Շիրակի մարզում խոզերի աֆրիկյան ժանտախտի դեպքեր են գրանցվել

Շիրակի մարզում խոզերի աֆրիկյան ժանտախտի դեպքեր են գրանցվել: Երազգավորս և Գետք գյուղերում 20-ից ավելի գլուխ խոզ է անկել: Գետք գյուղի բնակիչ Արտաշես Սմբատյանի մայրացու խոզերը օրեր առաջ են սատկել: Երբ նաև հարևանի խոզերն են սկսել սատկել, հասկացել են, որ գործ ունեն վիրուսային հիվանդության հետ ու ահազանգել են անասնաբույժներին: Հարևան Երազգավորս գյուղում նույնպես անասունների նույն հիվանդությունն է տարածված: Սա անասնաբույժները պարզել են հետազոտություններով:

«Երազգավորսում եղել է մեկ տնտեսությունում, ջերմաչափել ենք անասուններին, կասկածել ենք աֆրիկյան ժանտախտ: Պատանատոմիան ցույց տվեց: Հետո նաև Գետքում հետազոտությունները ցույց տվեցին, որ նման է աֆրիկյան ժանտախտին: Որոշում ենք կայացրել սահմանափակել տարածքը»,-  SHANTNEWS.am-ին ասել է անասնաբույժ Անիկ Սարգսյանը:

Հիվանդությունը մարզի գյուղերում պարբերաբար գրանցվում է: Աֆրիկյան ժանտախտի դեմ պատվաստանյութ գոյություն չունի: Նույն գյուղերում խոզերի աֆրիկյան ժանտախտ գրանցվել էր նաև 4 տարի առաջ: Անասնաբույժները չեն բացառում, որ գյուղերում հիվանդության օջախները մնացել են, բայց նաև արտաքին գործոններ կան, որոնք նպաստում են վարակի ներթափանցմանը: Խոսքը մասնավորապես մսավաճառների մասին է, որոնք ազատ մուտք ու ելք ունեն բոլոր անասնագոմեր ու, ըստ անասնաբույժների, իրենց հետ նաև տարբեր հիվանդություններ են տեղափոխում:

Այն գյուղերում, որտեղ աֆրիկյան ժանտախտ է հայտնաբերվել, անասնաբույժներն արգելել են մսավաճառների մուտքը անասնագոմեր: Սա օգնելու է, որ հիվանդությունը տարածում չունենա: Գետք, Երազգավորս, Ղարիբջանյան ու Բայանդուր գյուղերը ռիսկային են համարվում ոչ միայն աֆրիկյան ժանտախտի տարածման առումով, այլ նաև մանր ու խոշոր եղջերավորների բրյուցելոզի: Այս գյուղերը տարանցիկ են ամառանոց գնացող ոչխարների հոտերի համար: Ինչպես նշում են անասնաբույժները, դրանք իրենց հետ բրյուցելոզ հիվանդություն են բերել ու տարածել Շիրակի մարզի գյուղերում: Ոչխարների բրյուցելոզ հայտնաբերել են Այգաբաց և Շիրակ գյուղերում:

«Հսկողություն չկա, եզդիները մեր տարածաշրջան Արմավիրի մարզից են գալիս, ոչ ուղեկցող փաստաթղթեր կան, ոչ ստուգման վկայական, ոչ մի բան չկա: Քշում, տանում են մինչև Ամասիա: Ոչխարի բրյուցելոզի դեպքեր եղել են: Ոչխարները հիվանդության հետևանքով չեն անկում, բայց տարածում են բրյուցելոզը»,- SHANTNEWS.am-ին ասել է Ախուրյանի և Գյումրու տարածաշրջանների համաճարակաբան Արմենակ Հովիկյանը:

Հիմա մարզի ամբողջ գլխաքանակից արյան նմուշառումներ են կատարում: Սա բրյուցելոզը հայտնաբերելու միակ տարբերակն է: Հիվանդության դեմ պատվաստումներ չեն կատարվում արդեն 30 տարի:

Եթե հիվանդ անասուն են հայտնաբերում, ապա ենթարկում են հարկադիր մորթի: Շիրակի մարզում մեծ է նաև խշխշուկ հիվանդության տարածման վտանգը: Այստեղ պատճառը պատվաստանյութի ուշացումն է:

Միակ հիվանդությունը, որի դեմ հիմա պատվաստվում է Շիրակի մարզի գլխաքանակը, դա դասական ժանտախտն է: Պատվաստումների արդյունավետությունը անասնաբույժները ապացուցում են հիվանդության բացակայությամբ: Վերջին 30 տարիներին Շիրակի մարզում դասական ժանտախտի ոչ մի դեպք չի արձանագրվել: