Հեղեղումների վտանգ Շիրակի մարզի Ողջի գյուղում

Ամասիա խոշորացված համայնքի Ողջի գյուղում սողանքավտանգ հատվածներ են առաջացել և հեղեղումների վտանգ է, իսկ պատճառը գյուղի սելավատարի խողովակների ապամոնտաժումն է: Սելավաջրերը հոսում են բաց հունով, կուտակվում են ու առաջացնում լճակներ ու ճահիճներ, ինչի հետևանքով սողանքային հատված է գոյացել, որը փլուզման վտանգ է ստեղծել տների համար:

Սելավաջրերի հեռացման  համակարգը գյուղում գործել է մինչև 2011 թվականը: Սելավատարը պատվար է ունեցել և խողովակաշար, որը ոչ միայն Ողջի, այլև հարևան մյուս գյուղերը ապահովագրել է հեղեղումներից: Դրանցով սելավաջրերը հոսել են դեպի Ախուրյան գետը: 2011-ից մաս-մաս խողովակները սկսել են ապանոտաժել: Ինչպես այդ տարիներին, այնպես էլ հիմա, շատ բան գյուղի վարչական ղեկավարին էլ անհայտ է, թե ով, ինչու և ինչպես է Ողջիի սելավատարի խողովակներն ապամոնտաժել:

«100-120 մետր երկարությամբ խողովակներ էին, չգիտեմ ինչ պատճառով, միայն խոսակցություններից եմ լսել, որ խողովակները հայտնվել են Տեղ գյուղի բալանսի մեջ: Ջրօգտագործող ընկերությանն են պատկանել, որը հետո սնանկ է ճանաչվել: Խողովակներն էլ մրցույթի են դրել, ինչ-որ կազմակերպություն գնել է, եկել հանել-տարել են: Դրա հետևանքով հիմա հեղեղավտանգ իրավիճակ է գյուղում: Սելկավատարի հարևանությամբ գտնվող տներն էլ սողանքի են ենթարկվել»,- SHANTNEWS.am-ին ասել է Ողջի գյուղի վարչական ղեկավար Նորայր Մկրտչյանը:

Խողովակների պատկանելության կամ դրանք ապամոնտաժելու թույլտվությանը վերաբերող փաստաթղթեր, ըստ վարչական ղեկավարի, չկան: Միայն հայտնի է, որ սելավատարը «Ոռոգում» ջրօգտագործող ընկերությանն է պատկանել, որը լուծարվել է ու անհայտ հանգամանքներում Շիրակի մարզի Ողջի գյուղի խողովակները հայտնվել են Սյունիքի մարզի Տեղ գյուղի հաշվեկշռում:

Խողովակները գետնի տակից հանելու համար այն ժամանակ հսկայական փոս են փորել: Այն, ինչ պետք էր, տարել են, իսկ սելավաջրերը սկսել են լցվել փոսը, որոնք լվանում են հարակից տների հիմքերը:

Հայկավան, Ոսկեհասկ ու Ախուրիկ գյուղերի ղեկավարները հեղեղումների վտանգի մասին ահազանգել են Արտակարգ իրավիճակների նախարարություն, իսկ Ողջիի վարչական ղեկավարը կոնկրետ լուծման տարբերակների պահանջով մարզպետարան է դիմել: Քաղաքաշինության վարչության մասնագետները եկել ու ուսումնասիրել են: Մարզպետարանն էլ պարտավորեցրել է խողովակներն ապամոնտաժողներին՝ սելավատարի հունի և ափերի ամրացման աշխատանքներ կատարել:

«Վերջին խողովակներ տանող անձնավորութունը խոստացել էր, որ այն ժամանակ, երբ խողովակները տանում էր, պետք է գար, այստեղ ճանապարհը բացեր, մաքրեր սելավատարը, որ այն գործեր: 10 օր առաջ եղել ենք մարզպետի մոտ քննարկման: Այնտեղ նա խոստացավ, որ բոլոր այդ աշխատանքները կատարելու է»,- SHANTNEWS.am-ի հետ զրույցում ասել է Նորայր Մկրտչյանը:

Առաջիկա օրերի ընթացքում խոստացել են ծանր տեխնիկա Ողջի տեղափոխել ու գործը սկսել: Առաջացած փոսն են լցնելու, սելավատարի ափերին բետոնե պատնեշներ են կառուցելու, նաև խողովակներն են մաքրելու: Սելավատարի խողովակների մի մասը դեռ տեղում է, չեն հասցրել տանել: