Ո՞վ է ավտոգազի թանկացման պատճառը և ո՞ւմ ծնոտին է վարչապետը հարված հասցնելու

Կառավարության փետրվարի 15-ի նիստում հավանության արժանացած Հարկային օրենսգրքում փոփոխություն կատարելու նախագծով ապրիլից Հայաստանի ավտոգազալցակայաններում գազը պետք է վաճառվի քաշով, ինչը պետք է որ նվազեցնի մեքենաների թերի լիցքավորման ռիսկը։ Ապրիլի 1-ից, սակայն, վարորդները դժգոհության ալիք են բարձրացրել, թե տարբեր լցակայաններում գազի լիցքավորման համար ավելի շատ փող են ուզում, քան նախկինում:

Խնդրի հետքերով SHANTNEWS.am-ը գնացել է ոչ միայն գազալցակայաններ, այլև կառավարություն, Պետեկամուտների կոմիտե և վարորդների իրավունքների պաշտպանությամբ զբաղվող կառույցներ: «Վարորդի ընկեր» կազմակերպության փոխնախագահ Դավիթ Պեդանյանը վստահ չէ, որ ապրիլի 1-ից բազմաթիվ գազալցակայաններում միաժամանակ գլուխ բարձրացրած այս խնդիրը պատահական է: Ասում է՝ հնարավոր է, գործ ունենք ներքին պայմանավորվածության հետ:  Այժմ, սակայն, գինը կարգավորվել է կառավարության ստուգումների արդյունքում:

Գինը կարգավորվե՞լ է, թե՞ ոչ: Ճշտելու համար ինքներս այցելեցինք մի քանի գազալցակայան: Արտաքուստ ոչինչ չի փոխվել, վարորդներն էլ մեկ մարդու պես խուսափում են խոսել՝ արդարանալով, թե չեն ուզում հարաբերություններ փչացնել լցակայանի աշխատողների հետ:

Պետեկամուտների կոմիտեի նախագահը ապրիլի 3-ի ասուլիսում նշեց գազալցակայանների թիվ, որոնց նկատմամբ հատուկ ստուգումների գործընթաց է սկսվել:

«35 գազալցակայաններում ՊԵԿ-ը ստուգումներ է իրականացրել,  այդ ստուգումների արդյունքում 22 միլիարդ դրամի հարկային պարտավորություն է առաջադրվել»,-նշեց Անանյանը:

Դա, իհարկե, անմիջական կապ չունի գազի թանկացման վերջին դեպքերի հետ, սակայն հարկային պարտավորությունների կատարման ցուցանիշն ու օրինական աշխատանքը փոխկապակցված են:

Կառավարության նիստում վարչապետ Նիկոլ Փաշինյանը Շուկայի վերահսկողության տեսչական մարմնի ղեկավարից հարցրեց գազի թանկացման պատճառների մասին:

«Որպես այդպիսին՝ գազի գնի փոփոխություն տեղի չի ունեցել: Ուղղակի խնդիրն այն է, որ ամսական միջին հաշվարկներով՝ գազի խտությունը վերջին տարիներին եղել է 7.1, բայց վերջին 3-4 օրվա ընթացքում «Գազպրոմ-Արմենիա»-ից գազի միջին խտությունը գալիս է 7.9-ով, այսինքն՝ աճել է, հետևաբար, տնտեսվարողներն իրենց ծրագրային փոփոխությունների մեջ պետք է դա անեին, որը չեն արել: Հետևաբար, մեր սպառողներն ստիպված են եղել ավելի գումար վճարել, որի համար Շուկայի վերահսկողության տեսչական մարմինը բոլոր տնտեսվարողներին տեղեկացրել է, որ անպայման ամեն օր փոփոխություն կատարեն իրենց դիսպենսերներում և ճիշտ խտություն տեղադրեն, որպեսզի սպառողներն ստիպված չլինեն ավելի գումար վճարել»,- ասաց Շուկայի վերահսկողության տեսչական մարմնի ղեկավար Արմեն Կոտոլյանը:

Վարչապետ Նիկոլ Փաշինյանը մանիպուլյացիա անվանեց ավտոգազի թանկացումն ու փետրվարին կառավարության հաստատած նախագիծը միմյանց կապելը՝ կոչ անելով զերծ մնալ սադրանքներից.

«Ես էլի ուզում եմ կրկնել, որ որոշ նախկին օլիգարխներ, եթե մտածում են, որ իրենք կարողանալու են այս իրավիճակում մանիպուլյացիաների դաշտ մտնել, սխալվում են: Ես էլի բոլորին ուզում եմ զգուշացնել արդեն վերջին անգամ, որ մեր բարեկրթությունը որևէ մեկը չփորձի մեկնաբանել որպես թուլություն, թե չէ շատ դաժան հակահարված կստանան անձնապես, բոլորը՝ առանց բացառության: Որևէ մեկը թող չտրվի գայթակղությանը ժողովրդի վստահությունը վայելող կառավարության հակահարվածի ուժն իր ծնոտին զգալու: Ես սա շատ ուղիղ եմ ասում և շատ հասցեական եմ ասում: Հետևաբար, Շուկայի վերահսկողության տեսչությունը, Պետական եկամուտների կոմիտեն, մյուս այն մարմինները, որոնք ունեն իրավասություններ, շատ արագ արձագանքում են և գտնում են շատ խիստ պատժի ենթարկելու այն տնտեսվարողներին, ովքեր այս իրավիճակում փորձում են որոշակի մանիպուլյացիաներ անել»: