Ցեխ ու անանցանելի ջրափոսեր Գյումրիի կենտրոնական ու երկրորդային փողոցներում

Գյումրիում կապ չունի տարվա որ սեզոնն ու եղանակն է, բնակիչների բողոքը փողոցների վիճակից է, պահանջն ու հարցումն էլ, թե վերջապես երբ է քաղաքը մաքրվելու ցեխից ու փոշուց: Իսկ պատասխանից առաջ արդեն ինչքան ժամանակ է շինարարության պատվիրատուն ու շինարարները ներողություն են հայցում:

Այս մոտեցումը շարունակելի է, հավանաբար, եթե հաշվի առնենք հետևյալը, 15 փողոցում կիսատ թողածն են ավարտելու, ևս 40-ն էլ նոր են նախ՝ քանդելու, հետո՝ սարքելու: Չոր եղանակներին փոշուց, անձրևներին ցեխից բողոքելու առիթների պակաս գյումրեցիներն էլի չեն ունենա: 

Գյումրիի Մազմանյան փողոցի բնակիչների օրը հենց այսպես էլ  սկսվում է, ու ամեն օր բահերով մաքրում են խորությամբ ու մեծությամբ Սավոյան փողոցի հետ համեմատվող փոսերը: Ցեխաջրերի համար ակոս են բացում, որ բակերում չկուտակվեն: Հարակից փողոցները նորոգված են , մեջտեղում մնացել է քայքայված Մազմանյանը, շինծրագրերում մերժված փողոցներից է, որտեղ կուտակվում են սարքած  փողոցներից եկող  ջրերը, սա էլ ջրահեռացման ցանցի բացակայության պատճառով է:

«Ջուրը կանցնի մե հարևանի դուռը, ընդեղից փողոցը, թռնելով չակուռկի պես կանցնինք քարեքար»,- փողոցի անանցանելի վիճակն այսպես է նկարագրում Մազմանյան փողոցի բնակիչներից մեկը:

«Հարևանի տուն չես կրա էրթաս, էրեխին դպրոցից գալուց բդի մեկը շալակելով բերե, որ ցեխերի մեջը չընկնի հանկարծ»,- ասում է նույն փողոցի բնակիչներից մյուսը:

Իսկ ռետինե կրկնակոշիկները ոչ միայն Մազմանյան փողոցի, այլ տասնյակից ավելի փողոցների բնակիչների գարուն-աշուն հավաքածուից դուրս չեն գալիս: Պահանջված  փոխնորդներն  իրենց տուն եկած հյուրերին են տալիս: Ցեխոտ ու ջրոտ փողոց միջքաղաքային տրանսպորտը չի մտնում:

«Մենք տռանսպորտ չունինք, բդի գանք, իջնինք շուկայի մոտ, ոտքով հասնինք տուն, կվախենան շոֆեռները մեր փողոց մտնին»,- դժգոհում է բնակչուհիներից մեկը:

«Շտապօգնությունը գուգա գերեզմանների դուռը կկայնի, բդի հիվանդին տանինք հասցնենք էնտեղ, որ նոր դնենք շտապօգնության մեքենան, տանին հիվանդանոց»,- ասում են բնակիչները:

Սովորական դարձած տեսարան է սա, որը բնակիչներին զայրացնում է,  իսկ կողքից նայողի համար ծիծաղելի է: Զավեշտալի դեպքերի պակաս չունենք Գյումրիի տանսյակ փողոցներում։

Սակայն ինչ տարբերություն հիմնանորոգվող և չհիմնանորոգվող փողոցների միջև: Երբ տեղումներ չկան, փոշուց ենք բողոքում, երբ տեղումներ են, ցեխն է անտանելի դառնում: Երկուսի դեպքում էլ գյումրեցիներին պատասխանատուները ասում են ներող եղեք, որի ուժի մեջ լինելու ժամկետը մի քանի անգամ հետաձգվել է:

Գերցեն փողոցի բնակիչները ներողամիտ են արդեն կես տարի: Փողոցաշինական մեծ ծրագրի մի մասնիկն էլ Գերցենն է կազմում: Փողոցը  կիսատ-պռատ եզրաքարեր ունի ու ընդամնեը ամրացված կամուրջը: Գոնե վերջինի դեպքում շահած են դուրս եկել: Մեկ կիլոմետր էլ չկա  փողոցի երկարությունը, բայց աշխատանքները նախագծային թերությունների պատճառով մնացին անավարտ, հիմա ամբողջ թաղամասով  ցեխի գերության մեջ են:

«Մե կտոր մը քանդեցին, բերեցին էդ շիբինը,  տռամբովկա էրէցին, հմի էդ էլ բացվել է, ասֆալտ չկա, փողոցը խայտառակ վիճակ է, չորս կողմը ցեխ է, մարդիկ տանից դուրս չեն գա»,- ասում է Գերցեն փողոցի բնակիչներից մեկը:

Հիմա կառուցվող փողոցների, թե չկառուցվողների բնակիչներն են շահել, արդեն հասկանալը բարդացել է, քաղաքի բոլոր հատվածներում  նույն անտանելի վիճակն է: Երբ են վերսկսելու, երբ են ավարտելու, գյումրեցիների շարունակ տրվող հարցերին մեկ պատասխան կա ՝ վերջնաժամկետը հունիսի 30-ն է, բայց դարձյալ այս ժամկետում հաշվի առնված չեն մայիսյան անձրևներն ու էլի նախագծային որոշ անճշտություններ, որոնք ակնարկում են շինարարները: