Գյումրու Ակադեմիական վարժարանը հիմնանորոգվում է

Հայաստանում 400-ից ավելի դպրոցներ ունեն շենքային պայմանների բարելավման, նոր մասնաշենքերի կառուցման ու սեյսմիկ անվտանգության ապահովման խնդիրներ։ Որոշ դպրոցներում կոսմետիկ վերանորոգումների ծրագրերը սկսվել են ամռան կեսին:Նոր ուսումնական տարին տեղափոխություններով է մեկնարկել Գյումրու Ակադեմիական վարժարանի համար․ երկու շաբաթ առաջ շենքի հիմնանորոգումներ են սկսվել, վարժարանը դասերը ժամանակավոր անցկացնում է այլ հարմարեցված շենքում:Ակադեմիական վարժարանի տնօրենը հույսով ու համոզվածությամբ ասում է,  որ սա վերջին տեղափոխությունն է լինելու: Հիմնադրման օրվանից վարժարանը սեփական շենք չի ունեցել, վարձակալությամբ, թե անհատույց, այլ կրթօջախներում հարմարվել են:Չորս տարի առաջ էլ՝ սեպտեմբերի մեկի նախաշեմին, դարձյալ տեղափոխությունների մեջ էին: Նախակրթարան բացելու համար պահանջեցին ազատել թիվ 19 դպրոցում զբաղեցրած 8 դասասենյակները: Սկզբում նորից կենվորի, որոշ ժամանակ անց անժամկետ օգտագործման իրավունքով նախկին թիվ 17 դպրոցը տրամադրվեց վարժարանին:Նոր ուսումնական տարվա մեկնարկի հետ իրենց շենքից տեղափոխությունն այժմ իսկապես ժամանակավոր է:  Նախկին մանկավարժական քոլեջի քառահարկ շենքում կմնան մինչև իրենց վարժարանի վերակառուցման ավարտը:«Նրանք, որոնք չհարմարվեցին, գնացին: Հիմնական կոնտինգենտը մնաց»,- ասում է վարժարանի փոխտնօրեն Գայանե Մելիք-Սարգսյանը։ Հերթական տեղափոխությունից աշակերտ են կորցրել, ինչպես նախորդ անգամները: Թեև ունեցած քանակակազմից այս տարի չեն դժգոհում, դասասենյակներում հազիվ են տեղավորվում: Իրենց վարժարանի շենքային պայմանները 30 տարում ավելի էին վատացել, այս ընթացքում  դպրոցաշինական ծրագրերից դպրոցը միշտ դուրս էր մնում: 50-ականներին կառուցված տիպային դպրոցը շենքային հնարավորութուններով կրթական չափորոշիչներին համապատասխան է, ընդամենը վերանորոգումն էր պակասում: «Շենքը սեյսմակայուն է, բայց արտաքին տեսքից էլ երևում էր, թե ինչքան անհրապույր ու անբարեկարգ էր: Էս դարին համահունչ շենք չէր, ո՞ր երեխան, ո՞ր աշակերտը կգար այստեղ սովորելու»,- վերակառուցվող շենքի  պայմանների մասին է խոսել Ակադեմիական վարժարանի տնօրեն Լևոն Սեխպոսյանը։ Կրթօջախի ամենավտանգավոր հատվածը մարզադահլիճն է, որտեղ  ընդհանրապես ֆիզկուլտուրայի դասերն արգելված են եղել: Շինարարն  աշխատանքները հենց այս հատվածից էլ սկսել է: Բոլոր մասնաշենքերը կապիտալ նորոգման են ենթարկվելու: Նախագծով սահմանված է, որ դասասենյակների ձևափոխություններ ևս լինելու են, բայց առանց միջնապատերի ապամոնտաժման աշխատանքների: «Շատերն ամրացված են ամրաններով, արմատուրայից սեդկաներով, ցեմենտ-ավազի սվաղով: Մենք գիտեինք սկզբից գաջի սվաղ էր, հետո պարզվեց, որ ցեմենտի սվաղով է և որոշեցինք,որ պատերը քանդման ենթակա չեն»,- ասում է Ախուրյանի «Կոոպշին» ընկերության աշխղեկ Անդրեյ Մկրտչյանը։ Ամրացում դպրոցի տիպային շենքում կատարել են ռուս շինարարները երկրաշարժից հետո՝ 1989-90 թվականներին: Կառույցը բավական ամուր է, սեյսմակայուն, դրա վերաբերյալ կա նաև մասնագիտական եզրակացություն:  Ոչ միայն ներքին, այլև արտաքին վերանորոգումներով ամեն ինչ նորացվելու է: Հին պատուհանները, դռները, տանիքը փոխվելու են: Հին շինանյութը, սակայն, հենց այնպես, որպես շինաղբ, ամբողջությամբ չեն թափելու: Պիտանի փայտանյութը դպրոցը աճուրդով վաճառելու է, իսկ գումարը տնօրենը վարժարանի բյուջե է ուղղելու: Նոր՝ ներքին ու արտաքին տեսքով ժամանակակից կրթօջախ ունենալու համար շինարարին տրված է մեկուկես տարի ժամանակ: Այդքան ժամանակ դպրոցը դասերը կշարունակի նախկին մանկավարժական քոլեջի շենքում, որը 3 տարի է` չէր շահագործվում:Երկու ամիս անց նաև ջեռուցման հարցերի կարգավորմանն են բախվելու: 600 աշակերտի ու 50-ից ավելի մանկավարժների համար տաք ու նորմալ պայմաններ ստեղծելու նախկին քոլեջի կոնսերվացված կաթսայատան հարցերն են լուծելու: Փորձարկման աշխատանքները վարժարանի ուժերով են լինելու: