«Եթե ուզում ենք փոփոխություններ, պիտի փոփոխվենք բոլորս». Շիրակի մարզպետ

Շիրակի մարզպետ Տիգրան Պետրոսյանը փետրվարի 7-ին ծանոթացել է մարզպետարանի աշխատակազմի հետ, հետո հանդիպել լրագրողներին: Նորանշանակ մարզպետը առանձնացրել է Շիրակի մարզի հիմնախնդիրները՝ նշելով, որ դրանց լուծման ուղղությամբ ոլորտային քննարկումներ են լինելու: Իսկ առաջին փոփոխություններից, որ լինելու է ոչ միայն Շիրակի մարզում, այլև կառավարման ամբողջ համակարգում, դա օպտիմալացումն է:

Շիրակի նախկին մարզպետներից մեկի նախաձեռնությունն էր՝ մարզպետարանի երկրորդ հարկի միջանցքում փակցնել բոլոր նախկին մարզպետների լուսանկարները: Այդ շարքը մեկով ավելացել է: Նախկին մարզպետ, այժմ արդեն ԱԺ պատգամավոր Կարեն Սարուխանյանի լուսանկարն արդեն փակցված է: Նա իններորդն էր:

Շիրակի մարզպետարանի աշխատալազմն այսօր դիմավորեց 10-րդ մարզպետին: Տիգրան Պետրոսյանը աշխատանքային առաջին օրն սկսել էր շրջայցով:  Աշխատակիցների հետ ծանոթանալուց հետո միայն լրագրողներին ներկայացրեց մարզի առաջնահերթ խնդիրները, որոնք նորություն չեն բոլորի համար, բայց նոր մոտեցումներ են պետք: Շիրակի մարզի առաջնային խնդիրները անօթևանությունն ու աղքատությունն են: Իսկ լուծման ուղիներից ամենակարևորը ներդրումների ներգրավումն է: Տիգրան Պետրոսյանը նշեց՝ առաջին հերթին ոչ թե նոր ներդրումների մասին է պետք մտածել, այլ արդեն աշխատող ներդրողներին աջակցել:

«Այն մարդիկ, որոնք այսօր Շիրակի մարզում աշխատում են, աշխատատեղեր են ստեղծում, ընդլայնվելու հեռանկարներ ունեն, այս մարդկանց առաջին հերթին պետք է աջակցենք: Եթե իրենց մատից փուշ չենք հանում, ուրեմն ուրիշ ոչ մի ֆոնի մասին խոսել իմաստ չունի: Եթե ուզում ենք փոփոխություններ, պիտի փոփոխվենք բոլորով»,- նշել է Շիրակի նորանշանակ մարզպետ Տիգրան Պետրոսյանը:

Առաջնային խնդիրների լուծման ուղիներ գտնելու համար ոլորտային քննարկումներ է նոր մարզպետն ունենալու, իսկ պետական կառավարման համակարգում  կրճատումների անհրաժեշտությունն արդեն ֆիքսված է: Օպտիմալացում լինելու է նաև Շիրակի մարզպետարանում: Իսկ թե քանի աշխատող ու ովքեր կմնան անգործ, դեռ պարզ չէ: Հստակ է միայն, որ նախկինի պես 3 փոխմարզպետ չի լինելու:

«Որն է փոխմարզպետի ֆունկցիոնալությունը: Եթե ֆունկցիաների բաշխում է կատարվել, տեխնիկապեոս դրանք դրվել են վարչությունների ու բաժինների վրա, չեմ ասի, թե ընդհանրապես պետք չէ, բայց մեկ փոխմարզպետը բավարար է: Այստեղ պետք է, որ հասկանանք կառավարման ոլորտի փիլիսոփայությունը»,- նշել է Տիգրան Պետրոսյանը։

Տիգրան Պետրոսյանը Գյումրիում հայտնի է հասարակական գործունեությամբ, նաև որպես հեղափոխության օրերի ակտիվիստ: Լրագրողները նկատեցին՝ անցած տարվա ապրիլին Տիգրան Պետրոսյանը մարզպետարանի դիմաց փողոց էր փակում, հիմա մարզի խնդիրների լուծման պայքարը ներսում  է շարունակում:

Մարզպետարանում մարզի զարգացման մասին է խոսելու, բուհերում փորձը ուսանողներին է փոխանցելու: Նորանշանակ մարզպետը կշարունակի դասավանդել Շիրակի պետական համալսարանում: Օրենսդրությունը մարզպետներին գիտամանկավարժական գործունեությամբ զբաղվելու իրավունք տալիս է: