Բնապահպանության նախարարությունը «փորձում է խլել» ԱԻՆ կազմում գործող կառույցը, ԱԻՆ-ը դեմ է․ նախագիծ

Բնապահպանության նախարարության կողմից կառավարության հավանությանն է ներկայացվել նախագիծ, որով առաջարկվում է ԱԻՆ-ից վերցնել ու բնապահպանության նախարարության կազմի մեջ մտցնել «Հիդրոօդերևութաբանության և մթնոլորտային երևույթների վրա ակտիվ ներգործության ծառայություն» ՊՈԱԿ-ը, որն իրականացնում է հետևյալ գործառույթները․

«Հիդրոօդերևութաբանական երևույթների ռեժիմային ու հատուկ դիտարկումների, ուսումնասիրությունների և կանխատեսումների իրականացման ապահովման, մթնոլորտային երևույթների վրա ակտիվ ներգործության աշխատանքների համակարգում»։

Բնապահպանության նախարարությունը համարում է, որ նախագծի հիմքում դրված է «շրջակա միջավայրի մոնիտորինգի» միասնական ապահովման գաղափարը, ինչը պետք է վերապահվի իրենց։ ԱԻ նախարարությունը, ըստ օրակարգում ներառված փաստաթղթերի, դեմ է այսպիսի վերակազմակերպմանը։

ԱԻՆ դիտարկումներին պատասխանել են բնապահպանության նախարարությունից, ինչը հատվածաբար ներկայացնում ենք «բանավեճի» տեսքով․

ԱԻ նախարարություն
«Ներկայիս հիդրոմետ ծառայության օդերևութաբանության կենտրոնի եղանակակլիմայական պայմաններին վերաբերող փաստացի դիտարկումները և կանխատեսումները օպերատիվ կերպով տրամադրվում են Արտակարգ իրավիճակների նախարարության բոլոր ծառայություններին, այդ թվում՝ Ճգնաժամային կառավարման ազգային կենտրոնին: Պարբերաբար իրականացվում են տեղային կանխատեսումներ և հաճախականացված դիտարկումներ, արտակարգ իրավիճակներում արագ արձագանքման և բնակչության պաշտպանության համար»:

 

Բնապահպանության նախարարություն
«Հիդրոօդերևութաբանության և մթնոլորտային երևույթների վրա ակտիվ ներգործության ծառայություն» ՊՈԱԿ-ի միացման ձևով վերակազմակերպումը խոչընդոտ չի հանդիսանա, որպեսզի տեղեկատվությունը պատշաճ կարգով տրամադրվի բոլոր կազմակերպություններին»։

 

ԱԻ նախարարություն
«… Կառավարության ծրագրով, որպես առաջնահերթություն և գերակա խնդիր, ներառված է նաև առավել արդյունավետ հակակարկտային համակարգի լայնամասշտաբ ներդրման անհրաժեշտությունը: … Հրթիռային համակարգի օգտագործումը նպատակահարմար է իրականացնել արտակարգ իրավիճակների նախարարության կողմից, քանի որ վերջինս լուծում և ապահովում է դրանց անվտանգությանը վերաբերող բոլոր հարցերը»։

 

Բնապահպանության նախարարություն
«Կառավարության կառուցվածքի և գործունեության մասին» Հայաստանի Հանրապետության օրենքում փոփոխություն և լրացում կատարելու մասին» ՀՀ օրենքի նախագծում, հակակարկտային հրթիռային պաշտպանության գործառույթների մասով, լիազոր մարմնի փոփոխություն չի նախատեսվում»։

 

ԱԻ նախարարություն
«Հասկանալի չէ սույն նախագծի ռազմավարական և մարտավարական նպատակը: Բնապահպանության նախարարության հիմնավորմամբ ակնկալվող միակ արդյունքը շրջակա միջավայրի մոնիթորինգի միասնական ու ժամանակակից համակարգերի ներդրումն է: Անտեսված է հակակարկտային պաշտպանության, օդերևութաբանության, հիդրոլոգիայի և կլիմայի փոփոխության ոլորտների որևէ ակնկալվող բարեփոխում ու արդյունք»:

 

Բնապահպանության նախարարություն
«Ժամանակակից միասնական ու արդյունավետ մոնիթորինգի համակարգը հիմք է հանդիսանալու ոչ միայն հակակարկտային պաշտպանության, օդերևութաբանության, հիդրոլոգիայի և կլիմայի փոփոխության ոլորտների արդյունավետ կառավարման, այլ ընդհանրապես, ամբողջ շրջակա միջավայրի, ինչպես նաև այլ մարմիններին վերապահված ոլորտների քաղաքականության մշակման և իրականացման համար։ Ուստի՝ այս առումով անհրաժեշտ ենք համարում նշել, որ նախագծի բուն նպատակը հենց հանդիսանում է շրջակա միջավայրի մոնիթորինգի միասնական ու ժամանակակից համակարգերի ներդրումը»։

 

ԱԻ նախարարություն
«Կարևորելով բնապահպանության նախարարության «Շրջակա միջավայրի մոնիթորինգի և տեղեկատվության կենտրոն» պետական ոչ առևտրային կազմակերպության դերն ու նշանակությունը՝ այդուհանդերձ շրջակա միջավայրի մոնիթորինգի միասնական համակարգի ստեղծումը մեկ կառույցում կբերի դաշտի վերահսկողության մենաշնորհի»:

 

Բնապահպանության նախարարություն
«Անհասկանալի է «շրջակա միջավայրի մոնիթորինգի միասնական համակարգի ստեղծումը մեկ կառույցում կբերի դաշտի վերահսկողության մենաշնորհի» ձևակերպումը, քանի որ չի նկարագրվում որևէ բացասական հետևանք, որին կարող է հանգեցնել ՊՈԱԿ-ի վերակազմակերպումը»։