Ի՞նչ է կատարվում Կապանում. ՀՀ շրջակա միջավայրի նախարարի պարզաբանումը

Օրերս համացանցում տարածվեցին լուսանկարներ Կապանից, որտեղ անձրևից հետո բնակելի թաղամասերում, շենքերի բակերում թթվային գետակներ են հոսել: Հայտնի է նաև, որ Կապանի միջով հոսող Ողջի գետն էլ ստացել էր վառ դեղնադարչնագույն երանգ։ Այս մասին հայտնում է ՀԲՃ-ն:

SHANTNEWS.am-ի հետ զրույցում ՀԲՃ-ի համակարգող խորհրդի անդամ Լևոն Գալստյանը նշեց, որ սա նորություն չէ, և միշտ էլ այդպես է եղել, ուղղակի այս անգամ տեղի բնակիչները ֆիքսել են այդ ամենը բարձրից:

«Դա անտեր վիճակում թողած հանքերի թափոնակույտերի, լցակույտերի և մնացած ամեն ինչի, որը հանքերի շահագործումից հետո թողնվում է բնության մեջ, դրա հետևանքն է»,- ասել է Լևոն Գալստյանը:

Խնդրին այսօր անդրադարձել է ՀՀ շրջակա միջավայրի նախարար Էրիկ Գրիգորյանը: Նախարարից լրագրողները հետաքրքրվել են, թե ի՞նչ քայլեր են ձեռնարկվում, որպեսզի իրավիճակը չկրկնվի:

«Տեսչական մարմինն արդեն վերցրել է փորձանմուշներ, որպեսզի ուսումնասիրի բաղադրությունը, բայց ակնադետ երևում է, որ լքված տարածքներից կամ պոչամբարներից եկող որոշակի աղտոտվածություն ունեցող ջրային մարմիններ են: Դա կրկին խնդիրներից մեկն է՝ նախկինում Կավարտի հանքի հրաժարման փաստաթուղթը, երբ որ պետությունը ստորագրել է, այդ պարտավորությունները չի ներառել դրա մեջ, և այս պահին այդ աշխատանքների իրականացումը մնացել է պետության վրա, որպեսզի ռեկուլտիվացման աշխատանքներն իրականցվեն: Չնայած՝ զուգահեռ այնտեղ որոշակի երկրաբանական ուսումնասիրություններ են իրականացվում», – ասել է բնապահպանության նախարարը:

ԲՆ-ում հիշեցրել են, որ անցյալ տարի Հայաստանի պատմության մեջ առաջին անգամ իրականացվել է լքված  պոչամբարների և թափոնակույտերի գույքագրում: Այդ աշխատանքը հիմք է հանդիսացել, որպեսզի հայտ ներկայացվի ևս 5 միլիոն եվրո ստանալու համար, ինչն օգտագործվելու է ռեկուլտիվացիա անելու նպատակով:

«Դրան զուգահեռ այս պահին մշակում են կենսաբանական ռեկուլտիվացիայի կարգը: Մշակում ենք ռեկուլտիվացիոն գումարների հաշվարկման կարգի փոփոխությունը: Նախկինում այդ համակարգը, որը գործել է, ըստ որի՝ դեպոզիդ գումար է վճարվել պոչամբարների համար, չի արտացոլել այն ծավալները, որոնց կարիքը կար: Գույքագրվել է 44 թափոնակույտ և 5 պոչամբար: Մենք կսկսենք ռեկուլտիվացիայի ֆիզիկական աշխատանքը: Իսկ ինչ վերաբերում է գործող կազմակերպությունների պոչամբարներին, ապա այս ոլորտում նույնպես կարգավորումներ կտրվեն: Մինչ հիմա ռեկուլտիվացիա տնտեսվարողները հասկանում էին այդ տարածքը հողի բարակ շերտով ծածկելն ու թողնելը: Իսկ դա իր հետևից բերում է մի շարք այլ խնդիրներ»,- հավելել է նախարարն ու նաև նշել, որ մեծ աշխատանք է կատարվում՝ սկսած օրենսդրական փոփոխություններից մինչև իրական ռեկուլտիվացիա կատարելու միջոցներ: