Մանվել Գրիգորյանը մտածում էր, որ Հայաստանում թշնամիներ չունի, ավաղ, կարող է և սխալված լինի. պաշտպան

Վերաքննիչ քրեական դատարանում այսօր քննվում էր ԵԿՄ վարչության նախկին նախագահ Մանվել Գրիգորյանի կալանքը երկարաձգելու որոշման դեմ պաշտպանական խմբի ներկայացրած բողոքը: Մանվել Գրիգորյանի պաշտպան Արսեն Մկրտչյանը լրագրողների հետ զրույցում նշեց, որ բողոքի քննությունը հետաձգվեց մինչև ապրիլի 8-ը: Նիստը շատ կարճ տևեց, որովհետև գործում ներգրավվել էր նոր պետական մեղադրող, անհրաժեշտ էր ժամանակ հատկացնել, որ նա ծանոթանա գործի նյութերին, հենց նա էլ միջնորդել է, որ նիստը հետաձգվի:

«Դատախազը նոր էր ներգրավվում, նյութերին պիտի ծանոթանար,  քննիչն էլ, ըստ ավանդույթի, չէր ներկայացել՝ պատճառաբանելով, որ ծանրաբեռնված է, մենք չառարկեցինք, քանի որ արհեստական խոչընդոտներ ստեղծելու ցանկություն էլ չկա»,- հայտնեց նա:

Մկրտչյանն ասաց, որ իր պաշտպանյալի առողջական վիճակում տարբերություն գրեթե չկա, թեպետ բժիշկների միջամտությունն իր դրական արդյունքը համեմատաբար տալիս է: Պաշտպանը պնդեց, որ Մանվել Գրիգորյանի կալանքի երկարաձգումն, ինչպես նաև մեղադրանքն անհիմն են համարում: Հարցին՝ գործի նյութերին ավելի մանրամասն ծանոթանալուց հետո ինչ է պարզ դառնում, նա պատասխանեց.

«Այն, ինչ ի սկզբանե պարզ էր, հիմա փաստերով ավելի հիմնավորված է և ապացուցված՝ «զինվորի սնունդ», «յուրացում», էդ վախենալու, վարկաբեկիչ բառերը որ կան, նման բան չկա: Ո´չ նման ապացույցներ կան, ո´չ էլ ցուցմունքներ: Ինձ մոտ տպավորություն է ստեղծվում, որ լրագրողներն ուզում են ԱԱԾ-ին ամեն կերպ ներքաշած լինեն դատական պրոցեսի և նախաքննության մեջ: ԱԱԾ-ն փայլուն կատարել է իր աշխատանքը, հայտնաբերել է իրեր, որոնք կարող են առնչություն ունենալ քրեական հանցագործության հետ, այդ օպերատիվ-հետախուզական աշխատանքները կատարվել են պատշաճ կերպով»:

Պաշտպանից հետաքրքրվեցին՝ չկա՞ն ապացույցներ, թե ինչպես են Մանվել Գրիգորյանին պատկանող տարածքներում հայտնվել այդ իրերը: Մկրտչյանն ասաց, որ նման ապացույցներ չկան, հակառակ դեպքում «ինչ-որ մուլտիպլիկացիոն ֆիլմով կամ ինչ-որ բանով կներկայացվեին»: Պաշտպանը կոչ արեց նախաքննությունը, օպերատիվ աշխատանքները և դատաքննությունը տարանջատել:

«Օպերատիվ-հետախուզական աշխատանքներից մինչև ավարտը ոչ ոք որևէ դժգոհություն չի հայտնել, մարդիկ գնացել են, հայտնաբերել չգրանցված զենք-զինամթերք, ինչ-որ այլ գույքեր, այդ վարկածը տվել են քննչականին, դրան այս փուլում այլևս անդրադառնալու իմաստ էլ չկա, իրավունք էլ, հետաքրքիր էլ չէ: Սպաները, որ անում են աշխատանքը, ասում են՝ տեսել ենք՝ սա, սա կա, իսկ թե դա ոնց պետք է գնահատվի, հանցակազմ կա՞, թե՞ ոչ, մեր պաշտպանյալը կամ ընտանիքի անդամներն առնչություն ունե՞ն, թե՞ ոչ, այդ ամենի վերջնական գնահատականը պետք է տա դատարանը»,- ասաց նա:

Լրագրողները փորձեցին պարզել՝ ինչպես են այդ իրերը, զենք-զինամթերքը հայտնվել Գրիգորյանի պահեստում:

«Դա իմ հարցը չէ, ոչ էլ Մանվել Գրիգորյանի հարցն է: Նա ասում է՝ ես կապ չունեմ դրա հետ, և իրականում կապ չունի, ես ունեմ պաշտպանական վարկածներ՝ միտումնավոր այնտեղ են բերվել կամ բերվել են երրորդ անձի կողմից: Այդ տարածքով հազարավոր մարդիկ անցնում էին, կարող էին անցնել»,- ասաց պաշտպանը:

Ճշտող հարցին՝ Գրիգորյանի առանձնատան տարածքով հազարավոր մարդիկ կարո՞ղ էին անցնել, նա արձագանքեց.

«Խոսքն առանձնատան մասին չէ, մասնավորապես այդ ամենավախենալու հայտարարությունները վերաբերում են Ակնալճին»:

Հարցին՝ պաշտպանն ընդունո՞ւմ է, որ այդ իրերը պիտի չլինեին այդ տարածքում, նա պատասխանեց, որ կարող է և դրանց մի մասը պիտի չլիներ, մի մասն էլ, որ կա, ոչ մի հանցագործություն չկա դրա մեջ: Մկրտչյանն ասաց՝ կարող է բացատրություն տալ՝ ինչու է այս կամ այն իրը այս կամ այն տեղում հայտնվել, բայց դա ավելի ճիշտ կլինի դատարանում անել, որպեսզի պաշտպանական ռազմավարություն չբացահայտի:

Մկրտչյանը, պատասխանելով հարցին՝ ո՞վ կարող էր այդ իրերը բերած լինել Գրիգորյանին պատկանող տարածքներ, արդյոք նա ուներ թշնամիներ կամ չուզողներ, ասաց.

«Կունենար և´ թշնամիներ, և´ չուզողներ: Նա մտածում էր, որ Հայաստանում թշնամիներ չունի: Ավաղ, կարող է և սխալված լինի, իսկ չուզողները, դե, ոնց կլինի բա, մեր ազգում մեզ բնորոշ են չուզողները, ես չուզող ունեմ, դուք էլ երևի չուզողներ ունեք»: