Գյումրիի պետական դրամատիկական թատրոնը տնօրենի իր թեկնածուն ունի

Ապրիլի 26-ին կանցկացվի Գյումրիի Աճեմյանի անվան պետական դրամատիկական թատրոնի տնօրենի ընտրության մրցույթ։ Այսօր թատրոնում տեղի ունեցած ընդլայնված Ժողովի ժամանակ հայտարարվել է գեղարվեստական խորհրդի ու կոլեկտիվի կայացրած որոշման մասին։

Թատրոնն ունի տնօրենի իր թեկնածուն, նա գեղարվեստական ղեկավար և տնօրենի ժամանակավոր պաշտոնակատար Լյուդվիգ Հարությունյանն է։ Նա առայժմ միակ թեկնածուն է:

Գյումրիի թատրոնի տնօրենի պաշտոնը թափուր է արդեն 5 ամիս: Տիգրան Վիրաբյանին Երևանի քաղաքապետի տեղակալ նշանակելուց հետո տնօրենի պարտականությունները կատարում է գեղարվեստական ղեկավար Լյուդվիգ Հարությունյանը:

Գեղարվեստական ղեկավարի ու տնօրենի պաշտոնների համատեղությունը օրենքով թույլատրելի չէ: Հիմա թատրոնը պատրաստվում է նոր տնօրենի մրցույթի, իսկ իրենց թեկնածուն, հայտարարել են` Լյուդվիգ Հարությունյանն է։

Ներկաների խոսքերով` սա թատրոնն ավելորդ ցնցումներից ու խնդիրներից հեռու պահելու ամենաճիշտ որոշումն է։

Աճեմյանցիները վստահ են, որ այսօր Գյումրիի թատրոնը ճանաչման խնդիր չունի, վերջապես եկել է ժամանակը, որ այդ ճանաչումը ամբողջ ստեղծագործական խմբով պահպանեն: Շատ ծրագրեր ունեն, իսկ դրանք իրականացնելու համար այս թատրոնի կյանքով ապրող ու թատրոնի մոտ կանգնած անձ է պետք:

Լյուդվիգ Հարությունյանն էլ նշում է, որ իրենք չեն կարող որևէ մեկին արգելել մրցույթին մասնակցել, մրցույթը բաց է, բայց ինքը հասկացել է մեկ բան, որ նա, ով գիտի թատրոնի խնդիրները, ավելի հոգատար կլինի կառավարման գործում։ Գեղարվեստական ղեկավարն ավելացնում է, թատրոնի դռները բաց են գեղարվեստական նոր որակ ստեղծողների, նոր բեմադրիչների համար, իսկ փորձարկումների ժամանակն Աճեմյանի թատրոնում արդեն անցել է:

Գեղարվեստական ղեկավարը վստահ է, որ տնօրեն ընտրվելու դեպքում թատրոնի գեղարվեստական որակը չի տուժի, այստեղ էլ ունեն լավ թեկնածուներ: Նախկին տնօրենի հեռանալուց հետո, թեև որոշակի տատանումներ թատրոնում եղել են, բայց ըստ Լյուդվիգ Հարությունյանի, թատրոնը կառավարման աշխատանքում չի թերացել: Եվ արդյունքն այն է, որ աճեմյանցիները դեռ հրավերներ են ստանում: Շուտով հյուրախաղերով կլինեն Իրանում և Ավստրալիայում:

Ըստ Լյուդվիգ Հարությունյանի` Գյումրիի թատրոնի մասին ավելի շատ խոսում են դրսում, քան քաղաքային իշխանությունները։ Ասում է, թատրոն քաղաքային իշխանության ներկայացուցիչները գալիս են այն ժամանակ, երբ ինչ-որ ղեկավար է լինում թատրոնում։ Սա գեղարվեստական ղեկավարին անհանգստացնում է, բայց և նշում է, որ թատրոնն աջակցության կարիք չունի, միայն հոգատարության ու ուշադրության կարիք ունի։

Աճեմյանցիները Թատրոնի օրվա առիթով այս տարի էլ մրցանակների են արժանացել: Արվեստի վաստակավոր գործիչ, դերասան Սամվել Գրիգորյանն արժանացել է մշակույթի նախարարության ոսկե մեդալի, ՀՀ վաստակավոր արտիստ Յուրի Ոսկանյանը՝ «Արտավազդ» մրցանակի, դերասան Արսեն Սաղաթելյանը` պատվոգրի:

Այս հանդիպմանը թատրոնի կոլեկտիվը հիշեց ու շնորհավորեց Խորեն Աբրահամյանի 89-ամյակը` հատուկ շեշտելով, որ նրա ղեկավարած տարիներին Գյումրիի թատրոնը ստեղծագործական մեծ վերելք է ունեցել: