Ինչպե՞ս ճիշտ դասավորել ճապրուկը

Արդեն ամառ է, և շատերը մեկնում են հանգստի, ուստի ժամանակն է մտածել ճամպրուկները դասավորելու մասին:

Մարդիկ սովորաբար ցանկանում են հնարավորինս շատ իրեր իրենց հետ վերցնել, այս սովորությունը բնորոշ է հատկապես կանանց: Որքան էլ շատ իրեր ցանկանանք վերցնել մեզ հետ, հարկավոր է հասկանալ, որ վերջ ի վերջո մենք այդ ամենը պետք է կարողանանք տեղավորել 1 կամ առավելագույնը 2 ճամպրուկի մեջ:

Ճամպրուկի մեջ իրերը ճիշտ կերպով դասավորելու դեպքում դուք կկարողանաք փոքր տարածության մեջ հնարավորինս շատ իրեր տեղավորել:

Ինչպե՞ս հնարավորինս օպտիմալ տեղավորել իրերը, և ի՞նչ ճապրուկ է խորհուրդ տրվում վերցնել ճամփորդության:

Ո՞ր ճամպրուկն է լավագույնը

Այսօր շուկայում կարող ենք տեսնել ճամպրուկների մեծ տեսականի. դրանք լինում են կտորից, կաուչուկից, պլաստմասսաե, ռետինե: Ճամպրուկների վաճառողները խորհուրդ են տալիս չխաբվել պլաստմասսաե ճամպրուկների գեղեցկությանը և վերցնել հաստ և ամուր կտորե ճամպրուկներ:

Օդանավակայանի աշխատակիցները մեր ճամպրուկների հանդեպ հոգատար չեն վերաբերվի և օդանավ տեղադրելիս պլաստմասսաե ճամպրուկները հեշտությամբ կարող են կոտրվել, իսկ կտորե ճապրուկներն առավել դիմացկուն են:

Ի դեպ, անվավոր ճամպրուկը ստեղծվել է ընդամենը 1988 թ․-ին:

Խորհուրդ է տրվում ճամպրուկն օդանավակայանում փաթեթավորել, որպեսզի այն պատահմամբ չբացվի և ձեր իրերը չկորչեն:

Ինչպե՞ս ճիշտ դասավորել ճամպրուկը

Ձեզ ենք ներկայացնում մի քանի խորհուրդներ, թե ինչպես ճիշտ դասավորել ճամպրուկը:

Խորհուրդ 1

Այն ամենը, ինչ պետք է տեղավորեք ճամպրուկում, ի սկզբանե դրեք մահճակալի վրա, և այդպես վստահաբար շատ իրեր դուրս կմնան: Իրերը մահճակալին դնելիս դուք կհասցնեք փոշմանել և շատ անպետք իրեր այլևս չեն մտնի ճամպրուկ:

Խորհուրդ 2

Ծանր իրերը տեղադրեք ճամպրուկի ներքևի հատվածում, այդպես դրանք ավելի ապահով կլինեն: Սովորաբար ճապրուկի վրա դրվում են ավելի թեթև իրերը, իսկ ծանր կամ կոտրվող իրերը հարկավոր է փաթաթել հագուստով և դնել ճամպրուկի ներքևի հատվածում:

Խորհուրդ 3

Հագուստը ծալեք խողովակի պես: Մոռացեք գովազդներում ցուցադրվող իդեալական արդուկված հագուստի մասին, և բոլոր բլուզները, տաբատները ծալեք խողովակի պես. այդպես տարածությունն ավելի շատ կլինի:

Խորհուրդ 4

Օծանելիքները և այլ կոսմետիկ պարագաները հարկավոր է փակել լրացուցիչ տոպրակով, այդպես դրանք ավելի ապահով կլինեն և չեն կեղտոտի ձեր հագուստը:

Ցանկալի է նման պարագաները տեղափոխել ճամպրուկի մեջ, այլ ոչ թե ձեռքի պայուսակում, քանի որ հաճախ օդանավակայանում խնդիրներ են առաջանում և կոսմետիկ պարագաները չեն թույլատրում տեղափոխել օդանավ, և դրանք մնում են օդանավակայանի աշխատակիցներին «նվեր»:

Խորհուրդ 5

Եթե ամեն դեպքում ցանկանում եք, որ ձեր իրերը ոչ մի կերպ չճմրթվեն, ապա բլուզները նաև կարելի է իրար վրա շարել, ապա 2 կույտն իրար միացնել:

Թե ինչպես դա անել, նկարագրված է հետևյալ տեսանյութում:

Մաղթում ենք ձեզ հաճելի արձակուրդ: