Փակվել է Կրթության ազգային ինստիտուտն իր 8 մասնաճյուղերով

Հուլիսի 1-ից դադարեցվել է Կրթության ազգային ինստիտուտի գլխամասային գրասենյակի և 8 մասնաճյուղերի գործունեությունը: Պետական այս կառույցը երկար տարիներ եղել է կրթական նորամուծությունների ու նորույթների մասին մանկավարժներին իրազեկող միակ կազմակերպությունը, մանկավարժների համար կազմակերպել է վերապատրաստման, իսկ դպրոցների տնօրենների համար՝ հավաստագրման դասընթացներ:

Կրթության ազգային ինստիտուտի արդեն գործազուրկ մասնագետներին էլ չհաստատված տեղեկություններ են հասել, որ փակված կառույցի փոխարեն նորն է ստեղծվելու, բայց թե երբ ու արդյո՞ք իրենք աշխատանք կունենան, հայտնի չէ:

Կրթության ազգային ինստիտուտի Շիրակի մասնաճյուղը 50 տարվա պատմություն ունի: 50-ամյակն այս տարի էր լրանում: Բայց այն իրադարձության չհասցրին վերածել, մարտ ամսից մասնաճյուղի աշխատակիցներին սկսել էին ծանուցումներ ուղարկել լուծարման մասին, իսկ հուլիսի 1-ից գործազուրկ են: Ինստիտուտի Շիրակի մասնաճյուղի նախկին մասնագետների խոսքերով`  իրենց այդպես էլ պարզ չէղավ, թե ինչն էր կառույցի փակման պատճառը:

Կրթության նախարարությունից հիմնավորել են, թե վերապատրաստվող ուսուցիչներից դժգոհություններ են եղել, նաև վերապատրաստումներն են անարդյունավետ:

Մասնաճյուղի նախկին տնօրեն Մեսրոպ Ղալաչյանի խոսքերով` փակելն ամենահեշտն է, եթե խնդիրներ կային, կարելի էր դրանք քննարկել, գալ եզրահանգման ու լուծումներ տալ, իսկ թե ինչ չափորոշիչներով է գնահատել նախարարությունը, որ աշխատանքը որակվել է անարդյունավետ, այդպես էլ չեն պարզել:

«Կառույցը տարեկան 8000 մանկավարժի հետ է վերապատրաստումներ անցկացրել և որոշ մասը հնարավոր է` դժգոհ լինի, բայց դա կառույցը փակելու հիմք չէր կարող դառնալ»,- նշում է նախկին տնօրենը:

Ըստ նրա` նախարարությունը Կրթության ազգային ինստիտուտը որակել է 21-րդ դարում ապրող 20-րդ դարի կրթական կառույց, ինչի հետ ինքը համամիտ չէ: Նախատեսվում է կրթության ոլորտ ներմուծել ավելի շատ միջազգային փորձը:

Բայց 21-րդ դարի կրթական նորամուծությունների համար դեռ 3 տարի է պետք ու նույնքան տարով դադարեցվել է ուսուցիչների ատեստավորումը: Իսկ մինչ լուծարումը 5 տարին մեկ ուսուցիչների ու նախակրթարանների դաստիարակների ատեստավորման պահանջի համար վերապատրաստման դասընթացներ էր կազմակերպում Կրթության ազգային ինստիտուտը: Բայց նոր դասագրքեր են հրատարակվելու, բացի դրանից, նոր ուսումնական տարվանից մարզի բոլոր կրթօջախներ մուտք է գործելու ներառական կրթությունը, իսկ թե ովքեր ու ինչպես են կազմակերպելու վերապատրաստումները մանկավարժներին, սա մտահոգող հարց է:

Այն, որ տարիներ շարունակ նրանց կառույցը եղել է մենաշնորհային դիրքերում, մասնաճյուղի մասնագետներն ընդունում են, դեմ չեն նաև համակարգի ազատականացմանը, ասում են, թող դառնա մրցակցային այնպես, ինչպես տնօրենների հավաստագրումը եղավ: Կրթության ազգային ինստիտուտից բացի, նաև հասարակական կազմակերպություններն են տնօրենների վերապատրաստումներ կազմակերպում, ինչը ուսուցիչների դեպքում չի եղել: Կրթության ազգային ինստիտուտի լուծարումից հետո, հավանական է, որ այլ կառույցներ կստեղծվեն ու հիմնականում հիմնադրամների գործառույթով:

Իսկ թե մանկավարժների գիտելիքները հարստացնելու գործն ովքեր կստանձնեն, սա խնդրի ամենալուրջ կողմն է: Ըստ նախկին տնօրենի` այսօրվա օրենքով վերապատրաստումը լինելու է վճարովի ու ոչ թե ուսուցիչն է վճարելու, այլ պետությունը դպրոցին, դպրոցն էլ գտնելու է այլընտրանքային վերապատրաստողների:

Թե մրցակցությունն ինչքանով իր հետ որակ կբերի, գնահատականներ հետո կտրվեն: Համենայնդեպս, գործընթացը խոսում է այն մասին, որ նորերը փոխարինելու են մենաշնորհային դիրք գրաված կրթության ազգային ինստիտուտին, որի գործունեությունը պետբյուջեից տարեկան մոտ 400 մլն դրամ էր պահանջում: