Գյումրիի թիվ 10 հիմնական դպրոցում աշակերտների թիվը նվազում է, դրամահավաք է հայտարարվել

Նոր ուսումնական տարին Գյումրիի թիվ 10 հիմնական դպրոցը սկսում է շենքային պայմաններն ու գույքային խնդիրները չկարգավորած: Այս պատճառները հանգեցրել են երբեմնի հեղինակավոր դպրոցում աշակերտների թվի նվազման:

Վերջին 5 տարում տնօրինության դիմումները, շենքային խնդիրների լուծմանն ուղղված, անպատասխան են մնացել: Քաղաքի` ֆրանսիական թեքումով միակ դպրոցի հետագա գործունեությունը չվտանգելու համար անհրաժեշտ ֆինանսական լրացուցիչ միջոցներ գտնելու համար մանկավարժներն ու աշակերտները դիմել են դրամահավաքի:

Սոցիալական այս տեսահոլովակը մի քանի օր առաջ հայտնվեց համացանցում: Ֆրանսերենի խորացված ուսուցմամբ  10-րդ  դպրոցի աշակերտները սահուն ֆրանսերենով ներկայացնում են իրենց դպրոցի խնդիրները, որոնց լուծման համար ֆինանսական  աջակցություն է անհրաժեշտ:

Տեսահոլովակի գաղափարը հասունացավ, երբ անհնար դարձավ նման շենքային պայմաններում շարունակել դասերը, երբ խնդիրների լուծմանն ուղղված բոլոր դիմումները մնացին անպատասխան:

«Երեխան մինչև լաց չլինի, մայրը չի կերակրի: Գուցե այդ սկզբունքով մոտենանք հարցին, գուցե այս հոլովակը ինչ-որ կերպ օժանդակի մեր խնդիրների լուծմանը»,- ասում է Գյումրիի թիվ 10 հիմնական դպրոցի ուսուցիչ Ռուզաննա Աբրահամյանը:

Ֆրանսիայի կառավարության ու ֆրանսիացիների նվիրատվությունների շնորհիվ 1997 թվականին 10-րդ դպրոցի ավերակների տեղում կառուցվեց տիպային երկհարկանի  դպրոց: Այս գործում մեծ ջանք գործադրեց դպրոցի նախկին տնօրեն Մարտին Փաշայանը: Այն դպրոց է` նախատեսված 640 աշակերտի համար, որտեղ այժմ սովորում է շուրջ 200 աշակերտ:

«Մի շրջան ենք ունեցել, որ 9 տասներորդ դասարան ենք ունեցել, նույնիսկ տեղ չլինելու պատճառով բավական շատ երեխաների ծնողների հետ ենք ուղարկել, որովհետև ֆիզիկապես դպրոցը էլ ի վիճակի չէր տեղավորելու»,- հիշում է դպրոցի երկարամյա դասվար Աիդա Նիկողոսյանը:

«Այսօր շատ մեծ ցավ եմ ապրում, որ կարողանում ենք հազիվ բացել մեկ առաջին դասարան»,- ասում է  ուսուցչուհի  Ասյա Ղազարյանը:

Դպրոցի աշակերտների թիվն ամեն տարի նվազում է: Շենքային խնդիրներից բացի, ուսուցիչներն այլ պատճառներ են նշում: Փոխվել է դպրոցի կարգավիճակը, երեխաներից շատերը ֆրանսերենով հետաքրքրված չեն, դպրոցում անգլերեն կամ այլ օտար լեզու չի դասավանդվում: Նյութատեխնիկական բազան ևս հին է, չունեն համակարգչային դասարաններ ու լաբորատորիաներ:

Աշակերտների թվի նվազմանը զուգահեռ նվազել է նաև դպրոցի պահպանման ծախսերի ֆինանսավորումը: Դպրոցի  մասնաշենքերից միայն մեկն են օգտագործում: Դատարկ սենյակները վարձակալությամբ տրամադրել էին այլ կառույցների, բայց  դրանք էլ են  տեղափոխվել: 5500 քմ մակերեսով դպրոցի պահպանության մեծ ծախսերը քիչ ֆինանսավորմամբ լուծել չի ստացվում:

«Դպրոցն ունի հիմնանորոգման կարիք, որոշ հատվածներ չեն օգտագործվում` կապված աշակերտների թվի պակասի հետ, որովհետև առաջ գերծանրաբեռնված էր, հիմա թերծանրաբեռնված»,- դպրոցի դատարկ մասնաշենքերը ցուցադրելով` ասում է փոխտնօրեն Նարինե Մելքոնյանը:

Ջեռուցել հին մարտկոցներով արդեն անհնար է, միջանցքերում ու մարզադահլիճում նորմալ ջերմաստիճան ապահովել հնարավոր չէ: Սրանք այն խնդիրներն են, որոնց լուծման համար վերջին հինգ տարում բազմաթիվ դիմումներ է տնօրենը գրել:

«Շատ խնդիրներով դիմել եմ պատկան մարմիններին, եկել, ուսումնասիրել են, բայց առայժմ ոչ մի խնդիր չի լուծվել»,- ասում է դպրոցի տնօրեն Լիաննա Վարդանյանը:

Մինչև հիմա կատարված կոսմետիկ հարդարումները եղել են մանկավարժների, ծնողների ուժերով, այլ քայլերի էլ են դիմել` ուսուցիչների ստեղծած երգչախումբը մասնակցել է փառատոնի, վաստակած գումարն ուղղել են գույքի վերանորոգմանը: Դրանից հետո է ծնվել հաջորդ նախաձեռնությունը՝ սոցիալական տեսահոլովակով հասնել արդյունքի:

Արձագանքել են առայժմ դպրոցի շրջանավարտները, որոնք այսօր ապրում են արտերկրում: