Հակոբ Արշակյանը խոստանում է «Հյուսիս-հարավ» ճանապարհի կառուցման ջանքերի եռապատկում

Կառավարության կարճատև նիստից և փակ քննարկման ավարտից հետո լրագրողների հարցերին է պատասխանել ՀՀ կապի, տրանսպորտի և ՏՏ նախարար Հակոբ Արշակյանը: Նա անդրադարձել է մի քանի հարցերի, խոսել նախարարության վերակազմավորման շուրջ քննարկումների, կառավարության ծրագրի մասին: Նախարարը մասնավորապես ասել է.

«Կառավարության ծրագիրը միտված է ի շահ ժողովրդի, ստեղծվելու են նոր աշխատատեղեր, նաև ծրագրում նշված է, որ ծայրահեղ աղքատությունը դադարելու է, քայլեր են ձեռնարկվելու աղքատության նվազման ուղղությամբ, ռազմարդյունաբերության ոլորտըում հավաստիացնում եմ, որ շուկայից եկող ֆինանսավորումը ամբողջությամբ պրոեկտվելու է գիտելիքահեն արդյունաբերության վրա և նոր աշխատատեղերի ստեղծմանը»,- ասաց Արշակյանը:

Նրան հարց ուղղվեց նաև  Լարսին այլընտրանքային ճանապարհի կառուցման վերաբերյալ բանակցությունների մասին, այդպիսիք կան, բայց մեկնաբանություններ նախարարը չտվեց՝ շեշտելով, որ դրանք կարող են ազդել բանակցությունների ընթացքի վրա: Առավել ասելիք կար «Հյուսիս-հարավ» ճանապարհի շինարարության ընթացքի մասին, նախարարն ընդգծեց, որ վերջինիս վերաբերյալ լուրջ աշխատանքներ են սպասվում հատկապես հարավային ուղղությամբ:

««Տրանշ-3»-ի մասով նորմալ աշխատանքներ տարվում են, զարգացման ծրագիր  ունենք հարավային ուղղությամբ, ակտիվ աշխատանքներ են տարվում դոնորների հետ, ովքեր հետաքրքրված են ներդրումներ կատարելով, հարավային ուղղությամբ թունելների ու կամուրջների շինարարության մասն է, կարծում եմ, որ դրանք ամենակարևոր ստրատեսգիական մասն են, որտեղ մեր ուժերը կենտրոնացնում ենք: «Տրանշ-4»-ի մասով նույնպես գնում ենք քննարկումներ, բայց մեր հիմնական թիրախը հարավային ուղղությամբ է: Մենք հիմնական ուժերը կենտրոնացրել ենք հարավային ուղղությամբ, քանի որ մոտ 2 ժամ տևողության կրճատում ենք ունենում և 55 կմ հատված, «Տրանշ-4»-ը տրամաբանական շարունակությունն է 3-ից, բայց մեծ էֆեկտ սպասում ենք հարավային ուղղությամբ»,- ասաց նախարարը:

Նա հայտարարեց, որ երկրորդ տրանշի մասով դանդաղ ընթացք կա, իսկ  երրորդի վերաբերյալ չինացի գործընկերների ու դոնոր կազմակերպությունների հետ  են բանակցությունների մեջ: Ասաց.

«Այն ծավալները, որոնցով առաջ էին գնում, եռապատկվել են, շատ դանդաղ էր գնացել ու հետ ընկել մինչև կառավարության փոփոխությունը, տարբեր պատճառներով: Ես ուզում եմ հավաստիացնել, որ մեր ջանքերը շարունակելու ենք գործադրել, որպեսզի մինչև իրենց ստանձնած ժամկետը  ավարտեն»:

Անդրադառնալով ծրագրում նախկինում հայտնաբերված թերություններին` նախարարը նշեց.

«Գաղտնիք չէ, որ «Տրանշ 1-ում» և «Տրանշ 2»-ում որակի հետ կապված խնդիրներ կան, քանի որ Քննչական կոմիտեում է Հարավը և քննություն է տարվում: Չեմ մեկնաբանի»: