացուցիչներն էլ նույնը նշեցին՝ շինարարները փողոց դուրս կգան, երբ եղանակները թույլ տան: