Գյումրիի փողոցաշինական աշխատանքներում տեսչական մարմինը լուրջ թերություններ է հայտնաբերել

Քաղաքաշինության, տեխնիկական և հրդեհային անվտանգության տեսչական մարմինը դիտարկումներ է իրականացրել Գյումրիի Վարպետաց, Աբովյան և Ղորղանյան փողոցներում: Տեսուչները խախտումներ են արձանագրել լուսավորության հենասյուների էլեկտրամոնտաժման աշխատանքներում: Դրանք տեղակայվել են տեխնիկական կանոնակարգերով սահմանված անվտանգության պահանջների խախտումներով, բացակայում են հենասյուների հողանցումները: Նաև պարզվել է, որ էլեկտրամոնտաժման աշխատանքներն իրականացվել են առանց նախագծային փաստաթղթերի:

Գյումրիի պատմական միջուկում, գրեթե բոլոր փողոցներում շինարարությունն ավարտված է, ու ավարտից հետո միայն պարզ է դարձել, որ էլեկտրասյուները տեղադրվել են առանց հողանցման, էլեկտրամոնտաժման աշխատանքները կատարվել առանց նախագծային փաստաթղթերի: Ու սա, ըստ Քաղաքաշինության, տեխնիկական և հրդեհային անվտանգության տեսչական մարմնի Շիրակի տարածքային բաժնի պետ Ժորա Միքայելյանի՝ կատարվել է պատվիրատուի, նախագծողի, հեղինակային ու տեխնիկական վերահսկողների աչքի առաջ: Հիմա փորձում են հասկանալ, թե ինչո՞ւ է այդպես ստացվել:

Շինարարությունն իրականացրել է «Մերձմոսկովյան» ընկերությունը, որի ղեկավար Արամ Ադամյանը նշեց, թե հողանցման բացակայությունն իրենց խնդիրը չի եղել: Պարզվում է, որ դեռ 2 տարի առաջ՝ Ռուսթավելի փողոցի հիմնանորոգումից հետո, քաղաքի այդ հատվածներում որպես նվեր նոր մալուխագծեր էին տեղադրվել, որոնցում հողանցման հոսանքալարը բացակայում է: Փողոցաշինության ընթացքում էլ ոչ ոք այս հանգամանքին ուշադրություն չի դարձրել ու չի ստուգել, թե կա՞ արդյոք հողանցում: Միայն տեսչական ստուգումներն են ի հայտ բերել թերությունը: Տեսչական մարմնի մարզային պատասխանատուն հողանցման բացակայությունը լուրջ թերություն է համարում։ Դա, ըստ Ժորա Միքայելյանի, հոսանքահարման սպառնալիք է ներկայացնում անցորդների համար:

Թերությունը, ըստ նրա, պետք է շտկվի, որից հետո միայն փողոցները շահագործվեն, իսկ շինկազմակերպության ղեկավարը նշում է, թե դրանք Գյումրիում միակ հենասյուները չեն, որոնք հողանցում չունեն: Քաղաքում եղած հազարավոր հենասյուներից և ոչ մեկը, ըստ Արամ Ադամյանի, հողանցմամբ չի տեղադրվել, ու ի՞նչ տարբերություն դրանց ու այս 50-ի միջև, որոնց համար հողանցումը պարտադրում են:

Առանց նախագծի էլեկտրամոնտաժման աշխատանքներ կատարելու համար վերահսկողները նկատողություն են ստացել տեսչական մարմնից: Թե վիճակն ինչպես կշտկեն, առայժմ հայտնի չէ: Լուծման տարբերակներ դեռ մշակված չեն: Ստորգետնյա մալուխագծերի անցկացումն ավարտված է, մայթերը՝ բարեկարգված:

Ըստ շինկազմակերպության ղեկավարի՝ կա՛մ օդային ճանապարհով պետք է լարն անցկացվի, ինչը քաղաքի պատմական միջուկում բացառվում է, կա՛մ էլ արդեն բարեկարգված մայթերը պետք է քանդվեն: Ու հարց է առաջանում, թե ինչո՞ւ այս թերություններն ավելի շուտ չեն հայտնաբերվել: Ըստ Ժորա Միքայելյանի՝ փողոցաշինական աշխատանքների հիմնական փուլում իրենց տեսչական մարմինը լուծարվել էր: Հոսանքալարերը Կումայրի պատմական միջուկում անցած տարի են անցկացվել, իսկ տեսչական մարմնի տարածքային բաժիններն այս տարվա գարնանն են ձևավորվել: Ստուգումներ սկսել են բոլոր հիմնանորոգվող փողոցներում: Որակի խախտումներ են հայտնաբերել Գարեգին Նժդեհ փողոցի մայթերի ասֆալտապատման աշխատանքներում: Մայթերի ասֆալտը քանդել են, նորն արել:

Երևանյան խճուղում և Տիգրան Մեծ փողոցում էլ տեսչական մարմնի պատասխանատուն բարձրաձայնում է այլ խնդիրների մասին: Այս փողոցներում անձրևաջրերի հեռացման ցանցը փոխվել է մասնակի, ու սա այն դեպքում, երբ ներքին ցանցը տասնյակ տարիներ չի վերանորոգվել ու, ըստ պատասխանատուի, չգիտենք, թե ինչ կլինի դրանց վիճակը տարիներ հետո: Գարեգին Նժդեհ փողոցի 2 ստորգետնյա անցումներում էլ, ըստ Ժորա Միքայելյանի, լրացուցիչ ուսումնասիրությունների կարիք կա: Նախագծով դրանք ոչ թե ամրացվել են, այլ ընդամենը վերանորոգվել, ու սեյսմակայունությունը կասկածի տակ է:

Թերությունները վերացնելու համար տեսչական մարմինը սեղմ ժամկետներ է տվել պատվիրատուին ու շինկազմակերպությանը: Ընդհանուր առմամբ, Գյումրիի փողոցաշինական ծրագրի առաջին փուլի համար վերջնաժամկետներ չկան: Դրանք երկու անգամ երկարացվել են, նորը չի սահմանվել։