Սա շոուբիզնես չէ, այլ իրական երկիր. Ուկրաինայի ընտրությունների մասին SHANTNEWS.am-ը զրուցել է Գերագույն ռադայի պատգամավորի հետ

Ուկրաինայի նախագահական ընտրապայքարը հետաքրքիր ընթացավ: Վաղն արդեն ընտրություններն են և վերջին տվյալներով, ըստ սոցիոլոգիական հարցումների, առաջատարը կատակերգու դերասան Վլադիմիր Զելինսկին է, երկրորդ հորիզոնականում գործող նախագահ Պյոտր Պորոշենկոն է, իսկ երրորդում՝ Յուլիա Տիմոշենկոն:

Ուկրաինայի ընտրությունների և ուկրաինացիների ակնկալիքների մասին SHANTNEWS.am-ը զրուցել է Գերագույն ռադայում Պյոտր Պորոշենկոյի գլխավորած խմբակցության պատգամավոր Օկսանա Յուրինեցի հետ:

-Ինչպե՞ս եք գնահատում ուկրաինացիների տրամադրվածությունը առաջիկա ընտրություններին: Ներկա իրավիճակում ի՞նչ ակնկալիքներ ունեն քաղաքացիները։

Ես ցանկանում եմ նշել շատ կարևոր փաստ, որ Ղրիմի դեպքերից հետո և երկրի արևելքում ստեղծված ռազմական իրավիճակն, այնուամենայնիվ, մեզ մոտ ժողովրդավարությունը պահպանվել է: Եվ որքան էլ փորձեն կեղծ ինֆորմացիաներով այլ պատկեր ցուցադրել, այնուամենայնիվ, մենք տեսնում ենք, որ Ուկրաինայում կա դեմոկրատիա և հենց ուկրաինացիներն այսօր հնարավորություն ունեն ապագա նախագահին ընտրել: Սա երևի ֆենոմենալ է, որ մենք հիմա կարող ենք բոլորին ցույց տալ, որ ժողովրդավարական երկիր ենք, որտեղ ազատությունն ու մարդու իրավունքներն են առաջնային: Մարդիկ, որոնք 5 տարի առաջ դուրս են եկել Մայդան և կանգնել են իրեն ինքնիշխանության ու ազատության համար, այսօր արդեն կարող են պահպանել երկրի ժողովրդավարական համակարգը ու չթույլատրել իշխանության ուզուրպացում:

-Ընդհանուր առմամբ, Ուկրաինայի քաղաքացիները քաղաքական ո՞ր դիրքորոշման են հակված և ինչի՞ են ձգտում:

Ես, որպես Գերագույն ռադայի ՆԱՏՕ-ում պատվիրակության ղեկավար, կարող եմ ասել, որ եվրաինտեգրումը ու երկրի եվրաատլանտյան ուղղվածությունը մարդկանց համար կարևոր է, ու այդ դիրքորոշումը հաստատ չի փոխվի: Կոնկրետ իմ տարածքում՝ Լվովում, մարդկանց 80 տոկոսից ավելին համաձայն է այդ դիրքորոշման հետ: Այս հանգամանքը շատ կարևոր դեր ունի և ներկայումս նախագահի միայն մեկ թեկնածուի՝ գործող նախագահի նախընտրական ծրագրում է գրված երկրի քաղաքական դիրքորոշումն ու հետագա անելիքները այդ ուղղությամբ: Չնայած բոլոր թեկնածուներն էլ որպես կանոն իրենց տեսակետն են արտահայտում այդ ամենի վերաբերյալ, սակայն այնպես է ստացվել, որ նրանք այդ մասին չեն արձանագրել իրենց նախընտրական ծրագրերում:

– Իսկ ինչ կարծիքի եք նախընտրական քարոզարշավի մասին, ինչպե՞ս այն ընթացավ և ինչպե՞ս կգնահատեք ընտրապայքարը։

Ուղղակի կարող եմ ասել, որ ովքեր գոռում էին՝ «բռնեք գողին», հենց նրանք էին առաջին հերթին գլխավոր սադրիչներն ընտրապայքարում: Ցավոք սրտի, օլիգարխներին պատկանող ալիքները ամեն բան արեցին և գիտակցելով իրենց ազդեցությունը՝ աշխատեցին, որքան հնարավոր է շատ կեղտ շպրտել գործող նախագահի՝ Պյոտր Պորոշենկոյի ուղղությամբ: Բայց, այնուամենայնիվ, ես կարծում եմ, որ Ուկրաինայի ժողովուրդը գիտակից է և կարողանում է տարբերել ճիշտը կեղծիքից:  Օլիգարխներին պատկանող ալիքներով ֆեյքերի միջոցով շատերը բացարձակ ստեր էին հորինում և փորձում էին ամբողջ ինֆորմացիոն դաշտը ողողել կեղծ ինֆորմացիայով: Չնայած, իմ կարծիքով, նրանք այնքան էլ օգտակար չեղան իրենց ընտրապայքարի համար: Ընտրություններից հետո բոլորս էլ վերադառնալու ենք սովորական կյանք: Մենք վստահ ենք, որ նաև կլինի ընտրությունների հաջորդ փուլ, և այդ շրջանում ամեն ինչ իր տեղը կընկնի:

– Այս ընտրապայքարում դերասան Վլադիմիր Զելինսկին աչքի ընկավ: Ի՞նչ կարծիք ունեք նրա մասին:

Դա իրոք ֆենոմենալ է, քանի որ մարդն առաջին անգամ է առաջադրվում նախագահի թեկնածու և նա ընդհանրապես գաղափար չունի պետական կառավարման ոլորտի մասին: Սա, փաստացի, այսպես ասած, մեդիա փուչիկի է վերածվել, որն այժմ ընտրական գործընթացները և ընտրապայքարը վերածել են զավեշտի: Իհարկե երիտասարդներին այս ամենը հետաքրքրում է, բայց մենք հասկանում ենք նաև այն հանգամանքը, որ երիտասարդությանը քվեարկության բերելը արդեն լրիվ այլ հարց է ու ասել, որ աջակցում ենք, դա դեռ չի նշանակում, որ այդ աջակցությունը վաղը՝ ընտրություններին իրական կերպով կարտահայտվի:

-Դուք կարծո՞ւմ եք, որ Զելինսկին ուղղակի մեդիափուչիկ է: Վերջին հարցումներով նրա վարկանիշը ամենաբարձրն է:

Այո սոցհարցումներով նա առաջին հորիզոնականում է, բայց մենք հասկանում ենք, որ վերջին տարիներին պոպուլիզմը տարածվել է բոլոր երկրներում ու հասկանալի է, որ տվյալ պահին նրանց թիմը կարողացել է բռնել համընթաց ալիքը: Ես կարծում եմ իր թիմին դա հաջողվեց՝ ունենալով մեդիան ու հեռուստաէկրաններին միշտ երևացող թեկնածու: Այդ քայլն, իհարկե, աշխատեց: Այս դեպքը հավանաբար կգրեն քաղտեխնոլոգների գրականությունում: Նշեմ, որ այս ամենը նաև շատ վտանգավոր է մեր երկրի համար: Երկրի արևելքում պատերազմական իրավիճակ է և ինձ համար շատ կարևոր է, որ մենք հասկանանք պատասխանատվությունը: Վաղը ընտրություններում կարևոր է, որ քաղաքացիները գիտակցեն, որ պետք է ընտրեն նախագահ, որը ուժեղ է դիվանագիտության մեջ:

-Պատկերացնենք մի իրավիճակ, երբ Պյոտր Պորոշենկոն չի հաղթում և նախագահ է դառնում Զելինսկին: Ի՞նչ կլինի հետո:

Ես լավատես եմ և վստահ եմ, որ երկրորդ փուլում կհաղթի գործող նախագահ Պյոտր Պորոշենկոն, քանի որ նա արդեն շատ բան է արել և անհրաժեշտ է ավարտին հասցնել երկրի համար կարևոր աշխատանքը: Ես քաղաքականապես չեմ պատկերացնում, որ հնարավոր է հաղթի մի մարդ, որը բացարձակ կապ չունի պետական համարկարգի հետ: Իմ երկիրը ֆեյք չէ ու պետք չէ քվեարկել հանուն զավեշտի: Ընտրելուց առաջ պետք է մտածենք: Սա շոուբիզնես չէ, այլ իրական երկիր է: