Լեռնային Ղարաբաղի հարցում, այո՛, խնդիր կա, բարդ է իրավիճակը. Շոմբի Շարփ

2017-ին Հայաստանում ՄԱԿ-ի հետ համատեղ նախաձեռնությամբ հիմնադրվել է կայուն զարգացման նպատակների ազգային նորարարական կենտրոն, որը կոչվում է ինովացիոն լաբորատորիա: «Հեռանկարի» տաղավարում Հայաստանում ՄԱԿ-ի մշտական համակարգող Շոմբի Շարփը նշեց, որ այդ լաբորատորիան Հայաստանում աննախադեպ էր:

«Այն սկզբունքորեն աննախադեպ էր, առաջինը ամբողջ աշխարհում: Եվ այն այնքան է հաջողել տարբեր ուղղություններում և աշխատանքներում, որ այսօր արդեն ավելի քան 60 երկիր փորձում է վերարտադրել այդ փորձը և աջակցություն է ստանում ՄԱԿ-ի զարգացման ծրագրի կողմից: Սա սկզբունքորեն այն վայրն է, որտեղ կարելի է փորձարկել քաղաքականություններ, միջոցառումներ, փորձում են գտնել հասանելի տվյալներ և դրանք ուղղել սոցիալական ցանցերով, քննարկումներով, զտել, հավաքագրել, արհեստական բանականությամբ համալրված լուծումներ տալ, որոնք կօգնեն հսկայական ծավալի տեղեկությունը զտել այնքան, մինչև կստանանք օգտակար տվյալ, որն, օրինակ, կօգտագործենք բարելավելու համար զբոսաշրջությունը կամ էկո զբոսաշրջություն զարգացնելու համար: Սա միայն 1 ուղղությունն է: Ուղղությունները շատ են, օրինակ՝ վարքագծային փոփոխություններ՝ խթաններ ստեղծելով կանանց համար, տալով բարդ հարցերին պատասխաններ, երիտասարդ աղջիկներին հնարավորություն տալով ներգրավել տեխնոլոգիական տիրույթում»:

Անդրադառնալով ՄԱԿ-ի գլխավոր ասամբլեայում վարչապետի ելույթին՝ Շարփը նշել է, որ ոչ միայն Հայաստանում, այլև աշխարհում տնտեսական ու բնապահպանական հարցերը հաճախ հակազդում են իրար, դա ամենամեծ մարտահրավերն է.

«Հենց այստեղ է, որ պետք է դիմել կայուն զարգացմանը: Զարգացումները, որ տեղի են ունեցել նախորդ 100 տարվա ընթացքում և վերջին 10 տարվա ընթացքում, անհամեմատելի են և մոտեցումներն էլ պետք է փոխվեն: Աշխարհում պահանջ է հիմա, որ ցանկացած տնտեսական ծրագիր պետք է հիմնված լինի բավական ամուր բնապահպանական հետազոտության վրա: Միևնույն ժամանակ, ուսումնասիրելով նորագույն տեխնոլոգիաները, տնտեսական գործունեությունը զարգացնելու համար ամեն ինչ, ինչն անում ենք, շատ ավելի կայուն է բնապահպանական տեսանկյունից, քան նախկինում էր»:

Իսկ ելույթի ընթացքում վարչապետի այն դիտարկմանը, որ մյուսների նման Արցախը ևս պետք է միջազգային կառույցներից ստանա ֆինանսական և տեխնիկական աջակցություն մարդու իրավունքների ամրապնդման, աղքատության հաղթահարման, կրթության բարելավման, կլիմայի փոփոխություններին  արձագանքելու և ներառական հասարակություն կառուցելու համար, Շարփը նշեց՝ արդեն ստանում է:

«Այսպիսի ձևակերպման կարիքը չկա էլ: Մարդիկ վաստակել են այս աջակցությունն ամբողջությամբ, որտեղ էլ, որ նրանք ապրելիս լինեն: Մասնավորապես Լեռնային Ղարաբաղի հարցում, այո՛, խնդիր կա, բարդ է իրավիճակը, ԱՄՆ-ի, Ռուսաստանի, Ֆրանսիայի ջանքերով փորձում են գտնել լուծումներ: Իհարկե, մենք քաղաքականապես այս գործընթացում ներգրավված չենք, բայց մենք աշխատում ենք մարդկանց հետ, համայնքների հետ, այդ թվում՝ սահմանամերձ ու նաև ազդակիր»: