Փաշինյանի պաշտոնավարման օրոք տասնյակ հազար քաղաքացիների աշխատավարձեր են բարձրացվել

ՀՀ վարչապետ Նիկոլ Փաշինյանի պաշտոնավարման օրոք Հայաստանում մի շարք փոփոխություններ են եղել՝ զինվորականների սննդակարգից մինչև զինտեխնիկայի ձեռքբերում, կենսաթոշակների բարձրացումից ստվերի կրճատում: Փաշինյանն այսօր լրագրողների հետ հանդիպմանը թվեր ու փաստեր է հնչեցնում: Ներկայացնում ենք Նոր Հայաստանում տեղի ունեցած փոփոխությունների երրորդ տասնյակը:

1. Հանրապետության մի շարք պետական բուհերում բարձրացվել է աշխատակիցների աշխատավարձը: Պետական տնտեսագիտական համալսարանում հրավիրյալ դասախոսների ժամավճարն աճել է երեք անգամ, ընդհանուր առմամբ, ավելացել է թվով շուրջ 2 600 դասախոսների աշխատավարձ:
2. Հայաստանի ատոմային էլեկտրակայանի շուրջ 1650 աշխատակիցների աշխատավարձերը բարձրացել են միջինը 16 տոկոսով, մայիսին կբարձրանան Հայաստանի բարձրավոլտ էլեկտրական ցանցերի շուրջ 650 աշխատակիցների աշխատավարձերը՝ միջինը 27 տոկոսով:
3. Բնության պահպանվող տարածքների ՊՈԱԿ-ներում միջինը 40 տոկոսով, որոշ դեպքերում՝ 100 տոկոսով բարձրացվել են շուրջ 530 աշխատակիցների աշխատավարձերը: Զվարթնոց ավիաօթերևութաբանական կենտրոն ՓԲԸ-ի կողմից ամբողջությամբ վերազինվել է եղանակի ստացման համակարգը, 30 տոկոսով բարձրացվել են 39 աշխատակիցների աշխատավարձերը, 100 տոկոսով աճել է շահութաբերությունը:
4. Ներդրվել է ՀՀ ոստիկանության ծառայողների աշխատանքի վարձրատրության բնագավառում նոր՝ ամսական պարգևատրումների համակարգ, որի արդյունքում 2019 թ. հունվար, փետրվար, մարտ ամիսների համար վճարվել է պաշտոնային դրույքաչափերի՝ համապատասխանաբար 27.7, 25.8, 25.03 չափով պարգևավճարներ, ներդրվել է աշխատանքի արդյունավետության գնահատման նոր համակարգ, համաձայն որի՝ հանցագործությունների բացահայտման և կանխարգելման գործում արդյունավետ ակտիվություն ցուցաբերած ոստիկանները կարող են ստանալ ամսական աշխատավարձը 2-3 անգամ գերազանցող պարգևավճար: Փաշինյանը հիշեցրեց՝ դեռ Հանրապետության հրապարակում խոստացել է, որ նրանց աշխատավարձերը կաճեն: ԱԱԾ-ում աշխատավարձերն աճել են 30 տոկոսով, Պետական կառավարման մարմիններում տեղի է ունեցել վճարումների ավելացում՝ հայտնի պարգևատրումների միջոցով:
5. Երեխայի ծննդյան միանվագ նպաստի չափը երկրորդ երեխայի ծնվելու դեպքում եռապատկվել է ՝ 50 հազարի փոխարեն դառնալով 150 հազար:
6. Կառավարության ընդունած որոշման արդյունքում՝ 2020 թ. սկսած ընտանիքում բռնության ենթարկված շուրջ 100 անձինք կստանան մինչև 150 հազար դրամ աջակցություն, օրենսդրական փոփոխության արդյունքում՝ թրաֆիքինգի զոհ ճանաչված անչափահասները կստանան միանվագ դրամական աջակցություն՝ 250 հազար դրամի չափով:
7. Օրենսդրական փոփոխությունների արդյունքում՝ ՀՀ առևտրային բանկերին հնարավորություն է տրվել ներել ֆիզիկական անձանց՝ ժամկետանց վարկերի գծով կուտակված տույժերն ու տուգանքները, արդյունքում մինչ օրս ներվել է շուրջ 20 հազար վարկառուի տույժ ու տուգանք՝ 11․5 մլրդ դրամ ընդհանուր ծավալով:
8. Մաքրվել է շուրջ 125 000 վարկառուների վարկային պատմություն, ովքեր մինչև 50 հազար դրամ ժամկետանց վարկային մնացորդ ունեին կամ հանդիսանում էին համավարկառու կամ երաշխավոր:
9. Կառավարության նախաձեռնությամբ՝ 303 բռնադատված անձանց և նրանց առաջին հերթի ժառանգներին ներվել են արտոնյալ պայմաններում տրամադրված շուրջ 1 մլրդ 300 մլն դրամի վարկեր:
10. Կառավարությունը ներդրումային ծրագրի շրջանակներում մաքսատուրքից ազատման արտոնություն է շնորհել 49 ընկերության, որից 15-ը ստացել է նաև ԱԱՀ հարկի հետաձգման արտոնություն: