«Իմ քայլը հանուն Շիրակի» համաժողովի նախապատրաստական աշխատանքները Շիրակի մարզում

Հուլիսի 20-ին Գյումրիում կանցկացվի «Իմ քայլը հանուն Շիրակի» բիզնես համաժողովը: Այդ օրը Գյումրին կհյուրընկալի մի շարք գործարարների, այդ թվում՝ օտարերկրյա, որոնք հետաքրքրված են Շիրակի մարզի տնտեսական ներուժով: Ընթանում են միջոցառման նախապատրաստական աշխատանքները: Մարզային բիզնես համաժողովին կմասնակցեն Հայաստանի վարչապետը, նախարարներ, դիվանագիտական կառույցների ներկայացուցիչներ։ Համաժողովին մասնակցելու է ավելի քան 250 մարդ։ Միջոցառման տեղեկատվական հովանավորն է «Շանթ» հեռուստաընկերությունը։

Ինչպես ներկայացնել Շիրակի մարզի տնտեսական ամբողջ ներուժը մի քանի ժամում։ Այս խնդիրն ու կազմակերպչական հարցերը կարգավորում է Շիրակի մարզպետարանի աշխատակազմը, որպեսզի «Իմ քայլը հանուն Շիրակի» բիզնես համաժողովը պատշաճ կազմակերպվի:

Այն, որ Գյումրիում մեծ համաժողով է լինելու, իրազեկում է քաղաքի մուտքի մոտ փակցված պաստառը: Նախապատրաստական աշխատանքներ են տարվում «Հոկտեմբեր» կինոթատրոնում, տեխնոլոգիական կենտրոնում, որտեղ պետք է տեղի ունենան միջոցառումները:

Այն, ինչ արտադրվում է Շիրակում «Մեյդին Շիրակ» խորագրով, կցուցադրվի բացօթյա։ Նախնական՝ 60 կազմակերպությունների արտադրանք տեղ կգտնի բիզնես-էքսպոյում։ Շիրակի մարզպետի խոսքերով՝ այս փոքր տնտեսական ցուցանիշներով հանդերձ, Շիրակի մարզը բավականին լավ ներուժ ունի և այնքան ծառայություններ, որոնք ճիշտ աշխատեցնելու պարագայում մարզում կարող ենք ունենալ տնտեսական լավ ցուցանիշներ։ «Եկեք Շիրակ» այս կարգախոսով գործարարներին մարզ կհրավիրի համաժողովը։

Գյումրու տեխնոլոգիական կենտրոնի բակ ծառայելու է միջոցառման պաշտոնական մասի բացման հարթակ։ Այստեղից են հնչելու Շիրակի մարզում բիզնես հիմնելու և տնտեսական տարբեր նախագծեր իրականացնելու մասին հյուրերի ելույթները։

Նախապատրաստական աշխատանքներն այստեղ ավարտին են մոտենում։ Մոտ 45 բիզնես գաղափարներից ամենամեծ ֆինանսավորում պահանջողը իսրայելցի գործարարների՝ Գյումրիում լոգիստիկ կենտրոնի կառուցման նախագիծն է, որտեղ գործունեություն պետք է ծավալեն էլեկտրոնային առևտրի ոլորտի ընկերությունները: Ու այդ նպատակով մեկուկես տարի առաջ 335 հա տարածք հատկացվեց իսրայելցի գործարարներին։ Նրանք ևս ներկա են լինելու բիզնես-համաժողովին:

Կմասնակցեն նաև Ֆրանսիայից և Շվեյցարիայից հայ գործարարներ։ Օտարերկրյա գործարարների գերակշիռ մասը, ըստ Շիրակի մարզպետի, լինելու են Ռուսաստանի Դաշնությունում ապրող շիրակցիները։ Համաժողովին տեղի կազմակերպությունների ու անհատների ներկայացրած բիզնես-գաղափարները բազմազան են։ Դրանցից մեկն էլ վերաբերում է հատուկ ջրիմուռների աճեցմանը, ինչը թույլ կտա ինչ-որ կերպ լուծել երկրին սպառնացող բնապահպանական աղետը, որը գլոբալ տաքացման հետևանք է։ Այս խնդիրը, ըստ մարզպետի, նաև Սևանա լճի աղտոտվածությանն է առնչվում։

Շիրակի մարզում արդյունաբերության գերակա ոլորտը շարունակում է մնալ տեքստիլ արտադրությունը։ Իսկ բիզնես գաղափարները վերաբերում են նաև սննդի վերամշակմանը, գյուղատնտեսության ոլորտին։ Այնուամենայնիվ, առաջատարը մնում են տուրիզմի ոլորտին առնչվող ներդրումային հայտերը: Ծրագրերի, գաղափարների լայն սպեկտրը, ըստ մարզպետի, արդեն հուշում է, որ այս համաժողովով չեն սահմանափակվելու։ Այս գաղափարներն ապագայում կներկայացվեն Գյումրի այցելող գործարարներին, որոնք ցանկություն կհայտնեն ներդրումներ կատարել Շիրակի մարզում: