Հայաստանի Հանրապետությունում այսօր էլ կաշառք վերցնում են. Նիկոլ Փաշինյան

ՀՀ կառավարության փետրվարի 21-ի նիստում քննարկման դրվեց «Հայաստանի Հանրապետության կառավարության և Եվրոպական միության միջև «ԵՄ-ն Հայաստանի համար. Տարածքային զարգացում» (հատուկ պայմաններ) ֆինանսավորման համաձայնագրի ստորագրման առաջարկությանը հավանություն տալու մասին» նախագիծը:

Ծրագիրը ներկայացնելով՝ ՀՀ տնտեսական զարգացման և ներդրումների նախարար Տիգրան Խաչատրյանը նշեց, որ համաձայնագրի ստորագրումով Հայաստանի Հանրապետությանն է հատկացվում 31 մլն 250 եվրո ընդհանուր արժեքով դրամաշնորհ: Ծրագիրն իրականացվելու է 72 ամիս տևող ժամանակահատվածում, այն կոչվում է «Տարածքային զարգացում» (հատուկ պայմաններ) ֆինանսավորման համաձայնագիր»:

Խաչատրյանն ասաց, որ դրամաշնորհով նախատեսված են Շիրակ, Լոռի, Տավուշ մարզերում իրականացվող տարբեր ծրագրեր, որոնք ուղղված են լինելու գյուղատնտեսության, նորարարական տուրիզմի և ստեղծագործական արդյունաբերության ճյուղերի խթանմանը, պետք է աջակցություն ցուցաբերվի վենչուրային ընկերություններին, որ տարածքային բնորոշ խնդիրների լուծում կտան, թափ կհաղորդվի աճի պոտենցիալ ունեցող փոքր ձեռնարկություններին: Նախարարը կարևորեց, որ ստեղծվի միջավայր՝ տարածքային վենչուրային ընկերությունների միջոցով այդ տարածքում տնտեսական զարգացումների վրա ազդեցությունն ավելացնելու համար: Նա ասաց՝ որոշ առանձնահատկություն ունեն Շիրակի մարզում իրականացվող միջոցառումները, այն է՝ դրանք ձմեռային մարզական հաստատություն հիմնելու, գյուղատնտեսության ոլորտում տեղական և միջազգային մակարդակում մրցունակ ընկերություն ստեղծելու հատուկ շեշտադրումներ պետք է ունենան, նաև դրամաշնորհներ կհատկացվեն «Հորիզոն 20-20» հետազոտական և նորարար շրջանակային ծրագրին Հայաստանի մասնակցության համար տարեկան անդամակցության վճարների 50 տոկոսի չափով օժանդակություն: Ծրագրի իրականացման պատասխանատուներն են Ավստրիական զարգացման գործակալությունը, ՎԶԵԲ և Գերմանիայի միջազգային համագործակցության ընկերությունը:

ՀՀ վարչապետ Նիկոլ Փաշինյանը նկատեց՝ հերթական անգամ քննարկում են խոշոր դրամաշնորհ ստանալու վերաբերյալ նախագիծ: Նա հիշեցրեց՝ նման խոշոր դրամաշնորհ էլի ենք ստացել, առաջիկայում նորից կստանանք: Վարչապետն արձանագրեց՝ ըստ էության աստղաբաշխական թվեր են ստանում, և եթե ապահովեն գումարների արդյունավետ ծախսումը, չի կարող արդյունք չունենալ, ՀՀ քաղաքացին չի կարող իր վրա կոնկրետ արդյունք չզգալ, սակայն պետք է 100 տոկոսանոց երաշխիք ստեղծել, որ վարկային, դրամաշնորհային միջոցները ծախսվում են նպատակային:

«Եթե մարդու կյանքում բան չի փոխվում, նշանակում է՝ ինչ-որ մեկն ինչ-որ տեղ ինչ-որ բան գողանում է»,- ասաց վարչապետը՝ շեշտելով, որ չեն կարող այսպիսի գումարներ մտնել երկիր, և ոչինչ չփոխվի, իսկ կառավարության ներկայացուցիչներին նա ասաց՝ ոչ մի վայրկյան պետք է զգոնությունը չթուլանա կոռուպցիոն երևույթների դեմ պայքարի ժամանակ:

«Հայաստանի Հանրապետությունում այսօր էլ կաշառք վերցնում են: Այն, որ ժամանակ առ ժամանակ կոնկրետ փաստով ձերբակալություններ ենք ունենում, դրա ապացույցն է: Եթե կա այդ երևույթը, պետք է ոչ թե ամիսը մեկ-երկու այդպիսի ձերբակալություն ունենան, այլ 10, 20 և ավելի պիտի լինեն դրանք: Կապ չունի՝ գործող պաշտոնյա է, թե ոչ, թե որ կուսակցությունից է, իմ ընտանիքի անդամ է, թե հարևանի ընտանիքի անդամ: Հայաստանի Հանրապետության ժողովրդից գողացողը պետք է բռնվի, ամբաստանվի, խայտառակվի, բարոյապես ոչնչացվի և ուղարկվի բանտ: Սա է սկզբունքը, հակառակ դեպքում այս գումարները վերցնում ենք, ի՞նչ ենք անում: Այս թեմայով աշխատանքային քննարկումներ ունենում ենք և էլի կունենանք, բայց հստակ պետք է գիտակցենք սա»,- ասաց նա:

Խաչատրյանը վստահեցրեց՝ այն, որ Գերմանիայի միջազգային համագործակցության ընկերությունը, ՎԶԵԲ-ը և Ավստրիական զարգացման գործակալությունը լինելու են ծրագրի հիմնական իրականացնողները, նշանակում է՝ ԵՄ կողմից զգալի երաշխիքներ են ստեղծվում, որ այստեղ այդ երևույթները պետք է նվազագույն մակարդակի լինեն:

ՀՀ փոխվարչապետ Մհեր Գրիգորյանը նշեց, որ ոչ թե տարածքային զարգացման ծրագիր պետք է կազմել, այլ պետք է ունենալ հստակ ծրագիր, և այս դրամաշնորհն ուղղակի տեղակայեն այդտեղ, այս դեպքում էլի շահեկան վիճակում կհայտնվեն: Նա ընդգծեց՝ ենթադրվում է, որ ծրագիրն արդեն մշակվել է, ինչը նշանակում է, որ խորհրդատվական կոնտենտը կնվազի:

ՀՀ կրթության և գիտության նախարար Արայիկ Հարությունյանն էլ հիշեցրեց՝ «Հորիզոն 20-20»-ը հաջորդ տարի ավարտվում է, ապա նկատեց՝ գուցե ծրագրում պետք է ավելացվի հաջորդ տարվանը, ասաց, որ հաջորդ տարի «Հորիզոն 20-20»-ը շարունակություն է ունենալու այլ անվանումով: