Մանվել Գրիգորյանը հետաքրքրված է ներկայանալ նիստին. պաշտպան

ԵԿՄ նախկին նախագահ Մանվել Գրիգորյանի և կնոջ` Նազիկ Ամիրյանի դեմ հարուցված քրեական գործով սկսված դատաքննության սկզբում պաշտպանական կողմը միջնորդություն է ներկայացրել մեղադրյալ Գրիգորյանի խափանման միջոց կալանքը փոխելու մասին: Պաշտպանները խնդրեցին դատարանին հետաձգել դատական նիստը, որպեսզի մեղադրյալը ևս կարողանա մասնակցել:

Հիշեցնենք` այսօրվա դատական նիստին նա ներկա չէ, քանի որ քաղաքացիական հիվանդանոցում բուժում է  ստանում:

Պաշտպանական կողմը նշեց նաև, որ Մանվել Գրիգորյանը հետաքրքրված է ներկայանալ նիստին և դիրքորոշում հայտնել իր խափանման միջոցը փոխելու վերաբերյալ:

Դատավոր Մնացական Մարտիրոսյանը մերժեց դատական նիստը հետաձգելու մասին միջնորդությունը:

Պաշտպան Կարեն Քամալյանը միջնորդեց դատական նիստերն անցկացնել դռնփակ, քանի որ դատաքննության ընթացքում պարբերաբար հրապարակվելու են ռազմական գաղտնիք պարունակող տեղեկություններ, մասնավորապես Ապրիլյան քառօրյա  պատերազմի ժամանակ ռազմական գործողությունների գոտի ուղարկված ռազմական ուժի, մեքենաների, զենք-ռազմամթերքի ու սննդամթերքի մասին:

Նախագահող դատավորը նկատեց, որ նախնական դատական նիստի ժամանակ չեն հրապարակվելու ռազմական գաղտնիք պարունակող տեղեկություններ, այլ միայն խափանման միջոցի հարց է քննվում առայժմ: Երբ հերթը հասնի բուն դատաքննությանը, ապա այդ միջնորդությունը կքննարկվի:

Պաշտպան Լևոն Բաղդասարյանը թվարկեց Մանվել Գրիգորյանի բոլոր հիվանդությունները` թոքի քաղցկեղ, շաքարային դիաբետ, հիշեցրեց, որ նա Արցախի հերոս է, ունի անչափահաս երեխա և խնդրեց փոխել նրա կալանքը, որպեսզի Մանվել Գրիգորյանը դատարանում խոսելու հնարավորություն ունենա: Մեղադրանքը պաշտպանող կողմն առարկեց միջնորդության դեմ այն հիմնավորմամբ, թե առկա է հիմնավոր կասկած, որ նա կխուսափի դատաքննությունից, հատկապես այն հանգամանքը նկատի ունենալով, որ պաշտպաններն անընդհատ նշում են` Մանվել Գրիգորյանը բուժման կարիք ունի Ֆրանսիայում:

«Խափանման միջոցը ընտրված է ճիշտ, միայն այդ խափանման միջոցի պայմաններում է հնարավոր անցկացնել արդար դատաքննություն»,- ասաց մեղադրող Վահե  Դոլմազյանը:

Մեղադրողը նաև նշեց, որ իրենց տեղեկություններով Մանվել Գրիգորյանը բազմիցս հրաժարվել է սնվել շաքարային դիաբետին համապատասխան սննդակարգով: Բացի այդ, նա տնից ստացել է հանձնուք, որը չի պարունակել շաքարային դիաբետին հատուկ սննդամթերք: Նա հրաժարվել է նաև  տեղափոխվել «Դատապարտյալների հիվանդանոց» ՔԿՀ:

Հիշեցնենք, որ Մանվել Գրիգորյանի կինը` Նազիկ Ամիրյանը, կալանքի տակ չէ, նրա նկատմամբ ընտրված է որպես խափանման միջոց ստորագրություն չհեռանալու մասին:

«Մանվել Գրիգորյանն այս պահին հիվանդանոցում օրական ստանում է չորս  սիստեմա` յուրաքանչյուրը մեկուկես ժամ տևողությամբ և ներարկումներ,- հիշեցրեց պաշտպան Կարեն Քամալյանը:

Դատավոր Մնացական Մարտիրոսյանը հրապարակեց «Նաիրի» ԲԿ-ի տեղեկանքն այն մասին, որ Մանվել Գրիգորյանը չի կարող մասնակցել դատական նիստին` առողջական վիճակից ելնելով: Պաշտպան  Լևոն Բաղդասարյանը միջնորդեց արտագնա դատական նիստ անել հիվանդանոցում և լսել  իր պաշտպանյալի կարծիքը:

Դատարանը դա գնահատեց որպես ժամանակավրեպ միջնորդություն և թողեց առանց քննության: Պաշտպանը դատարանին ինքնաբացարկի միջնորդություն ներկայացրեց:

Դատարանը հեռացավ խորհրդակցական սենյակ` խափանման միջոցը փոխելու վերաբերյալ միջնորդության մասին որոշում կայացնելու  և պաշտպանին նաև ժամանակ տվեց ինքնաբացարկի միջնորդությունը ներկայացնելու համար: