Օպերային թատրոնի աշխատակիցները հակափաստարկները ներկայացրել են վարչապետին, սպասում են արձագանքի

Ալ. Սպենդիարյանի անվան Օպերայի և բալետի ազգային ակադեմիական թատրոնի աշխատակազմը, պայմանավորվածության համաձայն, ի հակակշիռ Կոնստանտին Օրբելյանին պաշտոնանկ անելու փաստարկների, կառավարության ղեկավարին է ուղարկել հակափաստարկների մի խումբ: Դիրիժոր Հարություն Արզումանյանը, SHANTNEWS.am-ի հետ զրույցում ներկայացնելով վարչապետ Նիկոլ Փաշինյանի հետ իրենց ունեցած հանդիպմանը հաջորդած զարգացումները, նշեց.

«Երեկոյան մեզ ուղարկեցին փաստարկները, արդեն ուշ էր, չէինք հասցնի պատասխանել, մյուս օրը հակափաստարկներ ենք ներկայացրել՝ 12 էջանոց, մանրակրկիտ պատասխաններով, բոլոր հիմքերով, որ չծանրաբեռնվի պատասխանը, օրենքի հիմքերը կամ նախարարության հետ նամակագրական կապի հիմքերը, օրինակները, առանձին ուղարկել ենք: Երեկ երեկոյան ուղարկել ենք, այսօր պետք է ծանոթանան, դրանից հետո տեսնենք՝ կա´մ մեզ մոտ, կա´մ իրենց մոտ կհանդիպենք, ամեն դեպքում, ցույց ենք տվել, որ իրենց ներկայացրած փաստարկների մեծամասնությունը սուտ է»:

Հարցին՝ ո՞ւմ հետ է հանդիպումը՝ վարչապետի՞, թե՞ մշակույթի նախարարի պարտականություններն իրականացնող Նազենի Ղարիբյանի, նա պատասխանեց.

«Հուսով եմ՝ Փաշինյանի հետ, Ղարիբյանի հետ խոսելու բան չկա, նա դեմագոգիայով է զբաղված»:

Արզումանյանն ասաց, որ ներկայացված փաստաթղթում անդրադարձել են Օրբելյանի օրոք արձանագրված 92 մլն դրամի խախտումների մասին մեղադրանքներին, տեղեկացրեց՝ ժամկետներով ցույց են տվել, որ խոսքը Օրբելյանից 3 տարի առաջվա մասին է:

«Առանց ժամկետները գրելու՝ Փաշինյանին են ներկայացրել, տպավորություն է ստեղծվել, որ Օրբելյանի օրոք խախտումներ են կատարվել, բայց ոչ մի խախտում էլ չի կատարվել, ամբողջը կեղծիք է, սուտ է: Երկրորդը՝ ասում են՝ Օրբելյանը նշանակվել է առանց մրցույթի, մենք ցույց ենք տալիս, որ օրենքում նշված է եղել՝ կարող է նշանակվել նաև հիմնադրի որոշմամբ: Կետեր էլ կան, որոնց համաձայն՝ ցանկացած համաշխարհային անուն ունեցող արվեստագետ կարող է նշանակվել՝ առանց մրցույթի, այսինքն՝ այդ աբսուրդ տեքստերը լրացնելու, օրենքները «զուբրիտ» անելու կարիք չկա, եթե համաշխարհային մրցույթների դափնեկիր է, փառատոնների կազմակերպիչ, նշանավոր նվագախմբերի դիրիժոր կամ գեղարվեստական ղեկավար՝ առնվազն 10 տարի: Մի խոսքով, մեծ պարբերություններ կան, որոնց համապատասխան էլ կառավարության որոշում է կայացվել՝ երեք տարով, այսինքն՝ ինչ օրենքի խախտում կա այստեղ»,- ասաց նա:

Դիրիժորն անդրադարձավ նաև պնդումներին, թե գեղարվեստական ղեկավարը գեղարվեստական աշխատանք չէ, այլ «տնօրինական», ասաց՝ ՊՈԱԿ-ների բոլոր օրենքները բերել են, որտեղ ասվում է՝ գեղարվեստական ղեկավարն իրավունք չունի ոչ մի հրաման տալ, բոլոր հրամանները տալիս է տնօրենը, տնօրենն էլ ազատում է գեղարվեստական ղեկավարին, իսկ գեղարվեստական ղեկավարը ոչ մի հրաման տալ, ոչինչ չի կարող անել: Բացի դրանից՝ ըստ օրենքի՝ գեղարվեստական ղեկավարը ստորադաս է, և տնօրենն իրավունք չունի զբաղեցնել այլ պաշտոն, բացի ստեղծագործական, գիտական և այլ պաշտոններից:

«Բողոքներ են եղել օպերայից, որ ժամանակին ինչ-որ մարդկանց են գործից հեռացրել, այնտեղ մի մարդ է բողոքել, նախկին իրավաբանական բաժնի պետը, որ մինչև Օրբելյանի պաշտոնավարելը միաժամանակ երկու պաշտոն է զբաղեցրել՝ իրավաբանական և կադրերի բաժնի պետի պաշտոնները, ստացել է անթիվ, ահռելի աշխատավարձ՝ ոչ մի գործ չանելով, այդ մարդը 17 անգամ պաշտոնապես բողոք է ներկայացրել… Դատի տալ չէր կարող, քանի որ իրավունք չուներ այդ պաշտոնները համատեղել, բայց բողոք է ներկայացրել, որ Օրբելյանի պաշտոնավարումն անօրինական է, 17 անգամ միայն մշակույթի նախարարություն է բողոք ներկայացրել, 10 անգամ նախարարին, ԱԺ և այլն, այդ բողոքների ճնշող մեծամասնությունն այդ կինն է ներկայացրել՝ Քրիստինե Նաղդալյանը: Հենց սկզբից իրենք բողոքել, գրել են, ու կոչվում է՝ «բազմաթիվ բողոքներ»,- ասաց նա:

Արզումանյանն ասաց՝ երբ ողջ հանրապետությունում ասում էին՝ ՊՈԱԿ-ներում կրճատումներ արեք, Օպերային թատրոնի ստեղծագործական կազմից ոչ մեկին Օրբելյանը չկրճատեց, այլ 5 փոխտնօրենից 3-ին, որ քիչ ադմինիստրացիա լինի, այսինքն՝ միայն ադմինիստրատիվ մասում է կրճատում եղել, իսկ այդ կրճատումն էլ հենց նախարարությունն էր պարտադրել:

Հետաքրքրվեցինք՝ ինչո՞վ էր պայմանավորված Օրբելյանի՝ 2018թ. 194 օր աշխատանքից բացակայելու փաստը, որի մասին իրենց հետ հանդիպմանը խոսեց ՀՀ վարչապետը, ինչին Արզումանյանն արձագանքեց.

«Խնդիրը հետևյալն է՝ նախ, երբ մենք հարցնում էինք՝ հարգելի´ տիկին Ղարիբյան, ինչո՞ւ մեր պրեմիերաներից ոչ մեկին չեք եկել, նա ասաց՝ ե՞րբ է եղել, ասեք՝ ասեմ: Ասացինք՝ հոկտեմբերին, ասաց՝ դե ես ամբողջ հոկտեմբերը Հայաստանում չեմ եղել, նոյեմբերին «Մանոն»-ն է եղել, «Կարմեն»-ը, ասաց՝ դե ես նոյեմբերի մեծ մասը Հայաստանում չեմ եղել, այսինքն՝ իրեն կարելի է: Բացակայությունները եղել են այսպես. օրերի մի մասն ավելացված, չափազանցրած է: Հայաստանից բացակա լինելու 100 տոկոսը նախարարության թույլտվությամբ գործուղում է եղել. նախօրոք դիմում է տրվել և համաձայնեցվել, այսինքն՝ եթե ի վերջո գումարվելու էր, ասելու էր՝ անօրինական է, ինչո՞ւ է թույլտվություն տվել»:

Դիրիժորը նաև ասաց՝ այդ գործուղումները եղել են Օրբելյանի հաշվին և հրավիրող կողմի հաշվին, դրա արդյունքում պայմանագրեր են կնքվել, այսինքն՝ նա նպատակային է գնացել, թեպետ եղել են այցելություններ՝ իր անձնական գործերով կամ, երբ «Գրեմմիի» հավակնորդ էր: Ամեն դեպքում, Արզումանյանը պնդում է՝ այդ գործուղումների արդյունքում է, որ գնացել են և 10 ներկայացում են խաղացել արտերկրում:

«Ինքն է ամբողջն արել, այդ մարդիկ չեն եկել, հիմա էլ 2020թ. համար մեծ հյուրախաղեր է կազմակերպել ԱՄՆ, այդ ամենը հեշտ չի արվում, ե՞րբ ենք մենք գնացել նման հյուրախաղերի, եթե այստեղ նստեր, ո՞նց էր կազմակերպվելու, բայց այստեղ կազմակերպում է պրեմիերաներ: Այսինքն՝ այդ բացակայությունների շնորհիվ է, որ այստեղ պրեմիերաները եղան, հետո էլ հյուրախաղերը»,- ասաց նա: