Աշխատանքային խումբն ավարտել է աղետի գոտու բնակավայրերում բնակապահովման մասին մշակված ծրագրի համար առաջարկությունների փաթեթի կազմումը

Աղետի գոտու բնակավայրերում տնակների հաշվառման աշխատանքային խումբն, ըստ էության, ավարտել է ուսումնասիրությունները, քարտեզագրել բոլոր ժամանակավոր կացարանները և պարզել դրանցում ապրող ընտանիքների կարգավիճակը, հերթն արդեն, ըստ առաջարկությունների, գործողությունների փուլին է հասել: Բնակարանային խնդրի լուծման ինչ ռեալ տարբերակներ կան օրակարգում և բնակարան ստանալու առաջնահերթությունները ինչ կարգով են սահմանվելու: Աշխատանքային խումբն առաջարկությունների փաթեթն արդեն պատրաստել է:

8 ամիս տևած ուսումնասիրությունները շատ բան են պարզել տնակների վիճակի, կարգավիճակի և բնակիչների՝ դրանցում երկար տարիներ ապրելու կամ նոր հայտնվելու հիմքերի մասին: Աշխատանքային խումբը բոլոր տնակային հասցեներին անդրադառնում է մեկ առ մեկ, տնակի բնակչի բնակապահովման խնդրին ևս անհատական մոտեցում է լինելու: Աշխատանքային խմբի անդամ Վահան Թումասյանը նշում է, որ որևէ մեկը հույս չունենա, որ միայն տնակ ունենալով՝ նա կարող է բնակարանատեր դառնալ: Չկա նման տրամադրվածություն և նման ծրագիր, որովհետև նախորդ հաշվառումից հետո մարդիկ սկսեցին աչքի լույսի պես պահել իրենց տնակները:

Փակ տնակների քանդումը աշխատանքային խումբը համարում է առաջնահերթ: Բայց ինչպես կազմակերպել, երբ տնակատերը 10, նույնիսկ 20 տարի քաղաքից բացակայում են: Արդարադատության նախարարությունն ու քաղաքաշինության կոմիտեն հանձնարարություն են ստացել 1 ամսում մշակել կարգ, թե ինչպես է հնարավոր տնակատիրոջ բացակայության պարագայում տնակի ապամոնտաժման հարց լուծել:

Գյումրիում մոտ 600 փակ տնակ կա: Չբնակեցվածների համար օրակարգային է ապամոնտաժումը, բնակեցված տնակների դեպքում՝ ինչպես անել, որ ընտանիքներին հնարավորություն տրվի 30 տարի անց դուրս գալ փայտե կացարաններից: Տնակի բնակիչներ կան, որոնք ոչ թե տուն են պահանջում, այլ համաձայն են տնակի տեղում քարից տուն կառուցել, եթե էժան վարկավորում լինի: Շիրակի մարզպետ Տիգրան Պետրոսյանի խոսքերով՝ նման ավելի քան 200 ընտանիք կա, ովքեր համաձայն են իրենց բնակարանները կառուցել, եթե տարածքը թույլատրեն սեփականաշնորհել: Քաղաքաշինության կոմիտեն էլ ունի ծրագիր, որով առաջարկում է ընտանիքներին արտոնյալ պայմաններով հիփոթեքային վարկ տալ բնակարանաշինության համար:

Շիրակի մարզպետը շեշտում է, որ այլ առաջարկներ էլ կան տնակի բնակիչներին: Դրանք բոլորն առաջարկվելու են ընտանիքներին: Արդյունքներից է կախված, թե անհրաժեշտություն կլինի բնակարանաշինություն սկսել կամ վկայագիր տրամադրել: Այնուամենայնիվ, Գյումրիում բնակարանաշինություն սկսելու մասին այժմ որևէ խոսք չկա: Այս պահին անօթևանության համատեքստում նաև այլ խնդիր է հրատապություն պահանջում, դրանք վթարային շենքերն են:

Մտադիր են վթարային շենքերի ամրացմամբ նաև անօթևանության խնդիր լուծել: Աշխատանքային խումբը ևս հակված է վթարային շենքերը վերակառուցել, ամրացնել, քան նոր բնակարաններ կառուցել:

Բնակապահովման ինչպիսի ծրագիր էլ լինի, նորից հերթագրում է պահանջվում: Համանման տարբերակ, հիշեցնենք, գործել է 1988-ից հետո 20 տարի շարունակ: Բայց ոչ թե արտոնությունները, այլ առաջնահերթություններն են այս անգամ էական դեր խաղալու: Հաշվի են առնվելու ոչ միայն ընտանիքի սոցիալական վիճակը, նաև այն, թե տնակը ինչ կարգավիճակ ունեցող հողատարածքի վրա է:

Առաջնահերթությունները մշակելու է մեկ այլ աշխատանքային խումբ: Նշված բալավորումը հենց նրանք են անում: Բնակարանային ապահովման մշակվող ծրագրից հայտնի է, որ չեն օգտվի այն ընտանիքները, որոնք տնակներ չունեն, բայց երկրաշարժին բնակարան են կորցրել ու մինչև հիմա չեն փոխհատուցվել: Այս ընտանիքները հաշվառված էլ չեն: Բնակապահովման նոր ծրագիրը, հիշեցնենք, Գյումրիում վերաբերելու է տնակներում ապրող 2550 ընտանիքներին: Մեկնարկի ժամկետը, ըստ նախատեսումների, 2020 թվականի հունվարն է: