Ինչո՞ւ են Զարթոնքի բնակիչները պահանջում 23 տարվա գյուղապետի հրաժարականը. գյուղում բողոքի ցույցերը շարունակվում են

Երկրորդ օրն է` Արմավիրի մարզի Զարթոնք գյուղում բողոքի ցույցեր են. գյուղացիները պահանջում են գյուղապետ Պարույր Սարգսյանի հրաժարականը՝ նշելով, որ նա իր ղեկավարման 23 տարիների ընթացքում թալանել է գյուղը, որևէ աշխատանք չի կատարել գյուղի զարգացման ուղղությամբ:

Զարթոնքի բնակիչներից Սուրեն Պողոսյանը SHANTNEWS.am-ի հետ զրույցում պատմեց.

«Կոռուպցիա ենք բացահայտել, չարաշահում, քառօրյայի փողեր են կերել, մահացած անձանց անվան տակ կիսատ-պռատ, մասնակի վճարած փողեր են բացահայտվել: Գյուղի բյուջեն ծախսվել է սեփական կարիքների համար: Մենք ուզում ենք որ Զարթոնք համայնքում կատարվեն ուսումնասիրություններ, դիմել ենք Պետական վերահսկողական ծառայություն, թղթերն էնտեղ են, պիտի գան, ուսումնասիրեն: Թող գան, բացահայտեն: Մենք քննիչ չենք, մասնագետներ չենք, որ իմանանք` ինչքան գումար են փոխանցել, ուր են գնացել այդ գումարը, բայց որ կատարվել է թալան, ամեն ինչ, ակնհայտ երևում է»:

Ըստ նրա՝ խորհրդային տարիներից հետո համայնքի ղեկավարությունն իր ձեռքն է վերցրել գյուղապետի ընտանիքը՝ նախ` հայրը, ապա` որդին, իսկ այլ անձինք ընտրություններին չեն մասնակցել:

«432 մարդ է մասնակցել վերջին ընտրություններին, ու մենակ ինքն է եղել, երկու անգամ են հետը դրել, ծեծել, ջարդել, իրենցից բացի մարդ չի եղել»,- ասում է գյուղացին:

Նա նշում է, որ իրենք ոչ միայն գյուղապետի հրաժարականն են պահանջում, այլև ցանկանում են, որ գյուղում անցկացվեն ուսումնասիրություններ, պարզվի, թե այս տարիների ընթացքում ուր են կորել համայնքի բյուջեի միջոցները:

«Շնորհակալ ենք Մեծամորի բաժնի ոստիկաններից իրենց լավ ծառայության համար և անվտանգության ու վերաբերմունքի համար, լուրջ, հստակ գործերին ընթացք տալու համար, քրեական գործ է հարուցվել, դատախազություն բան է ուղարկվել, կոռուպցիա է բացահայտվել, Քառօրյայի մասնակիցների ու վիրավորների անվան տակ գումար է դուրս գրել, մենք բացահայտ փաստերով մարդկանց ներկայությամբ ապացուցել ենք, բայց ոչ մեկ վերևից չի արձագանքել, ուզում ենք, որ պարոն Վանեցյանը գա: Ճիշտ է, բաժինն աշխատում է, բայց շատ մեծ ռեսուրս կա, 23 տարվա պատմություն պիտի բացահայտվի»,- ասում է Սուրեն Պողոսյանը:

Այնպես չէ, որ գյուղապետի այլ թեկնածու ունեն գյուղում, կարծում է, որ ժողովրդի կամքով պետք է աշխատող մարդ զբաղեցնի այդ պաշտոնը: Նշում է.

«Այսօր մեր գյուղում շատ կան խելացի տղաներ, թե ժողովուրդն ում կորոշի, իր որոշումով պիտի լինի, առանձին անհատի որոշելով չպիտի լինի, այս մարդն ուզում է, թող աշխատի, լավ չի աշխատում, ուրիշը թող անի»:

Իսկ գյուղում, վստահեցնում է, բոլորն են համակարծիք, միայն թե գյուղի բնակչության մի մասը, որ ազգությամբ եզդի է, իր համոզմամբ, ճնշումների է ենթարկվում:

Նա վստահեցնում է, որ վաղը՝ ժամը 11։00-ին, վերսկսվելու են բողոքի ցույցերը, իսկ ամենաշատը վրդովվում է նրանից, որ իրենց բողոքի ցույցն առայժմ պատշաճ արձագանքի չի արժանանում: Նշում է.

«Նույնիսկ մարզպետը չի արձագանքում, մենք ենք գնացել մարզպետարան, տեղակալի՝ Կարեն Գրիգորյանի հետ ենք խոսել, պատասխանը մեզ չի գոհացրել: Այսպես շարունակելու դեպքում կդիմենք մինչև կառավարություն, մինչև վերջ, եթե արձագանք չգտավ, ունենք ամենավերջինը, կմնա գաղտնիք, եթե անենք, ոչ միայն հանրապետությունը, այլև ամբողջ սփյուռքը կտեղեկանա»: