Շիրակի մարզում այս տարի կարտոֆիլի բերքը քիչ կլինի

Այս տարի Շիրակի մարզում կարտոֆիլի բերքը սպասվածից քիչ կլինի։ Սա պայմանավորված է մի քանի գործոններով. նախ՝ կարտոֆիլի ցանքատարածքներն են քիչ, հետո՝ եղանակն էր անբարենպաստ լավ բերք ստանալու համար: Մարզի առանձին հատվածներում ամռանը երաշտ էր, կարկտահարությունից էլ կարտոֆիլի բավականին շատ ցանքեր են վնասվել: Բացի դրանից՝ կարտոֆիլն այն մշակաբույսն է, որը արտադրողից մինչև սպառողին հասնելը մի քանի միջնորդ վերավաճառողների ձեռքով է անցնում: Նաև սա է այս պահին բարձր գնաճ ստեղծում:

Ախուրյանի տարածաշրջանն է, որ հողերը հիմնականում օգտագործում են կարտոֆիլ մշակելու համար: Ազատանի ցանքատարածքներում ամենաշատը կարտոֆիլ են ցանում: Այս տարի էլ նույնի կրկնությամբ, բայց բերքից գոհ են ոչ բոլորը: Մոտ 3 ամիս տեղումներ չեն եղել, ոռոգման ջուրն էլ չի կարողացել փոխարինել անձրևներին: Արդյունքում՝ տնտեսություններ կան, որ 3 անգամ պակաս բերք են հավաքել: Այսպիսի բան չէր եղել, որ դաշտերին մինչև 8 անգամ ոռոգման ջուր տային, թեև օգուտից բացի գյուղացիներն ասում են՝ վնաս են ունեցել: Չորային եղանակներից կարտոֆիլի վրա առաջացած խոցերն առատ ոռոգումից հետո փտել են:

Հիմա բերքահավաքը ցածրադիր գոտիներում սկսված է: Դրան զուգահեռ, կարտոֆիլի գինն է աճել, ինչը Շիրակի մարզի գյուղմթերքի շուկայի գներին անհամապատասխան է: Թե ինչու է կարտոֆիլի ցանքերով հարուստ մարզում 200-250 դրամով այն վաճառվում, հողագործները համարում են, որ պատճառը մի քանի օր շարունակվող անձրևներն են:

Ասում են՝ անձրևների պատճառով չեն կարողացել կարտոֆիլ քանդել, դրա համար էլ գինը թանկացել է։ Բերքը քիչ է, ու վաճառքի սեզոնը կարտոֆիլագործների համար լավ է սկսվել: Հազվադեպ է լինում, երբ գնորդն է գալիս գյուղացու դուռը: Դաշտից կարտոֆիլը քանդում են ու անմիջապես տեղում վերավաճառողը տանում է: Գյուղացին էլ այս տարի թանկ է տալիս՝ 1 կգ-ը 140 դրամով, նույն չափի ու որակի կարտոֆիլն անցած տարի վաճառում էր 90 դրամով: Վերավաճառողն էլ դրան է գին ավելացնում: Ասում է՝ վաճառելու նպատակով Երևան է տանում բերքը։

Գյուղացիների խոսքերով՝ 140 դրամով հազվադեպ է եղել, որ կարտոֆիլ վաճառեն, նախկինում՝ 90, 100, լավագույն դեպքում՝ 120 դրամով են մեծածախ վաճառք կատարել։

Մեծածախ գնով տեղափոխած կարտոֆիլը շատ դեպքերում չի մնում գնորդի ձեռքին, այլ մի քանի միջնորդ վերավաճառողների միջոցով, եղած գնին գին ավելացնելով, հայտնվում է շուկայում: Ազատանի գյուղապետ Վարդան Իկիլիկյանի խոսքերով՝ կարտոֆիլը մինչև սպառողին է հասնում, մի 3-4 ձեռք է անցնում, ու այս պարագայում տուժում են արտադրողն ու սպառողը։ Այսինքն՝ կարտոֆիլը արտադրողից կրկնակի թանկ է հասնում սպառողին: Սա արդեն շուկայի չկանոնակարգման հետևանքն է, երբ միջամտություն չկա գնագոյացման հարցում: Օրինակը նաև Գյումրիի շուկայում է:

Կարտոֆիլի դեֆիցիտ ստեղծվել է նաև այն պատճառով, որ շատ տնտեսություններ ապրանքը դեռ վաճառքի չեն հանում, սպասում են: Գյուղատնտեսները չեն կարծում, որ թանկ գինը երկար կպահպանվի, քանի որ տարածքներ կան, որտեղ բերքահավաքը դեռ չի սկսվել: Սկսվելու դեպքում, շուկան ապրանքով կլցվի ու հնարավոր է գնանկում լինի: Շիրակի մարզում այժմ հավաքում են վաղահաս կարտոֆիլը, միջահաս ու ուշահաս բերքին դեռ ժամանակ կա:

Անցած տարվա համեմատ, մարզում 400 հա-ով պակաս է կարտոֆիլ մշակվել, ցանքերը կազմել են 3200 հա: Դրանցից ավելի քան 1000 հա-ն էլ կարկտահարվել է: Կարտոֆիլ այս տարի Շիրակի մարզից չի արտահանվի, փոխարենը մոտ 2 ամիս առաջ հանրապետություն կարտոֆիլ է ներկրվել Ռուսաստանի Դաշնությունից: