Շիրակի մարզի դատախազը պահանջում է պաշտոնից հեռացնել Գյումրու թիվ 19 դպրոցի տնօրենին ու փոխտնօրենին

Շիրակի մարզի դատախազը պահանջում է պաշտոնանկ անել Գյումրու թիվ 19 դպրոցի տնօրեն Նարինե Մեսրոպյանին և փոխտնօրեն Անահիտ Միսկարյանին։ Կարեն Գաբրիելյանն այս մասին փետրվարի 1-ին միջնորդագիր է ներկայացրել Շիրակի մարզպետի պաշտոնակատար Վարդան Գրիգորյանին։ Իսկ նման որոշման համար հիմք են հանդիսացելհարուցված քրեական գործի շրջանակում ձեռք բերված ապացույցները, համաձայն որոնց՝ տնօրենն ու փոխտնօրենը, պաշտոնական լիազորությունները չարաշահելով, կատարել են պաշտոնական կեղծիք ու այդ գործում ներգրավել դպրոցի թվով 25 աշխատակիցների։

Այս մասին SHANTNEWS.am-ին հայտնել է Շիրակի մարզի դատախազ Կարեն Գաբրիելյանը։

Ավելի վաղ ՀՀ գլխավոր դատախազության հանրային կապերի բաժինը հաղորդագրություն էր տարածել՝ համաձայն որի՝ ՀՀ ոստիկանության Շիրակի մարզային վարչության Գյումրի քաղաքի Մուշի բաժնում օպերատիվ տվյալներ են ստացվել, որ Գյումրի քաղաքի թիվ 19 միջնակարգ դպրոցի համապատասխան փաստաթղթերում, աշակերտների ցուցակներում և դասամատյաններում՝ որպես տարբեր դասարանների աշակերտներ գրանցված են թվով 16 անձանց տվյալներ, որոնք, սակայն, դպրոց չեն հաճախում և չեն մասնակցում դասապրոցեսներին։

Դատախազը դպրոցի աշխատակիցների նկատմամբ քրեական հետապնդումը դադարեցրել է, այսինքն` քրեկան գործը կարճվել է, սակայն  դատախազը Նարինե Մեսրոպյանին և Անահիտ Միսկարյանին պաշտոնազրկելու միջնորդություն է ներկայացրել: Հաշվի առնելով այն հանգամանքը, որ նրանց հետագա պաշտոնավարումը կհեղինակազրկի հանրակրթության ոլորտը՝ պահանջել է նրանց պաշտոնազրկել։

«Պահանջել եմ նրանց նկատմամբ կարգապահական տույժ կիրառել՝ ազատել պաշտոններից՝ նկատի ունենալով, որ նշված անձինք կորցրել են վստահությունը և աշխատանքային օրենսգրքի համաձայն՝ դա հիմք է նրանց աշխատանքային պայմանագիրը լուծարելու համար։ Քրեական գործի քննությունն ավարտված է և այդ միջնորդագրի համար բոլոր հիմքերը կան։ Միջնորդագիրը ներկայացվել է մարզպետի պաշտոնակատարին։ Մեկամսյա ժամկետում միջնորդագիրը պետք է քննարկվի։ Չեմ կարող ասել, թե ինչ որոշում կկայացվի «»,- SHANTNEWS.am-ին ասել է Շիրակի մարզի դատախազ Կարեն Գաբրիելյանը։

Իսկ թիվ 19 դպրոցի տնօրեն Նարինե Մեսրոպյանը SHANTNEWS.am-ի հետ հեռախոսազրույցում հայտնել է, որ դատախազի միջնորդագրի մասին իրեն ոչինչ հայտնի չէ։

«Ես ոչ մի միջնորդագրի մասին տեղյակ չեմ։ Ինձ ոչ ոք ոչինչ չի ասել։ Այո, եղել է քրեական գործ, որը հունվարի 26-ին կարճվել է, ու ես բացարձակ տեղեկություն չունեմ, որ դատախազը նման միջնորդագիր է ներկայացրել։ Իմ ձեռքի տակ ոչինչ չկա, դրա համար չեմ կարող ոչինչ մեկնաբանել այս պահին»,-SHANTNEWS.am-ին ասել է Նարինե Մեսրոպյանը։

«Շիրակի մարզի դատախազության կողմից Գյումրու թիվ 19-րդ դպրոցում ՀՀ Քրեական օրենսգրքի 308 և 314-րդ հոդվածների 1-ին մասերի հատկանիշներով հարուցված քրեական գործի քննության շրջանակներում ձեռք բերված տվյալները ապացուցել են նշված դպրոցի տնօրենի կողմից Քրեական օրենսգրքի վերոնշյալ հոդվածների հատկանիշներով հանցավոր արարքներ կատարելու փաստը։ Այն է՝ պաշտոնեական լիազորությունները չարաշահելը և պաշտոնական կեղծիք կատարելը, ինչի կապակցությամբ՝ նշված դպրոցի տնօրենին մեղադրանք է առաջադրվել հիշյալ հանցագործությունները կատարելու համար։ Բացի այդ, հիմնավորվել է նաև, որ դպրոցի տնօրենի կողմից պաշտոնեական լիազորությունները չարաշահելուն օժանդակել են նույն դպրոցի թվով 25 աշխատակիցներ։ Նրանցից երկուսի կողմից պաշտոնական փաստաթղթերում կատարվել են նաև ակնհայտ կեղծիքներ։ Հաշվի առնելով, որ ինչպես դպրոցի տնօրենը, այնպես էլ թվով 25 աշխատակիցներ զղջացել են իրենց կատարած արարքի համար, ընդունել են իրենց մեղքը, նախկինում դատապարտված չեն եղել և առաջին անգամ են կատարել միջին ծանրության հանցավոր արարքներ, ավելին՝ տնօրենի կողմից վերականգնվել է պետությանը պատճառված նյութական վնասը՝ հարուցված քրեական հետապնդումը դադարեցվել է»,-  ասված է Դատախազության տարածած հաղորդագրության մեջ։